Əli Orucov: "Bu gün Alyansla Rusiya, demək olar kı, birbaşa qarşıdurmanın astanasındadır"
Prezident İlham Əliyev "Rossiya Seqodnya" Beynəlxalq İnformasiya Agentliyinin Baş direktoru Dmitri Kiselyova müsahibəsində deyib ki, xarici siyasətinin xüsusiyyətlərinə görə istər Qərbdə, istərsə də Şərqdə Azərbaycan müstəqil xarici siyasət yürüdən tamamilə müstəqil aktor kimi qəbul edilir.
Həm də ona görə ki, bu, eyni zamanda, həm Rusiyanın, həm də NATO üzvü Türkiyənin müttəfiqi olan yeganə ölkədir. Dünyada ikinci belə ölkə yoxdur. Azərbaycan beynəlxalq güclərin ortaq məxrəcə gələ bildiyi bir platformaya çevrilə bilərmi? Baki-xeber.com saytına açıqlamasında politoloq Əli Orucov bildirdi ki, Rusiyanın Ukraynaya hərbi təcavüzündən sonra Şimal qonşumuzun NATO ilə münasibətləri kəskin surətdə pisləşdi və aradakı cəbhə xətti dərinləşdi: "Halbuki, həmin dövrədək bir sıra dövlətlər, o cümlədən Azərbaycan hər iki qütb arasında balansı qorumaqda o qədər də çətinlik çəkmirdi. Bu gün Alyansla Rusiya, demək olar kı, birbaşa qarşıdurmanın astanasındadır. Belə bir vəziyyətdə Azərbaycanın həm NATO ilə, həm də Rusiya ilə müttəfiqlik münasibətlərini qoruyub saxlaması yürüdülən xarici siyasətin uğurlu olması deməkdir. Türkiyə Alyansda əsas söz sahiblərindən biri və blokun Cənub sərhədlərinin təhlükəsizliyinin şəriksiz və yeganə təminatçısıdır. Türkiyənin Azərbaycanla hərbi və strateji müttəfiqliyi imkan verir ki, NATO ilə də əlaqələri möhkəm saxlasın. Eyni zamanda, Bakının özü də fəal şəkildə əməkdaşlıq edir. Bir sıra təlim və proqramlarda iştirak edir. Azərbaycanın strateji regionda yerləşməsi və açar rolu oynaması NATO üçün də vazkeçilməzdir. Alyansla Azərbaycanın sıx əməkdaşlığı zərurətdən qaynaqlanır. Rusiyaya gəlincə, indiki dönəmdə Bakı ilə münasibətlərdə soyuqluq yaranması arzuolunan deyil və bu, Moskva üçün böyük itki olardı. Bütün bunlara baxmayaraq, Azərbaycanın xarici siyasətində qonşularının maraqlarına diqqət yetirməsi, həmçinin regionda rəqabət aparan aktorlarla qarşılıqlı faydalılığa və mənafelərə sökənməsi ona üstünlük qazandırır. Bu balansı qorumaq təkcə Azərbaycan üçün deyıl, ümumilikdə Cənubi Qafqazda dayanıqlı sülhün və təhlükəsizliyin əldə edilməsi üçün lazımlıdır. Regionu rəqabət və qarşıdurma poliqonuna çevirməyin acı nəticələrindən heç bir dövlət sığortalana bilməz. Bütün bunları nəzərə alaraq söyləmək olar ki, Azərbaycan dünya güclərinin bir araya gəlib barış əldə etməsi üçün bir geosiyasi danışıqlar platforması rolunu oynaya bilər". Dəniz NƏSİRLİ
