Bəlli olduğu kimi, Ermənistanın baş naziri Nikol Paşinyan ölkənin Avropa İttifaqına üzvülüyünə dair referendum keçirilməsi təşəbbüsünü dəstəkləyib.
"Ermənistanın Avropa Partiyası"nın rəhbəri Tiqran Xzmalyan bildirib ki, ölkənin Mərkəzi Seçki Komissiyası referendum layihəsinin müzakirəsi üçün imzatoplama kampaniyasını yekunlaşdırıb və yaxın günlərdə sənəd parlamentə təqdim olunacaq. Xzmalyannın sözlərinə görə, layihə qanunverici orqanın dəstəyini qazana bilməsə, kampaniya yenidən keçiriləcək və 300 min imza toplamaq mümkün olsa, ümumxalq səsverməsi qanunverici orqanın qərarı olmadan baş tutacaq.
Ermənistanın Mərkəzi Seçki Komissiyası isə Qərbyönümlü qüvvələrin Avropa İttifaqına üzvlük üçün müvafiq prosesinin başlanmasını ehtiva edən qanunun parlamentə təqdim olunması üçün toplanmış imzaların həqiqiliyini təsdiqləyib. Qurum bu zaman texniki və proqram təminatı vasitələrindən yararlanıb, imzaların həqiqiliyini yoxlayıb, o cümlədən, imzalanmış blanklardakı məlumatların dövlət və yerli özünüidarəetmə orqanlarının sərəncamındakı məlumatlarla müqayisəsini aparıb. Nəticədə etibarlı imzaların sayı 52351 olub ki, 50 min etibarlı imza da kifayət edirdi. Ekspertlər qeyd edir ki, bütün bunların geosiyasi nəticəsi olacaq. Ekspertlər qeyd edir ki, Ermənistan Qərbin Cənubi Qafqazdakı siyasi oyunlarında əsas fiqurdur. Bu səbəbdən Ermənistana müəyyən şirnikləndirici vədlər verilir. Erməni Milli Konqresinin sədr müavini Levon Zurabyan vurğulayır ki, Ermənistan hakimiyyəti Avropa İttifaqının qapısı olduğuna inanaraq beton divarı döyür, eyni zamanda öz əhalisini yalan vədlərlə, illüziyalarla doyurur: "Hakimiyyət qapını döyür, amma əslində bu, beton divardır, yəni heç vaxt açılmayacaq. Amma hakimiyyət insanları aldadır, cəmiyyətdə yaratdığı yalaçı əhval-ruhiyyədən əlavə siyasi xal qazanmaq üçün istifadə edir. Başa düşürlər ki, bu halda Qərb onlara parlament seçkiləri ərəfəsində ciddi piar dəstəyi verəcək. Eyni zamanda, hətta bu halda baş nazir Nikol Paşinyanın siyasi kursu və ritorikası bir çox suallar doğurur və qeyri-müəyyənliklərlə doludur". Zurabyanın nöqteyi-nəzərindən ölkə rəhbərliyinin düşünülmüş və balanslaşdırılmış xarici siyasəti yoxdur. Siyasətçinin qeyd etdiyi kimi, Avropa İttifaqına münasibətdə Paşinyan hələ də Ermənistanın həqiqətən nəyə can atdığına birmənalı cavab verməyib: "Aİ-yə daxil olmaq istəyiriksə, bütün risklər və mümkün xərclər hesablanmalıdır: Kimsə xalqa deməlidir ki, ölkə Aİ-yə gedir, amma bu yolda çətinliklər olacaq, qaz qiymətlərində artımı olacaq, bir neçə qış donmalı olacaq, amma sonda ölkəni "parlaq gələcək" gözləyir. Heç kim bu riskləri hesablamayıb və səmimi qəlbdən fikirlərini xalqla bölüşməyib".
Levon Zurabyan vurğulayır ki, Nikol Paşinyan və komandası bütün ciddi təhdidlərə və beynəlxalq proseslərə məhəl qoymadan ölkəni "Kardaşyan realiti-şousuna" çevirib: "Biz Zəngəzur dəhlizi adlanan layihənin həyata keçirilməsi təhlükəsi ilə üz-üzəyik, lakin hakimiyyət qeyri-adekvat reaksiya verir, ölkə başçısı velosiped sürdüyünü, dolma hazırladığını göstərir, o, keyfiyyətsiz bloqçuya çevrilib, filmə baxır, kamera qarşısında üzünü qırxır və ölkə getdikcə "Kardaşyan şousuna" çevrilir. Azərbaycan təbliğatı fəal işləyir, Ermənistanı təxribata hazırlaşmaqda ittiham edir, Fransa və Hindistanın ölkəni silahlandırması barədə xəbərlər yayılır. Ermənistan hakimiyyətinə gəlincə, Paşinyan "sülh mövzusunu özəlləşdirib" və bütün siyasi rəqiblərini revanşist kimi qələmə verməyə çalışır". Rusiyalı politoloq Vyaçeslav Sutirin bildirib ki, baş verənlər fonunda Ermənistanın Qərblə Moskva arasında qarşıdurma meydanına çevrilməsi qaçılmazdır. Onun sözlərinə görə, Rusiya Cənubi Qafqazda fəal iştirak edir və coğrafi şəraitə görə bu regiondan kənarda qala bilməz. Sutirin qeyd edib ki, Rusiyanın diqqətini Ukrayna münaqişəsi istiqamətinə yönəltmək Qafqaza xarici müdaxilənin genişlənməsi üçün imkanlar yaradır. Sutirin izah edib ki, Qərb dövlətləri Rusiyada ciddi qəbul edilən Rusiya-Ermənistan ziddiyyətlərindən sui-istifadə etməyə çalışırlar: "Bu ziddiyyətlər əsasən obyektiv xarakter daşıyır, onları təkcə bugünkü siyasi maraqlar və ambisiyalar diktə etmir, həm də daha dərin əsaslara malikdir. Bu gün bütün region yenidən formatlaşdırılır və burada əsas sual Rusiya ilə Ermənistanın mövqelərini uyğunlaşdırmağa çalışıb-çalışmayacaqlarıdır". Ekspert vurğulayıb ki, bu gün iki məsələdə Ermənistan-Rusiya münasibətlərində müxtəlif trayektoriyalar var: "İlk növbədə, Rusiya ilə Ermənistan arasında müxtəlif səviyyələrdə, ilk növbədə, humanitar müstəvidə təmaslar zəifləyir və buna paralel olaraq, Ermənistanın Rusiya ilə proksi müharibədə olan Qərb dövlətləri ilə əlaqələri artır. Bu, gərginlik və ziddiyyət yaradır. Digər tərəfdən, biz iqtisadi qarşılıqlı əlaqənin demək olar ki, partlayıcı artımının şahidi oluruq. 2020-ci ildən Ermənistanla Rusiya arasında ticarət dövriyyəsi 7 dəfə artaraq, bu ilin sonunda 14-16 milyard dollara çatıb. Avrasiya İqtisadi Birliyinə daxil olduqdan sonra Ermənistanın ÜDM-i 2,5 dəfə artıb. Birliyə üzvlüyün özü də bunda mühüm rol oynadı". Politoloq əmin edib ki, Rusiya əsassız olmayan iddialara baxmayaraq, Ermənistanı müttəfiq adlandırmaqda davam edir. Sutirin əlavə edib ki, bunun fonunda Qərb Ermənistana əvvəllər Ukraynaya təklif edilən sxemi təklif edir.
Tahir TAĞIYEV
