Elnur Kəlbizadə: "V Qlobal Forum adlandırılan toplantı Ermənistanda səhnələşdirilən növbəti teatr tamaşasıdır"
İnsanlıq əleyhinə müharibə cinayətləri, deportasiyalar, silsilə genosid aktları törədən Ermənistan buna görə beynəlxalq hüquq müstəvisində cavab vermək əvəzinə, törətdiyi cinayətlərə görə üzr istəmək əvəzinə tamam başqa yol tutur.
Dekabrın 12-də İrəvanda "Soyqırım cinayətinə qarşı" V Qlobal Forumu keçirilib. Bu barədə erməni mediası məlumat yayıb.
Bu forumda Ermənistanın xarici işlər naziri Ararat Mirzoyan da çıxış edib və beynəlxalq ictimaiyyəti ittiham edib ki, "hadisə baş verəndən sonra" "soyqırımlar" və digər "kütləvi cinayətlər" haqqında danışmağa başlayır.
Erməni nazir yenə də köhnə nağılları danışmağa başlayıb, uydurma "soyqırımları" yada salıb, deyib ki, beynəlxalq ictimaiyyət vaxtında bu məsələlərə reaksiya vermir. Əslində, Mirzoyan bununla demək istəyir ki, ermənilərin 100 ildən çoxdur danışdığı "soyqırım" nağılını dünya birliyi qeyri-ciddi qəbul edir. V Qlobal Forumda çıxış edən erməni nazir Ermənistanı və erməniləri elə qələmə verib ki, guya ermənilər "soyqırımlardan" "əzab çəkiblər". Nazir danışdığı yalanlara o qədər qapılıb ki, azərbaycanlılara qarşı 1 əsrdə dörd-beş dəfə törətdikləri genosid cinayətlərini unudub.
AMEA Qafqazşünaslıq İnstitutunun şöbə müdiri, tarix üzrə fəlsəfə doktoru, dosent Elnur Kəlbizadə "Bakı-Xəbər"ə şərhində "Soyqırımı cinayətinə qarşı V Qlobal Forum adlandırılan toplantı Ermənistanda səhnələşdirilən növbəti teatr tamaşasıdır. Tarixdə olmayan uydurmalar, nağıllar əsasında sadə ermənilərin beyni illərlə zəhərlənib, indi də təzə nağıllar uydurulur. Ermənistan xarici işlər naziri Mirzoyan deyir ki, guya keçən il "soyqırımı" olub. Mirzoyan ya qanmır, ya da qanmaq istəmir ki, indi XXI əsrdir. Texnologiya inkişaf edib. Dünyanın hər hansı nöqtəsində soyqırımı törədilsə bunu aşkara çıxarmaq çox asandır. O unutmamalıdır ki, hələ texnologiyanın indiki qədər inkişaf etmədiyi bir dövrdə - 1992-ci ildə Ermənistanın Xocalıda törətdiyi soyqırımının video və foto sübutları ortadadır" - deyə bildirdi.
E.Kəlbizadənin sözlərinə görə, Mirzoyan 2023-cu il lokal antiterror əməliyyatlarından sonra ermənilərin könüllü şəkildə Qarabağı tərk etməsini, öz ölkələrinə getmələrini nəzərdə tutur. "O proseslərin də videokadrlari ortadadır. Azərbaycanlılar yolda çətinliklərlə üzləşən ermənilərə su, yemək, bulka veriblər. Onlara köməklik göstəriblər. Getməmələrini dövlət rəsmiləri dəfələrlə təklif ediblər. Onlarin əksəriyyəti isə vaxtilə azərbaycanlılara qarşı cinayətlərdə iştirak etdikləri üçün, istintaqdan yayınmaq, yaxa qurtarmaq üçün həmin humanizmi fürsət bilib qaçıblar. Nə zamandan qaçanlara yemək, su vermək soyqırımı hesab edilir?"
E.Kəlbizadənin fikrincə, bu həm də onu göstərir ki, Ermənistan hökumətinin sülh çağırışları saxtadır. "Əgər sülhlə bağlı 12 maddə razılaşdırıldıqdan sonra Ermənistan xarici işlər naziri çixib belə sərsəm bəyanatlarla çıxış edirsə bu necə sülh istəməkdir? Bunu sıradan bir terrorçu, daşnak, əqli qüsurlu bir şəxs desə başa düşmək olardı. Amma Mirzoyan deyirsə, deməli bu, Ermənistan dövlətinin rəsmi mövqeyidir. Sonra da bəziləri həyasızcasına Ermənistandan sülh quşu düzəltməyə çalışırlar. Amma bu quş obrazına bizim inanmağımız üçün əvvəlcə Mirzoyanın buraxdığı "quş"ları düzəltmək lazımdir" - deyə E.Kəlbizadə qeyd etdi.
İradə SARIYEVA
