44 günlük müharibə ermənilərin beynəlxalq mövqeyini iflic etdi...
2020-ci il 27 sentyabr tarixində Azərbaycan xalqı ideologiyasından və kimliyindən asılı olmayaraq vahid şəkildə birləşərək möhtəşəm bir həmrəylik nümayiş etdirdi.
44 gün ərzində "dəmir yumruğ"a çevrilən bu birlik müharibənin ağrı-acılarına da birgə sinə gərdi, qələbəyə də birgə sevindi. Artıq 27 sentyabr – Anım Gününün və 8 Noyabr Zəfər Gününün 4-cü ildönümlərini qeyd etdik.
Azərbaycan bütün cəbhələrdə mütləq qalibiyyət əldə etməklə tarix yazıb
2020-ci il sentyabrın 27-dən noyabrın 10-a qədər davam edən 44 günlük Vətən müharibəsinin nəticələri Azərbaycan dövlətinin milli gücünü, xalqımızın isə mübarizə əzmini - sarsılmaz həmrəyliyini bütün dünyaya nümayiş etdirdi. Azərbaycan möhtəşəm qələbə qazanmaqla tarixi ədalətin və ərazi bütövlüyünün bərpasına nail oldu. Şübhəsiz, bu tarixi qələbə son 18 ilə yaxın müddət ərzində Prezident İlham Əliyevin rəhbərliyi ilə həyata keçirilən strateji kursun məntiqi nəticəsidir. Təbii ki, Azərbaycan bütün cəbhələrdə - istər döyüş meydanında, istər siyasi-diplomatik müstəvidə, istərsə də informasiya cəbhəsində mütləq qalibiyyət əldə etməklə tarix yazıb. Eyni zamanda, Azərbaycan Ordusu Müzəffər Ali Baş Komandan İlham Əliyevin rəhbərliyi ilə XXI əsrin müharibəsini aparmaqla mütərəqqi nümunə ortaya qoydu. Təsadüfi deyil ki, bu gün dünyanın aparıcı hərbi məktəblərində Azərbaycanın təcrübəsi geniş tədqiq olunur, öyrənilir. Bu, Cənubi Qafqazın lider dövlətinin hərbi-siyasi qüdrətinin ifadəsidir. Ölkəmiz həm də çox mühüm strateji presedentin əsasını qoydu. Belə ki, Azərbaycan 30 ilə yaxın mövcud olmuş Qarabağ münaqişəsini öz milli gücü ilə həll etməklə həm də BMT Təhlükəsizlik Şurasının müvafiq qətnamələrinin icrasını təmin etməyə müvəffəq oldu. Bu, heç şübhəsiz, dünya siyasi tarixinin çox əlamətdar hadisələrindən biri, eləcə də ədalətin və beynəlxalq hüququn təntənəsidir. Ümumən, bu qələbə ilə Azərbaycan xalqı tarixi ədaləti və ərazi bütövlüyünü bərpa etdi və "güclü Ermənistan", "güclü Ermənistan ordusu" mifini aradan qaldırdı. Ermənilər əslində İrəvanı, Zəngəzuru, sonrakı dövrdə Qarabağı işğal etdilər. Düşünürdülər ki, onlar uzun illər bizim bütün ərazilərimizi işğalda saxlaya biləcəklər. Amma Azərbaycan həyata keçirdiyi tədbirlərlə bu prosesin qarşısını qəti şəkildə aldı və bütün dünyaya göstərdi ki, Ermənistan bu ərazilərdə insanlıq əleyhinə cinayətlər törədib, ərazilərimizi dağıdıb. Vətən müharibəsində qələbə ilə Azərbaycan bölgədə yeni reallıq yaratdı. Son 200 illik tariximizdə ilk dəfə torpaq itirmədik, əksinə itirilmiş torpaqlarımızı geri qaytardıq
COP29 tədbirinə mane ola bilmədilər
O da məlumdur ki, Vətən müharibəsi dönəmində Azərbaycan təkcə hərb cəbhəsində vuruşmurdu. Müharibə həm də beynəlxalq siyasət müstəvisində gedirdi. Başda Fransa olmaqla, Azərbaycana qarşı olan bəzi dövlətlər, bir sıra xarici dairələr məsələni BMT müstəvisinə çıxarmaq istəyirdilər. Məqsəd o idi ki, BMT-nin Təhlükəsizlik Şurası Azərbaycana qarşı qətnamə qəbil etsin. Həmçinin ölkəmizə qarşı bir sıra sanksiyalara qərar verilsin. Ancaq bu cəhdlərin bir nəticəsi olmadı. 44 günlük müharibədən və 19 sentyabr 2023-cü ildə keçirilən antiterror əməliyyatlarından sonra Ermənistan, onun havadarları Azərbaycana qarşı BMT Təhlükəsizlik Şurası müstəvisində hansısa qətnamə qəbul edə bilmədilər. O cümlədən, Azərbaycanın COP29 tədbirinə mane ola bilmədilər.
Böyük Britaniya Azərbaycan əleyhinə olan qətnaməyə veto qoydu
Sözügedən məsələ ilə bağlı fikirlərini "Bakı-Xəbər"lə bölüşən tarix elmləri doktoru, professor Məhərrəm Zülfüqarlı bununla bağlı bir sıra məqamlara toxundu: "1988-ci ildən başlayaraq erməni separatizmi, düşmənçiliyi daim Azərbaycan dövlətçiliyinin inkişafına mane olub. Ermənilərin beynəlxalq havadarları da daim bundan istifadə ediblər. 44 günlük müharibə və antiterror əməliyyatlarından sonra Ermənistan, onları müdafiə edən qüvvələr BMT Təhlükəsizlik Şurasında Azərbaycana qarşı qətnamə qəbul etmək istəsələr də, buna nail ola bilməmələrinin əsas səbəbi Londonun sərgilədiyi mövqe idi. Məsələ ondadır ki, BMT TŞ-nin daimi üzvü olan Böyük Britaniya Azərbaycan əleyhinə olan qətnaməyə veto qoydu. BMT TŞ-nin 5 daimi üzvündən biri veto qoyursa, bu zaman qətnamə qəbul etmək mümkün olmur. Böyük Britaniya-Azərbaycan münasibətlərinin yüksək səviyyədə olması, BP-nin Xəzərdə böyük neft hasilatı ilə məşğul olması bu münasibətlərin inkişafına daim kömək edib. Bütün bunlar beynəlxalq müstəvidə Britaniyanın daim Azərbaycana dəstək verməsinə gətirib çıxarıb. Bundan başqa orada ermənilərin öz niyyətini həyata keçirə bilməmələrinin əsas səbəbi COP29-da fəal iştirak edən Qoşulmama Hərəkatında təmsil olunan dövlətlərin Azərbaycana verdiyi dəstək olub. Məsələ ondadır ki, Azərbaycan 4 il QH-yə rəhbərlik edib və bu ölkələrlə təmaslar daha da inkişaf edib. Həmin vaxt BMT TŞ-nin qeyri-daimi üzvləri olan və QH-də təmsil olunan dövlətlər qətnaməyə qarşı çıxıblar. Həmin dövlətlər tələb etdilər ki, 1993-cü ildə BMT TŞ erməni işğalı ilə bağlı 4 qətnamə qəbul edib və bunlar da ora daxil edilsin. İzahat verilsin ki, nəyə görə 1993-cü ildən 2020-ci ilə qədər 4 qətnamə icra olunmayıb. Bütün bunlar ermənilərin və onları himayə edən qüvvələrin Azərbaycanla bağlı mənfur planlarını alt-üst etdi. Bu, bir daha göstərdi ki, Azərbaycanın çoxsaylı müttəfiqləri var".
Vidadi ORDAHALLI
Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
