İldə iki iş günü olan deputata bu qədər fantastik əmək haqqı vermək ədalətsizlikdir
Mediada dərc edilən məlumatlara görə, Naxçıvan Ali Məclisinin yeni çağırış deputatlarının aylıq maaşları artıq qərarla yox, qanunla tənzimlənəcək.
Belə ki, əvvəllər Ali Məclisin deputatları Məclisin qərarı ilə müəyyən edilmiş məbləğdə aylıq vəzifə maaşı alırdılar.
Yeni qaydalara əsasən, Naxçıvan deputatlarının maaşının məbləği Milli Məclisdə olduğu kimi "Naxçıvan Muxtar Respublikası Ali Məclisi deputatının statusu" haqqında qanunda qeyd olunacaq.
Yeni qanuna əsasən, Naxçıvan Ali Məclisinin sədri 3330 manat məbləğində aylıq vəzifə maaşı alacaq. Ali Məclis sədrinin birinci müavini sədrin aylıq vəzifə maaşının 95 faizini (3163 manat), sədrin müavini 90 faizini (2997), komitə sədri 65 faizini (2164 manat), komitə sədrinin müavini 60 faizi (1998 manat), sıravi deputat isə 50 faizi (1665 manat) miqdarında aylıq vəzifə maaşı alacaq.
Ali Məclisin sədri, onun birinci müavini və müavini hər ay vəzifə maaşlarının 2 misli, Ali Məclisin komitə sədrləri, onların müavinləri və Ali Məclisin deputatları hər ay vəzifə maaşlarının 1,5 misli həcmində vəzifə maaşına əlavə alırlar.
Buradan belə aydın olur ki, Naxçıvan Ali Məclisinin sədri ayda 9990 manat, birinci müavini 9489 manat, müavini 8991 manat, komitə sədriləri 5410 manat, komitə sədrinin müavinləri 4995 manat, sravi deputatlar isə 4162,5 manat aylıq gəlir əldə edəcəklər.
Qeyd edək ki, hazırda Milli Məclisin sədrinin aylıq gəliri vəzifə maaşı qarışıq 10650 manat, Milli Məclisin sədrinin birinci müavini 9585 manat, sədr müavinləri 9052.5 manat, komitə və komissiya sədrləri 8520 manat, komissiya sədrinin müavinləri 7987.5 manat, sıravi deputatlar isə cəmi 7455 manat gəlir əldə edirlər.
Maraqlıdır, Milli Məclisin deputatlarının maaşları ilə Naxçıvan Ali Məclisinin deputatlarınin.maaşları arasında elə ciddi fərq yoxdur. Məsələn, Milli Məclisin sədri 10650 manat, Naxçıvan Ali Məclisinin sədri isə 9990 manat aylıq məvacib alır. Bunların maaşları arasında cəmi 660 manat fərq var. Amma Milli Məclis az qala həftənin hər bir iş günü işlədiyi halda, Naxçıvan Muxtar Respublikası Ali Məclisi ildə iki dəfə toplaşır. Məclislərdən biri ildə 300 gün, digəri isə cəmi iki gun işləmədinə rəğmən, onların deputatları və rəhbər vəzifəli şəxsləri cüzi fərqlə aylıq məvacib alır. Hesab edirik ki, müvafiq qurumlar məsələyə diqqət yetirməli, Naxçıvan Muxtar Respublikası Ali Məclisinin əmək haqqı tariflərinə yenidən baxmalıdır. Naxçıvan Muxtar Respublikası Ali Məclisi ildə iki dəfə yığışıb direktivləri müəyyən edir, qalan dövrlərdə isə Muxtar Respublikanı icra hakimiyyəti orqanları idarə edir. Fikrimizcə, ildə iki iş günü olan deputata bu qədər fantastik miqdarda əmək haqqı vermək ədalətsizlikdir.
Akif NƏSİRLİ
