Ermənistanın baş naziri Nikol Paşinyan Qarabağdan könüllü gedən ermənilərə ölkə vətəndaşlığının verilməsini tezləşdirməyi tapşırıb. Paşinyan bu məsələ ilə bağlı hökumətin iclasında tapşırıq verib.
Ermənistan hökumət rəhbərinin sözlərinə görə, bir çox şəxslər vətəndaşlığın alınması üçün müraciət edir və dövlət orqanlarının vəzifəsi bütün prosedurlara uyğun olaraq onlara köməklik göstərməkdir. Paşinyan həmçinin əlavə edib ki, hökumətin məqsədi Qarabağa qayıtmaq istəməyən ermənilərin ölkədə qalması üçün şərait yaratmaqdır.
Amma erməni mediasının yazdığına görə, Paşinyanın belə əl-ayağa düşməsinə səbəb Qarabağdan könüllü gedən ermənilərin Ermənistanda da qalmaq istəməməsidir. Artıq 10 mindən yuxarı Qarabağ ermənisinin Ermənistanı tərk etdiyi bildirilir. Bu gedişlə onların böyük əksəriyyətinin tezliklə başqa ölkələrdə məskunlaşması gözlənilir. Konstitusiya üzrə ekspert Vardan Ayvazyan qeyd edir ki, həqiqətən də çətin vəziyyət yaranıb: "Ermənistan Respublikası Qarabağdan olan ermənilərə qaçqın statusu verməklə onların Ermənistan ərazisindən çıxması prosesini asanlaşdırır. Bu status Qarabağdan olan ermənilərə Ermənistan Respublikası vətəndaşlığından imtina etmədikləri təqdirdə verilməlidir. Yüksək həyat səviyyəsi olan ölkələrdəki qaçqınlar imtiyazlardan istifadə edirlər və belə bir qərar Ermənistana gələn Qarabağ sakinlərinin kütləvi axınına səbəb ola bilər ki, bu da ölkə üçün arzuolunmazdır". Ayvazyan hesab edir ki, Ermənistan pasportuna və vətəndaşlığına malik olan Qarabağ erməniləri ilk növbədə Silahlı Qüvvələrə mühüm töhfə verə və onların sıralarına qoşula bilərlər: "Hüquqi baxımdan Ermənistan vətəndaşının pasportu səyahət sənədi sayıla bilməz. Bizdə "Ermənistan Respublikasının vətəndaşlığı haqqında" qanun var və əgər siz Ermənistan vətəndaşı kimi pasport alırsınızsa, vətəndaşlar üçün müəyyən edilmiş bütün hüquqlardan istifadə edirsiniz və eyni məsuliyyətləri bölüşürsünüz. Məsələn, milli seçkilərdə iştirak etmək hüququ. Pasportları olan Qarabağ erməniləri daimi qeydiyyata alınsa, elektoratımız xeyli artacaq". O vurğulayıb ki, Ermənistanda belə bir atmosfer formalaşmalıdır ki, Qarabağ erməniləri ölkənin təhlükəsizliyi baxımından Ermənistanda qalmaq qərarının ən düzgün qərar olduğunu başa düşsün. Amma proseslər bunun əksini göstərir. Qarabağdan olan ermənilərin Ermənistanda sıxışdırılması halalrına indi daha çox rast gəlinir. Onlar Pşainyan iqtidarı üçün də təhdid hesab olunurlar. Qarabağda mövcud olmuş separatçı rejimin "müdafiə qüvvələrinin birinci komandanı" Arkadi Karapetyan bildirir ki, onlara qarşı müxtəlif ittihamların sayı artır. O, Qarabağdan gedən ermənilərin özləri ilə silah apardığı barədə iddiaları buna sübut kimi göstərib: "Bir şeyi başa düşə bilmirəm: Qarabağ erməniləri Ermənistana necə silah gətirə bilərdi? Hər şey o qədər də asan deyil. Kim "Laçın" nəzarət-buraxılış məntəqəsindən silah keçirməyə cəhd etsə, həbs edilərdi, siz nədən danışırsınız?". O bildirib ki, ermənilər silah keçirməyə cəhd etsəydilər, azərbaycanlılar buna çox sərt reaksiya verərdi: "Dediyim odur ki, buraxılış məntəqəsindən silah gətirə bilməzdilər. Azərbaycanlılar o qədər də sadəlövh deyillər ki, Qarabağdan silah aparılmasına imkan versinlər".
Ermənistanın daxili işlər naziri Vahe Qazaryan bu fonda bildirib ki, Qarabağdan köçən ermənilərin bəzilərinə qarşı cinayət işləri açılıb və bununla Ermənistanın Milli Təhlükəsizlik Xidməti məşğul olur. Qazaryan Azərbaycanın Qarabağ bölgəsindən Ermənistana müəyyən miqdarda silah və hərbi sursat daşındığını qeyd edib. Ermənistanın "Qraparak" nəşri isə başqa bir məqama diqqət edir: "Ermənistana köçən bir çox ermənilərin gündəlik çörək problemi ilə üzləşdiyi indiki mərhələdə parlament deputatları onsuz da yüksək olan maaşlarına əlavə olaraq mükafatlar alırlar. Yalnız "Şərəfim var" fraksiyasının üzvləri aldıqları mükafatları Qarabağdan gələnlərə verəcəklərini açıqlayıblar. Amma bu da olmayıb. Belə hal Qarabağdan gələnlərin başqa ölkələrə üz tutmasına səbəb olur. Ermənistan hökuməti Qarabağdan köçən ermənilərə "qaçqın" statusu verib. Bu da köç üçün şərait yaradır. Həm də Ermənistan hakimiyyətinin bu addımı Qarabağ sakinləri arasında ikili fikirlərə səbəb olub. Onların bəziləri belə bir qərarı səbrsizliklə gözləyirdilər, çünki onlar Ermənistan hakimiyyətinə inanmırlar və bu status onlara istənilən ölkədən "siyasi sığınacaq" üçün müraciət etmək imkanı verəcək. Digərləri, "Qarabağın gələcəyi"nə ümidini itirməyənlər isə ümidsizliyə qapılıblar. Onlar düşünürlər ki, Nikol Paşinyan yaxın vaxtlarda "Qarabağın statusu" və köç edən şəxslərin geri qayıtması məsələləri ilə məşğul olmaq fikrində deyil, əksinə, baş ağrısından qurtulmağa çalışır və belə bir status verməklə, Ermənistanı yaxın gələcəkdə başqa ölkələrdə məskunlaşacaq Qarabağ sakinlərindən "azad" görməyə ümid edir. Yanaşma belədir ki, adam yoxdursa, problem də yoxdur".
Tahir TAĞIYEV
