Mübariz Göyüşlü: "Separatizm simvolu olan "Tatik və Papik"lə bağlı şoular quraşdıran ermənilər dünyaya növbəti yalanı car çəkmək istəyirlər"
Azərbaycanın keçirdiyi lokal antiterror əməliyyatından sonra baş verənlər məlumdur, Qarabağdan ermənilərin əksəriyyəti könülü şəkildə Ermənistana köçdü. Bundan əvvəl olduğu kimi, sonra da ermənilər "tarixi abidələri" barədə nağıllar, şoular yaratmağa başlayıblar.
Xankəndidə Azərbaycan Bayrağı ucaldıqdan sonra separatçıların tör-töküntülərinin ortalıqdan yığışdırılması zərurətə çevrildi. Bildiyimiz kimi, separatçılar Xankəndidə və başqa yerlərdə sələflərinə "abidə" ucaltmışdılar. Sovet dövründə Azərbaycanın puluna inşa etdikləri abidələr də olub ki, onlardan biri də Xankəndinin girişində qoyulan "Tatik və Papik" abidəsidir ki, onu sonradan separatçılığın simvoluna çevirdilər.
Erməni mediası haray salıb ki, Azərbaycan dövləti "Tatik və Papik" ("Biz və bizim dağlar", "Nənə və baba) abidəsini sökür. Heç bir tarixi əhəmiyyəti olmayan separatizim qalığı olan bu "məşhur" abidə ətrafında ajiotaj yaradıblar. Guya ki, o, "tarixi abidə"dir və oradan götürülsə dünya dağılar...
Ermənistan Xarici İşlər Nazirliyinin keçmiş mətbuat katibi Anna Naqdalyan özünün "Facebook" səhifəsində yazır ki, noyabrın 1-i Xankəndidə "Biz və bizim dağlar" abidəsinin quraşdırılması günüdür. "Nənə və baba" adlı sevimli abidəmiz 1967-ci ildə ucaldılmışdı".
Bu "abidə"nin Azərbaycanın vəsaiti hesabına qoyulduğunu dilə gətirməyən Naqdalyan "Arsax" deyə sayıqlayıb. Onun iddiasına görə, polşalı bloger Tomaş Buçek öz Facebook səhifəsində bildirib ki, guya Azərbaycan Prezidenti İlham Əliyev "Artsaxın" "simvolu" - "Biz və bizim dağlar" abidəsinin sökülməsi barədə tapşırıq verib. Guya Buçekə bu barədə Almaniyada yaşayan azərbaycanlı müxalifətçi bloger məlumat verib.
Yeri gəlmişkən vurğulayaq ki, Buçek erməni lobbisinin çoxdan satın aldığı "bloger"dir, o həmişə ermənipərəst mövqeyi ilə seçilib. Ona görə də, onun yazdıqlarının heç bir əhəmiyyəti, çəkisi yoxdur. O sadəcə saxta erməni propoqandasını yürüdür və əvəzində pulunu alır.
Əvvəla, hələ dövlət səviyyəsində o "abidə" ilə bağlı bir fikir yoxdur, amma Azərbaycan ictimaiyyətinin tələbi odur ki, separatizmin simvolu olan "Biz və bizim dağlar" oradan götürülməlidir, çünki o, saxta bir mahiyyəti özündə ehtiva edir. Onu ermənilər o vaxt ona görə qoyublar ki, Qarabağda yerli əhali olduqlarını "sübut etsinlər", amma alınmadı, çünki onların saxta abidələri gerçəkiyi inkar etmək gücündə deyil. "Marağa-150" abidəsini özləri məhv etdilər, çünki o onların Qarabağa gəlmə tarixlərini əks etdirirdi.
"Onlar "Abidələrimiz dağıdılır" yalanı ilə dünyanı aldatmaq məqsədi güdürlər"
Ermənilərin "Tatik və Papik" ətrafında şou yaratmalarına münasibət bildirən Müasir İnkişaf Birliyinin sədri Mübariz Göyüşlü "Bakı-Xəbər"ə şərhində bildirdi ki, ermənilər hər bir məqamdan istifadə edib özlərini "yazıq", "bədbəxt" bir toplum kimi dünyaya təqdim etmək istəyirlər. "Bu cür manipulyasiyaların və şouların üzərində öz məkrli siyasi maraqlarını təmin etmək istəyirlər. Onlar həmişə ən kiçik bir şeydən yapışıb hay-küy salırlar. Onlar tarixdə baş verməyən uydurma "erməni soyıqrımı" şousunu illərdir ki, dünyaya təqdim edirlər və onun üzərindən öz ideoloji planlarını həyata keçirmək istəyirlər. Türkiyəyə qarşı əsassız təzminat və əsassız ərazi iddialarını gerçəkləşdirmək niyyətindədirlər. İndi də yeni bir mövzu tapıblar ki, guya Azərbaycan onlara qarşı "etnik təmizləmə" həyata keçirib, onları zorla qovub və sair. Bu kimi saxta məlumatlar yaymaqla beynəlxalq ictiami rəyi çaşdırmağa çalışırlar. Bununla da Azərbaycana qarşı haqsız təzyiqlərin artmasını istəyirlər. Separatizm simvolu olan "Tatik və Papik"lə bağlı şoular quraşdıran ermənilər dünyaya növbəti yalanı car çəkmək istəyirlər. Onlar "Abidələrimiz dağıdılır" yalanı ilə dünyanı aldatmaq məqsədi güdürlər. Hesab edirəm ki, onlar Azərbaycana qarşı əsassız "təzminat" iddiasına da düşə bilərlər. Onlardan nə desən gözləmək olar" - deyə M.Göyüşlü qeyd etdi.
Xankəndi Azərbaycan ərazisidir deyən M.Göyüşlünün sözlərinə görə, bu "abidə" də Azərbaycan ərazisindədir, onun sökülməsi, yaxud qalması ilə bağlı qərarı da Azərbaycanın müvafiq qurumları verə bilər. "Bu, Azərbaycan Prezidentinin və müvafiq qurumların səlahiyyəti çərçivəsində olan bir məsələdir. Burada söhbət "erməni irsi"nin "dağıdılmasından" getmir. Bizim ərazidə erməni irsi yoxdur. Buna görə də, hansısa fantastik rəylər formalaşdırmağa ehtiyac yoxdur. Onlar bunu formalaşdırmaq istəyirlərsə yenə də özlərini aldadırlar. Qarabağ Azərbaycanın suveren ərazisidir və orada istənilən fəaliyyəti həyata keçirməkdə sərbəstdir. Orada olan hansı "abidənin" mədəni abidə sayıldığı, hansının qalıb-qalmayacağı barədə qərarı Azərbaycan hökuməti verəcək. Ermənilər xaricdə nə yazırlar yazsınlar. Onların yazdıqları bizim siyasətimizə, planlarımıza, görəcəyimiz işlərə heç cür təsir edə bilməz. Biz bu məsələlərdə qərarlı və qətiyyətliyik" - deyə M.Göyüşlü qeyd etdi.
Leyla QARAXANLI
