Bir neçə gün əvvəl millət vəkili Vahid Əhmədovun bloger Mehman Hüseynova verdiyi müsahibə geniş rezonansa səbəb olub. O, müsahibəsində parlamentdə və cəmiyyətdə bir sıra neqativ hesab etdiyi hallara toxunub.
Vahid Əhmədovun səsləndirdiyi fikirlər parlamentdə geniş müzakirə edilib və deputat həmkarları onun ünvanına sərt ittihamlar səsləndiriblər. Milli Məclisin iclasında deputat Fəzail Ağamalı bunları deyib: “Bu yaxınlarda həmkarımız Vahid Əhmədov mətbuata xoşagəlməz müsahibə verib. Bloqerin suallarının təsiri altına düşən həmkarımız dövlətin həyata keçirmiş olduğu fundamental məsələlərə şübhə toxumu səpməyə çalışıb. Məni narahat edən millət vəkilinin Azərbaycan dövlətçiliyinə təhdidləri, qərəzli münasibətləridir”.
Parlamentin sədr müavini Fəzail İbrahimli bildirib ki, Vahid Əhmədovun tələyə düşdüyü ilə bağlı səslənən fikirlərlə razı deyil: “Qətiyyən bununla razı deyiləm. Vahid müəllim tələyə düşən adam deyil. Vahid müəllim nə eləyirsə, bilərək edir, nə danışırsa, düşünür danışır. Bu təsadüfi hadisə deyil. Adətən, dövlətin, millətin çətin günlərində ağsaqqallara böyük ehtiyac duyulur. Bu çətin məqamlarda onların sözünə, nəfəsinə böyük ehtiyacımız var, çox təəssüf ki, geniş həyat təcrübəsi, bütün hökumətlərdə üzdə olan Vahid müəllim bu gün özünü müzakirə obyektinə çevirib. Deyir ki, 3 deputatdan başqa hamı saxtakardır. Niyə mənim heysiyyətimə toxunursan? Qardaş, adama deyərlər ki, bəyənmirsən, oturma da, qəbul etmirsənsə, vicdanın bu şeylərə dözmürsə, açıq şəkildə qoy mandatını, çıx get. De ki, mən bacarmadım burada”.
Millət vəkili Razi Nurullayev də Vahid Əhmədovu tənqid edib: “Vahid Əhmədovun tərbiyəsiz bir şəxsə müsahibə verməsini, orada deputatların aşağılanmasına rəvac verməsini şiddətlə qınayıram. Onun bu müsahibəsini və fikirlərini Parlamentə və onun deputatlarına qarşı açıq-aydın təhdid kimi qiymətləndirirəm.
O tərbiyəsiz şəxs bir neçə ay öncə parlamentin önündə video çəkib göstərmişdi. Bu, açıq-aydın ən eybəcər təhqirdir. Belə çıxır ki, deputat Vahid Əhmədov da onunla razıdır. Bu gündən Vahid Əhmədovu onun təhqir, təhdid və şantaj şəriki sayıram”.
Deputat Vahid Əhmədov Milli Məclisin iclasında əleyhinə səslənən fikirlərlə belə münasibət bildirib:
“Birincisi, mən uzun müddətdir Milli Məclisdə təmsil olunan və müxtəlif illərdə vəzifələrdə çalışan şəxs kimi, həmişə dövlətin yanında olmuşam, dövlətin mövqeyini müdafiə etmişəm, yenə də müdafiə edirəm. Burada Fəzail Ağamalı təklif etdi ki, məsələyə İntizam Komissiyasında baxılsın. Etiraz etmirəm, baxılsın. Mən orda da bütün suallara cavab verməyə hazıram. Millətim də görər ki, mən orda dövlətin, millətin yanında olan insanam”.
Ardınca V.Əhmədov bu müzakirələrin düzgün olmadığını bildirib. Spiker Sahibə Qafarova “Vahid müəllim, o sizin öz fikrinizdir, burda deputatlar çıxışa yazılıblar, mən söz verməliyəm”, reaksiyasını verib.
Sahibə Qafarova bildirib ki, məsələyə İntizam Komissiyasında baxılacaq.
Millət vəkili Ceyhun Məmmədov isə “Bakı-Xəbər”ə açıqlamasında bildirdi ki, deputatlar parlamentdə bu məsələyə kifayət qədər toxunublar: “Vahid Əhmədovun səsləndirdiyi fikirlər doğrudan da təəccüb və təəssüf doğurur. Parlamentin bir üzvü kimi Vahid Əhmədovun özünün də təmsil olunduğu qurum barədə belə aşağılayıcı ifadələr işlətməsi yolverilməzdir. Biz bütün hallarda öz çıxışlarımızda dövlətçilik maraqlarını qorumalıyıq. Dövlət olaraq hansısa sahədə problemlərimiz ola bilər. Onların aradan qaldırılması istiqamətində ciddi işlər görülür. Hazırda əsas diqqət işğaldan azad edilən rayonların bərpasına yönəlib. Gecə-gündüz orada iş gedir. Parlamentdə yalnız 2-3 deputatın fəaliyyətini təqdir edib, digərlərini şübhə altına almaq, Milli Məclisdəki partiyaların fəaliyyətinə kölgə salmaq, seçkilərdə səslərin necə toplanması ilə bağlı yanlış təsəvvürlər formalaşdırmaq düzgün yanaşma sayıla bilməz. Biz parlamentin fəaliyyətinə belə qiymət verəndə bunu başqa yerlərdən də izləyirlər. Vahid Əhmədov çıxışında dedi ki, parlamentdəki çıxışlar güya təşkil edilir. Bu doğru deyil. Yaxşı olardı ki, Vahid Əhmədov öz müsahibəsinə bir daha baxıb, onu ətraflı təhlil etsin. Bütün parlamentin fəaliyyəti şübhə altına alınırsa, qanunverici orqanın ünvanına bir çox fikirlər səslənirsə buna mütləq reaksiya olmalıdır. Çıxışa kompleks yanaşanda başqa məqamlar da ortaya çıxır. Dövlətin Televiziyası niyə o formada müqayisə olunmalıdır? Vahid Əhmədovun fikirləri göz qabağındadır və ona verilən reaksiya da təbiidir. Burada hansısa əlavə detallar axtarmağa dəyməz”.
Məhəmmədəli QƏRİBLİ
