“Daşnaksütyun” partiyasının Brüsseldə yerləşən Avropa ofisi Avropa İttifaqının idarəetmə strukturları ilə paralel olaraq 14 Avropa ölkəsindəki “Ay Dat” komitələrinin işini xarakteri və nəticələrinə görə əlaqələndirir. Bu arada erməni mediası yazır ki, guya bu qurumun fəaliyyəti Azərbaycan təbliğatının və təhdidlərinin hədəfinə çevrilir.
Bunu onunla əsaslandırmağa çalışırlar ki, guya Azərbaycanın “Ay Dat”ın Avropa ofisinə qarşı mübarizəsi çoxsaylı korrupsiya təzahürləri ilə tanınır. Onlardan biri budur: Avropanın müxtəlif nəşrləri onun fəaliyyətini və Avropadakı “Ay Dat” ofisinin fəaliyyətini gözdən salmaq üçün ofis və onun rəhbəri Qaspar Karapetyan haqqında vaxtaşırı yalan məlumatlar dərc edirlər. Guya bununla bağlı yazılar Azərbaycanın sifarişi ilə yazılır. 2023-cü il martın 17-də Belçikanın “Le Vif” nəşrində Yaxın Şərq üzrə ekspert Sebastyan Busuanın məqaləsi dərc olunub. Məqalədə “Ay Dat”ın Avropa ofisi və onun rəhbəri Qaspar Karapetyan korrupsiya sövdələşmələrində və avropalı məmurlara rüşvət verməkdə ittiham edilir. Həmçinin, “Le Vif” nəşrində 14 aprel tarixində bununla bağlı növbəti yazı dərc olunub. Məlum olub ki, Q. Karapetyan avropalı məmurları rüşvətlə ələ alır.
“Ermənilər nə qədər inkar etsələr də, onların lobbi qurumları korrupsiya və digər qaranlıq fəaliyyətlərin tam ortasındadı”
Məsələyə münasibət bildirən AMİP funksioneri Əli Orucovun fikrincə, ermənilər nə qədər inkar etsələr də, onların lobbi qurumları korrupsiya və digər qaranlıq fəaliyyətlərin tam ortasındadı: “Məgər, Avropanın bəzi qurumlarının Azərbaycanla bağlı qərəzli qətnamələr qəbul etməsi təsadüfdür? Əsla yox. Bu, Avropadakı erməni lobbi təşkilatlarının korrupsiya əlaqələrindən irəli gəlir. Onların da başında “Ay Dat”ın Avropa ofisinin rəhbəri Qaspar Karapetyan dayanır. O Karapetyan ki, bütün bu qaranlıq fəaliyyətlərin birbaşa mərkəzində durur. İstər Avropa Parlamentində, istərsə də AŞPA-da bir çox deputatları pulla ələ alaraq Azərbaycana qarşı qərəzli qətnamələrin qəbul olunmasına nail olurlar. Zatən Avropa təsisatlarının korrupsiyaya bulaşması yeni deyil. Ermənistan məhz bu kimi çirkin vasitələrlə onları ələ alaraq ölkəmizə qarşı yönəldir. Bu baxımdan “Le Vif” nəşrində dərc olunan məqalələr reallığı əks etdirir. Hələ bu, belə baxanda buz dağının görünən çox kiçik hissəsidir. Avropada hansı mətbuat orqanı həqiqəti yazırsa, erməni lobbisinin çirkin fəaliyyətini ifşa edirsə, o dəqiqə ermənilər ona damğa vururlar. Guya Azərbaycanın sifarişi ilə belə yazılar dərc olunur. Əslində ermənilər nəinki korrupsiya fəaliyyəti ilə, həm də silah qaçaqmalçılığı və digər bu kimi qanunsuz fəaliyyətlə məşğuldular. Erməni diaspor təşkilarları da bütün bu qeyri-leqal fəaliyyətlərin tam ortasındadılar. Bu baxımdan hesab edirəm ki, deyilənlər reallığı əks etdirir və Q.Karapetyanın ifşa olunması baxımından mühüm əhəmiyyətə malikdir”.
Vidadi ORDAHALLI
