Laçın yolunda Azərbaycan sərhəd nəzarət-buraxılış məntəqəsi qurandan sonra ABŞ-da ermənipərəst konqresmenlər Qarabağın müstəqilliyinin tanınması haqqında qanun layihəsi hazırlayırlar.
Belə ki, ermənipərəst konqresmen Adam Şiff Qarabağın müstəqilliyinin tanınması haqqında qanun layihəsi hazırlayıb. Qanun layihəsi qəbul edildiyi təqdirdə bu, ABŞ-ın Dağlıq Qarabağın öz müqəddəratını təyin etmək hüququnu tanımağa hazır olması demək olacaq. Qanun layihəsini Bob Menendes, Nensi Pellosi və s. kimi bir qrup məşhur və nüfuzlu konqresmenin dəstəkləyəcəyi gözlənilir. İlkin müzakirələr Konqres komitəsi səviyyəsində keçiriləcək. Təsdiq edildiyi təqdirdə sənəd bütün Konqresin təsdiqinə təqdim ediləcək.
Eyni vaxtda prezident Cosef Baydenin qondarma “erməni soyqırımı” ilə bağlı müraciətində kəskin fikirlər yer alıb. Müraciətdə Bayden əməllicə tarixi saxtalaşdırıb: “1915-ci il aprelin 24-də Osmanlı hakimiyyəti Konstantinopolda erməni ziyalılarının nümayəndələrini və tanınmış ictimai xadimləri həbs etdi ki, bu da erməni icmasına qarşı sistemli zorakılıq kampaniyasının başlanğıcı oldu. Sonrakı illərdə bir milyon yarım erməni deportasiya edilmiş, öldürülmüş və ya ölüm yoluna göndərilmiş, bu faciə erməni ailələrinin nəsillərində əbədi iz qoymuşdur”.
Görünən odur ki, ABŞ hakimiyyətində ermənipərəstliyin yeni dalğası başlayıb. Maraqlıdır, bu nə ilə bağlıdır?
“Baydenin qondarma “soyqırımla” bağlı ifrata varması qarşıdan gələn seçkilərə hesablanıb”
Məsələyə münasibət bildirən siyasi ekspert Elşad Həsənovun fikrincə, Azərbaycanın öz ərazisində nəzarət-buraxılış məntəqəsi qurması ermənipərəst dairələri bərk narahat edir: “Əvvəla, Azərbaycanın Laçın yolunun başlanğıcında nəzarət-buraxılış məntəqəsi qurması tamamilə qanunidir. Çünki bu, bizim suveren haqqımızdır. Üstəlik, son dövrlər Ermənistandan Qarabağa qanunsuz olaraq silah daşınır. Azərbaycan dəfələrlə xəbərdarlıq etsə də, diplomatik səylər göstərsə də erməni tərəfi buna məhəl qoymayıb. Belə olan halda Azərbaycan Ordusu lokal əməliyyatlar keçirərək torpaq yolları bağlamalı oldu. Məsələ ondadır ki, 12 dekabrda ekoaktivistlərimizin aksiyasından sonra Ermənistan sülhməramlılar vasitəsilə torpaq yollarla silah daşımasını təmin edirdi. Ona görə də Azərbaycan beynəlxalq hüquqa dayanaraq gərəkən addımları atmalı oldu. Laçın yolunun başlanğıcında nəzarət-buraxılış məntəqəsi açdı və bu, aprelin 23-dən fəaliyyət göstərir. Bu da bəzi dairələri narahat etməyə başladı. Ermənistanın havadarı olan Birləşmiş Ştatlar, Fransa bununla bağlı hay-küy salmağa başladılar. Konqresdə onsuz da ermənipərəst qrup var idi. Ancaq Azərbaycanın məlum addımlarından sonra həmin ermənipərəst konqresmenlər daha da həyasız mövqedən çıxış edərək separatçıların tanınmasını gündəmə gətirməyə cəhd edirlər. Düzdür, ermənipərəst konqresmenlərin belə bir niyyəti yeni deyil. Ötən ilin sentyabrında Nensi Pelosinin Ermənistana səfəri zamanı bu məsələ qaldırıldı. İndi isə Laçın yolunda nəzarət-buraxılış məntəqəsinin yaradılmasından bir girəvə kimi istifadə edib bu təxribatı reallaşdırmaq istəyirlər. Ancaq ermənipərəst konqresmenlərin bu cür cəhdləri heç bir nəticə verməyəcək. Ona görə ki, Azərbaycan bu məsələdə haqlı tərəfdir. Baydenin qondarma “soyqırımla” bağlı ifrata varması qarşıdan gələn seçkilərə hesablanıb. Son aylar Demokratlar Partiyasının nüfuzu xeyli aşağı düşüb. Bayden qarşıdan gələn prezident seçkilərində erməni əsilli ölkə vətəndaşlarının səsini almaqdan ötrü müraciətində həqiqətə uyğun olmayan fikirlər səsləndirir. Onlar yaxşı bilir ki, Türkiyədə ermənilər soyqırıma məruz qalmayıb. Sadəcə, bundan Türkiyəyə qarşı bir təzyiq vasitəsi kimi istifadə etmək istəyirlər”.
Vidadi ORDAHALLI
