Ermənipərəst konqresmenlər yenə iş başındadır. ABŞ konqresmeni Adam Şiff Konqresdəki həmkarlarını ona qoşulmağa çağırır və iddialarına görə, Ticarət Departamentindən Azərbaycanın Dağlıq Qarabağı 125 gündən artıq blokadada saxladığını və davam etdirdiyini nəzərə alaraq, niyə Amerikanın yüksək güclü tüfənglərinin Azərbaycana satılmasını nəzərdən keçirdiyini izah etməyi tələb edib.
Bu barədə Amerika Erməni Komitəsi ABŞ Konqresinin Azərbaycana silah satışının əleyhinə olan bütün üzvləri dəstəklədiyini bildirib. A.Şiff öz həmkarlarını ticarət katibi Gina Raimondoya “Azərbaycana öldürücü silahların göndərilməsi üçün ixrac lisenziyası ilə bağlı hər hansı sorğuların statusu barədə Ticarət Departamentindən əlavə məlumat tələb edən” məktubu imzalamağa çağırıb. Konqres üzvləri aprelin 21-nə qədər nazir Raimondoya ünvanlanmış məktubu imzalamalıdırlar.
Görünən odur ki, ermənipərəst konqresmenlər ABŞ-Azərbaycan əlaqələrinin genişlənməsinə əngəl yaratmaq üçün bütün vasitələrə əl atırlar.
“Birləşmiş Ştatlar Cənubi Qafqazda Azərbaycanla bağlı strateji maraqlarını erməni lobbisinə qurban verməyəcək”
Sözügedən məsələ ilə bağlı fikirlərini “Bakı-Xəbər”lə bölüşən AMİP-in sədr müavini Afsəddin Nəbiyev hesab edir ki, ermənipərəst konqresmənlərin bu kimi pozucu fəaliyyəti Birləşmiş Ştatların Azərbaycanla bağlı strateji maraqlarına mane ola bilməz: “Ermənipərəst konqresmenlər ABŞ-da tarixin əks burulğanında yenidən ermənilərin "yazıq" obrazını yaratmağa cəhd edirlər. Tarix siyasi elmdir. Otuz bir il geriyə qayıdıb ermənilərin Azərbaycan dövlətini Birləşmiş Ştatlar hökumətinin yardımından xaric etməsini bir daha xatırlatmaq istəyirəm. İstənilən müqayisə qüsurlu ola bilər. Ancaq ermənilərin niyyəti və xisləti dəyişməz olaraq qalır. Elə o vaxt da, 1992-ci ildə ABŞ-da ermənilər dünyaya səs salmışdılar ki, Azərbaycan Ermənistanı blokada şəraitində saxlayır. Halbuki, Ermənistan silahlı qüvvələri böyük ağalarının yardımı ilə Azərbaycan iki rayonunu - Şuşa və Laçını işğal etmişdilər. Ancaq 1992-ci ilin oktyabrında "Azadlığı Müdafiə Aktı" 907 - ci bölmənin qəbulu zamanı Konqresdə ermənipərəst üzvlərinin təkidi ilə bu qətnamənin qəbuluna nail oldular. Bəs bu necə blokada idi ki, blokadada olan dövlət, həm də işğal həyata keçirirdi? Nonsensdir, deyilmi?! Bunu ona görə xatırladıram ki, o dövrlərdə heç bizim səfirliyimiz ABŞ-da fəaliyyətə başlamamışdı. Görünən odur ki, tarix yenidən təkrarlanır, ancaq hazırkı tarix o tarix deyil. Bu gün ermənilər hərbi savaşda Azərbaycan Ordusuna məğlub olduqları kimi, informasiya savaşında da gülünc duruma düşüblər. Bu məğlubiyyəti kompensasiya etmək üçün Konqresdə ermənipərəst həmkarları vasitəsilə diqqəti özlərinə cəlb etmək istəyirlər. Qarabağ necə blokada şəraitindədir ki, hazırda hər gün onlarla yük və minik avtomobilləri bütün dünyanın media orqanlarının gözü qarşısında Ermənistandan Qarabağa və yaxud əks istiqamətə maneəsiz hərəkət edir? Axı bütün bunlar təkcə media üçün deyil. Bir çox dövlətlərin Azərbaycanda fəaliyyət göstərən səfirlik və konsulluq nümayəndələri o bölgələrdə olmaqla əyani olaraq bunu müşahidə edirlər. Görünən odur ki, ermənilər zəlil duruma düşdüklərini anlayaraq yenidən Azərbaycana qarşı çirkin niyyətlərindən əl çəkmək niyyətində deyil. Ermənilər düşünməsinlər ki, ABŞ-dan Azərbaycana silah ixracına qadağa qoyula bilər. Hətta qadağa qoyulsa belə, bunu böyük faciə kimi qəbul etmərik. Büdcəmiz imkan verdiyi üçün, bizə lazım olan silahları istənilən ölkədən idxal edə bilərik. Ancaq bu gün bizim əsas işimiz, xüsusilə diplomatlarımızın erməni yalanlarını ABŞ-ın siyasi dairələrinin diqqətinə çatdırmaq olmalıdır. Biz erməni yalanlarını bütün dünyada ifşa etməkdə davam etməliyik. Bununla belə, Birləşmiş Ştatlar Cənubi Qafqazda Azərbaycanla bağlı strateji maraqlarını erməni lobbisinə qurban verməyəcək. Bu, hazırkı reallıqlar fonunda mümkün olan iş deyil”.
Vidadi ORDAHALLI
