"Bugünkü Azərbaycan Ordusu Zəfər çalmış eyni Azərbaycan Ordusundan qat-qat güclüdür". Bu fikirləri Prezident İlham Əliyev aprelin 18-də Salyan rayonunda Azərbaycan Televiziyasına müsahibəsində deyib.
Prezident bildirib ki, müharibədən sonrakı iki il yarım ərzində də ordu quruculuğu məsələlərinə çox böyük diqqət göstərilib.
Ali Baş Komandan tam əminliklə deyib ki, bugünkü Azərbaycan Ordusu 2020-ci ildə Zəfər çalmış eyni Azərbaycan Ordusundan qat-qat güclüdür: “Ancaq eyni zamanda, yenə də demək istəyirəm, biz hər bir vəziyyətə hər an hazır olmalıyıq”.
Prezidentin "bugünkü Azərbaycan Ordusu Zəfər çalmış Azərbaycan Ordusundan qat-qat güclüdür" bəyanatının nə kimi təsiri və əhəmiyyəti var?
“Bu gün tələbat müasir silahlaradır ki, Azərbaycan ən müasir silahları alıb silah arsenalını daha da genişləndirir"
Hərbi ekspert Tərlan Eyvazov bizimlə söhbətində bildirdi ki, Prezidentin mesajı çox vacib və əhəmiyyətlidir: "Əvvəla, bu mesaj təkcə Ermənistana deyil, Azərbaycana qarşı düşmən mövqedə dayanan digər qüvvələrə də aiddir. İkincisi də, qeyd etdiyim kimi, bu çox vacib bəyanatdır. Vətən savaşı bitəndən sonra Prezident bildirdi ki, ordumuzu daha da gücləndirməli, daha da böyütməliyik, onu daha peşəkar formaya, yəni Türkiyə - NATO stilinə keçirməliyik. Ordunun büdcəsi yenə də artan xətlə davam etdi.
Sözün açığı, hərbi ekspertlər də, hərbidən yazanlar da bundan təəccübləndilər. Halbuki, ictimaiyyət əsasən düşünürdü ki, artıq Vətən müharibəsi baş verdi, ordu qarşısında duran əsas məsələni həll etdi, ola bilsin, hərbi büdcə bir az azaldıldı və vəsait başqa sahələrə yönəldildi. Ancaq bu baş vermədi. Bir müddətdən sonra Ermənistanın istər təxribat xarakterli bəyanatları, istərsə həyata keçirdiyi təxribatlar və onun arxasında dayanan İranın açıq təxribatları göstərdi ki, Prezident haqlı imiş.
Hamıdan çox informasiyaya malik olduğunu üçün, bütün işlərin içində olduğuna görə, o belə addım atmaqla düzgün iş görüb. Belə ki, Azərbaycan ordusu ön cəbhələrdə olan hərbi hissələrin sayını artırdı. Bunlar əsasən Komondos birlikləridir. Ondan əlavə olaraq xüsusi təyinatlılarının da artım olub. Həmçinin, Azərbaycan ordusu Vətən savaşına girərkən əsasən İsraildən və digər ölkələrdən alınan silah arsenalını dövlət bir qədər də zənginləşdirib, genişləndirib. Onların bir çoxu haqda ümumiyyətlə məlumat verilmir. Eyni zamanda öz silah sənayemizdə də bunların istehsalı ilə məşğul olunur. Vətən savaşında nə qədər hazırlıq olsa da əsas döyüş prosesində müəyyən çətinliklərin və nöqsanların da olması üzə çıxırdı, o nöqsanların da aradan qaldırılması üçün müvafiq tədbirlər görülür.
Yəni əlçatmaz yerlərə yolların çəkilməsi, orda hərbi şəhərciklərin salınması, maaşların artırılması, yeni hərbi hissələrin yaradılması, onların ən müasir silahlarla təchiz edilməsi həyata keçirilir. Bu gün tələbat müasir silahlaradır ki, Azərbaycan ən müasir silahları alıb silah arsenalını daha da genişləndirir. Bizim üçün hədəf Ermənistan deyil, göründüyü kimi, bizim bu qələbəmizdən əndişələnən, onu gözü götürməyən qüvvələr meydana çıxır. Təbii ki Azərbaycan ordusu güclü olmalıdır və güclü ordu dövlətin dayağıdır. Dövlətin və ordunun da güclü olması, şübhəsiz ki, onun əsgərinin tam şəkildə təchiz olunması, təlimlərdə iştirak etməsi, müasir dünya standartlarına uyğun olaraq hazırlanması və təchiz edilməsidir"-deyə T.Eyvazov bildirdi.
Əli TURABOV
