Ermənistan tərəfi birmənalı olaraq Qarabağın Azərbaycan ərazisi olduğunu qəbul etməlidir.
Bu barədə Azərbaycan Xarici İşlər Nazirliyinin Ermənistan XİN-in Azərbaycan əleyhinə 19 aprel tarixli bəyanatına dair şərhndə deyilir.
Şərhdə qeyd edilir ki, Azərbaycan tərəfi Azərbaycan ərazisində yaşayan erməni sakinlərin reinteqrasiyası prosesində qərarlıdır: “Ermənistan tərəfi bu prosesə müdaxilədən əl çəkməlidir. Azərbaycan ərazisində, Azərbaycan qanunları çərçivəsində yaşamaq istəyən hər bir şəxsin hüquq və azadlıqlarının təmin olunmasına zəmanət verilir. Azərbaycan tərəfi ilk təşəbbüsü irəli sürən tərəf kimi, ərazi bütövlüyü və suverenlik prinsipləri əsasında Ermənistanla sülh sazişini imzalamağa hazırdır. Bunun üçün, Ermənistan tərəfi Azərbaycana qarşı ərazi iddialarından əl çəkməli və birmənalı olaraq Qarabağın Azərbaycan ərazisi olduğunu qəbul etməlidir”.
Ümumilikdə, Azərbaycan tərəfinin məlum yanaşması əsl mövqedir. Əgər Ermənistan doğrudan sülh müqaviləsini imzalamağa hazırdırsa, o zaman belə bir bəyanat versin və göstərsin ki, Azərbaycanla sülh sazişi imzalamağa hazırdır. Üstəlik, Prezident İlham Əliyevdən sonra XİN də bəyan edir ki, Qarabağın Azərbaycan ərazisi olduğunu Ermənistan qəbul etməlidir. Ancaq Ermənistan hansı prinsiplər əsasında sülh sazişini imzalamağa hazır olduğunu hələ də bəyan etməyib.
“Ermənistan səmimidirsə, Paşinyan səviyyəsində Qarabağın Azərbaycan ərazisi olduğunu etiraf etməlidir”
Məsələyə münasibət bildirən politoloq Tural İmayılovun fikrincə, Ermənistan Azərbaycanla sülh sazişinin imzalanmasında həqiqətən də səmimidirsə, mütləq şəkildə Qarabağın bizim ərazimiz olduğunu rəsmən tanımalıdır: “Ancaq hələ ki, Ermənistanın timsalında biz bunu konkret görmürük. Ermənistan rəsmi olaraq bunu bəyan etməyə tələsmir. Son dövrlər Paşinyan tərəfindən Qarabağla bağlı müxtəlif spekulyativ açıqlamalar verilir, amma hələ də nə Nikol, nə də onun komandasının dilindən bununla bağlı hansısa konkret mesajlar yoxdur. Eyni zamanda nəzərə almaq lazımdır ki, sülhlə bağlı səmimilik o zaman mümkün olacaq ki, Ermənistan şərti sərhədlərdə təxribatlar törətməkdən əl çəksin, sözügedən təxribatlara birdəfəlik son qoysun. Əfsuslar olsun ki, bu istiqamətdə də hansısa bir irəliləyiş müşahidə olunmur. Əksinə, Ermənistan yeni-yeni təxribatlara rəvac verən addımlar atır. Yalnız təxribatlara son qoyulduğu təqdirdə biz ikili münasibətlərdə hansısa irəliləyişlərə nail ola bilərik. Yoxsa başqa cür mümkün deyil. Ermənistanın sülh üçün təməl prinsiplər olan bir sıra məsələlərdə vaxt uzatmağa çalışdığını müşahidə edirik. Məsələn, sülh üçün mütləq şəkildə sərhədlərin delimitasiyası və demarkasiyası olmalıdır. Ancaq biz görürük ki, Ermənistan müxtəlif vasitələrlə bu prosesdən yayınır. Yaxud da digər önəmli məsələlər var ki, sülh sazişinin imzalanmasında vacib faktorlardan biridir. Bu məsələlərdə də rəsmi İrəvan üzərinə düşən öhdəlikləri yerinə yetirmir. Azərbaycanın sülhlə bağlı sabit mövqeyi var. Məsələ ondadır ki, Azərbaycan 5 prinsipdən ibarət olan sülh paketi təqdim edib. Düzdür, Ermənistan bu prinsipləri qəbul etdiyini bəyan edib, amma praktiki olaraq bu yöndə addımlar atmır. Üstəlik, Ermənistanın xarici güc faktorlarından asılılığı Azərbaycanla sülh məsələsində vahid bir nöqtəyə gəlməyə imkan vermir. Bu baxımdan hesab edirəm ki, sülhlə bağlı məsələlərdə Ermənistan səmimidirsə, konkret addım atmalı və Paşinyan səviyyəsində Qarabağın Azərbaycan ərazisi olduğunu etiraf etməlidir”.
Vidadi ORDAHALLI
