Sovet hərbi əks-kəşfiyyatının - "Smerş" Əks-kəşfiyyat Baş İdarəsinin yaradılmasının 80 illiyi qeyd edilir. 1943-cü ilin aprelindən 1945-ci ilin may ayına kimi xüsusi xidmət orqanları antisovet təxribat fəaliyyəti ilə məşğul olan yüz minlərlə casus, diversant, terrorçu, satqın, fərari və digər şəxsləri həbs etdi.
Yubiley tarixi ilə əlaqədar Ermənistan Zabitlər İttifaqı rus zabitlərinə təbrik məktubu ünvanlayıb. Məktubda bildirilir:
“Smerş” orqanlarının yaradılmasından 80 il keçsə də, ölkələrimiz zərərli xarici təsirlərə məruz qalmaqda davam edir. Əminik ki, əcdadlarımızın faşist infeksiyasına qarşı birgə qəhrəmancasına mübarizəsi bu gün Ermənistan və Rusiya liderlərindən birlik və qarşılıqlı dəstək tələb edir. Çox maraqlıdır ki, Ermənistan dövlət olaraq, həm faşistlərlə əlbir olub Sovet İttifaqına qarşı vuruşmuş Qaregin Njdeyə heykəl qoyur, onu ideoloq kimi qəbul edir, həm də faşistlərə qarşı amansız mübarizə aparan “SMERŞ”in yubiletini qeyd edir. Eyni zamanda məktubda bildirilir ki, güya Ermənistan da xarici təsirlərə məruz qalır. Hansı təsirdən söhbət gedə bilər ki, Ermənistanın özü bir dövlət olaraq işğalçılıqla məşğul olub, bu gün də həmin siyasəti davam etdirir?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Ermənistan cəmiyyətində iki yanaşma var: “Bir yanaşma Rusiya ilə münasibətlərin isti saxlanılması, hər addımda Rusiyaya yarınmaq, rusiyapərəst olduqlarını nümayiş etdirməkdir. Digər addım isə qərbyönümlüdür. Bu gün də qərbyönümlülər hakimiyyətin müxtəlif qollarında mühüm vəzifələr tuturlar. Ümumiyyətlə, erməni xalqını analiz edərkən onların nə qədər riyakar olduğunu yaxşı görürük. Bu, məsələnin bir tərəfidir. Digər tərəfdən isə bu fərdi xarakter erməni hökümətinin özünə də sirayət edib. Bu zərərli bir şeydir. Hökümətin dövlət sisteminin özündə bir natamamlıq var. Rusiya amilinin qabardılması, Rusiyanın maraqlarına xidmət etmək, digər tərəfdən də qərbyönümlü, iranyönümlü olmaq kimi məsələlər cəmiyyətdə ciddi parçalanmalara səbəb olur. Amma Ermənistan bunu idarə edə bilir. Öz işlərinin xatirinə istənilən formaya düşə bilirlər. Ermənistanda faşizmin təbliği yalnız tarixi saxtalaşdırmaq baxımından deyil, eyni zamanda gələcək üçün də təhlükədir. Bununla bağlı tanınmış siyasətçilər, ekspertlər həyəcan təbili çalırlar. Onların sözlərinə görə, nasistlərlə əməkdaşlıq edən şəxsin qəhrəmanlaşdırılması cinayətdir. Ermənistanın baş naziri Nikol Paşinyanın faşistlərə xidmət edən Qaregen Njdeni milli qəhrəman elan etməsinin heç də təsadüfi olmaması aydın şəkildə özünü göstərdi. Faşistlərə xidmət edən Njdenin qəhrəmanlaşdırılması, onun abidəsinin ucaldılması faşizmi təbliğ etməkdən başqa bir şey deyil. Onların sözlərinə görə, Ermənistan hakimiyyətinin bu istiqamətdə atdığı addımlar isə çox təhlükəli və yolverilməzdir”.
Ekspertin sözlərinə görə, müstəqillikdən sonra da işğalçı Ermənistanda həm keçmişdə, həm də indi hakimiyyətdə olan siyasi qüvvələrin faşizm ideologiyasından qidalandığını əks etdirən çoxsaylı faktlar var: “Tarixən erməni terrorçuluğunun yaradıcılarından olan “Daşnaksutyun”la yanaşı, işğalçı ölkədəki digər bir çox partiyalar da terrorizmi, faşizmi, ksenofobiyanı mənimsəmələri ilə seçiliblər. Onların arasında torpaqlarımızın işğalında və Azərbaycan xalqına qarşı qırğınlarda, o cümlədən Xocalı soyqırımında bilavasitə iştirak etmiş Ermənistanın sabiq prezidenti Serj Sarkisyanın rəhbəri olduğu “Respublikaçı” partiya da var. Bu partiyanın ideologiyasının əsasını da məhz Q.Njdenin ermənilərin “ali irq” olması barədə saxta “Tsexakronizm” təlimi təşkil edir. Hətta bu partiya faşist simvolikasına oxşar rəmzlər daşıyır və hakimiyyətdən biabırcasına uzaqlaşdırılan S.Sarkisyandan imtina etmədikləri kimi, respublikaçıların faşist rəmzlərindən də imtina etmək fikirləri yoxdur. Təcavüzə gəldikdə isə, bu əməli edən də Ermənistanın özüdür”.
Məhəmmədəli QƏRİBLİ
