Məlum olduğu kimi, Beynəlxalq Qırmızı Xaç Komitəsinin (BQXK) nümayəndələri bu yaxınlarda saxlanılan iki Azərbaycan vətəndaşına İrəvanda baş çəkiblər. Bu barədə BQXK-nın Ermənistandakı nümayəndə heyətinin kommunikasiya proqramlarının rəhbəri Zara Amatuni beynəlxalq mediaya açıqlamasında məlumat verib.
Bildirib ki, saxlanılan iki Azərbaycan vətəndaşı ilə təklikdə görüşülüb və onlar agentliyin vasitəçiliyi ilə ailə üzvlərinə mesaj göndəriblər.
Ancaq Amatuni əsirlərin vəziyyəti ilə bağlı açıqlama verməyib. Əsirlərin şikayətinin nədən olması, tələbi, onların sağlıq problem ilə bağlı suala cavab verməkdən məsul şəxs yayınıb.
Maraqlıdır, əsgərlərin vəziyyəti, onların şikayəti və tələbi ilə bağlı niyə açıqlama verilmir? Bu gizlilik nə dərəcədə düzgündür?
“Belə bir açıqlamanın verilməməsi Beynəlxalq Qırmızı Xaç Komitəsinin prinsiplərinə və beynəlxalq hüquq normalarına ziddir”
Siyasi şərhçi Mətin Məmmədli “Bakı-Xəbər”ə açıqlamasında qeyd etdi ki, Beynəlxalq Qırmızı Xaç Komitəsi qeyri-siyasi təşkilatdır. Bu səbəbdən də həmin təşkilat hansısa siyası məqsəd güdməməlidir: “Bu baxımdan Komitənin nümayəndəsi saxlanılan azərbaycanlı əsirlərin vəziyyəti ilə bağlı doğru-düzgün məlumat verməli idi. Bu onların vəzifə borclarıdır. Belə bir açıqlamanın verilməməsi Beynəlxalq Qırmızı Xaç Komitəsinin prinsiplərinə və beynəlxalq hüquq normalarına ziddir”.
Siyasi şərhçi hesab edir ki, Komitənin əsirlərin vəziyyəti, tələbi, şikayəti ilə bağlı məlumat verməməsi siyasi məsələlərlə bağlıdır: “Beynəlxalq Qırmızı Xaç Komitəsi tərəfsiz olmalıdır. Qeyri-siyasi məqsədlərdən irəli gələrək əsirlərin vəziyyəti, sağlıq durumu haqqında doğru-düzgün məlumat verməlidir. Onların vəziyyətinin yüngülləşdirilməsi ilə bağlı konkret fəaliyyət göstərməlidirlər. Biz onlardan bunu gözləyirik. Təəssüf ki, Komitə öz vəzifə borcunu yerinə yetirməkdən imtina etmək Azərbaycan cəmiyyətində müəyyən şübhə və suallar yaradır”.
Qeyd edək ki, Naxçıvan Muxtar Respublikasının Şahbuz rayonunun Ermənistanla sərhədboyu ərazisində əlverişsiz hava şəraitində məhdud görmə səbəbindən Azərbaycan ordusunun itkin düşmüş əsgərləri - 2004-cü il təvəllüdlü Bəbirov Aqşin Qabil oğlu və 2003-cü il təvəllüdlü Axundov Hüseyn Əhliman oğlu Ermənistan tərəfindən əsir götürülüb.
Aqşin Bəbirov və Hüseyn Axundov “Ermənistanın dövlət sərhədini qanunsuz keçməkdə, odlu silah və döyüş sursatı daşımaqda" ittiham olunurlar, onlar həbs edilib.
Günel CƏLİLOVA
