Əvvəllər Rusiya Dövlət Dumasının hakim “Vahid Rusiya” partiyasının bəzi üzvləri Azərbaycanla bağlı təxribatçı fikirlər səsləndirirdilərsə, maraqlıdır ki, indi komitə sədrləri də belə təxribatçı fikirlər səsləndirir.
Rusiya Dövlət Dumasının İnformasiya siyasəti komitəsinin sədri, “Vahid Rusiya” partiyasından olan deputatı Oleq Matveytsev Azərbaycana qarşı təxribatçı bəyanatla çıxış edib. Belə ki, Dmitri Peskovun yayılan "Rusiya, Azərbaycan və Ermənistanın Qarabağ üzrə üçtərəfli razılaşmaları vəziyyətin həlli üçün yeganə real əsasdır, onların həyata keçirilməsi zəruridir” bəyanatı ilə bağlı sualını cavablandıran Matveytsev Azərbaycanı ittiham edib. O qeyd edib ki, guya Azərbaycan Türkiyə ilə birlikdə münaqişənin davam etdirilməsində maraqlıdır: “Onlar hesab edirlər ki, tamamilə hər şeyi əldə edə bilərdilər. Lakin Rusiya ilə hesablaşmaq məcburiyyətində qaldılar. Buna uyğun olaraq dayandılar”.
Komitə sədri tutduğu vəzifə statusunu nəzərə alıb bilmirmi ki, belə təxribatçı açıqlamalar ən azından iki ölkə arasında olan strateji müttəfiqlik münasibətlərinin ruhuna uyğun gəlmir?
“Dumada deputatların, hansı fraksiyanı təmsil etməsindən asılı olmayaraq, əksəriyyətində imperiya ambisiyaları var”
Məsələyə münasibət bildirən Böyük Azərbaycan Partiyasının sədri Elşad Musayevin fikrincə, Rusiya siyasiləri, tutduqları vəzifədən asılı olmayaraq, imperiya təfəkküründən əl çəkə bilmirlər: “Onlar üçün hansısa dövlətlərarası saziş əhəmiyyət kəsb etmir. Rusiya siyasiləri kiçik dövlətlərə yuxarıdan aşağı baxırlar. Çünki imperiya təfəkkürü bunların ruhunu zəhərləyib. Rusiyada bir sıra dairələr Azərbaycanın 44 günlük müharibədə qalib gəlməsini həzm edə bilmir. Bütövlükdə, uzun illərdir Rusiyanın KİV-ləri Ermənistana informasiya dəstəyi verirlər. Baxmayaraq ki, Paşinyan Qərbə yaxın siyasi personadır. Dövlət Dumasında “Vahid Rusiya” partiyasını təmsil edən Konstantin Zatulin uzun illərdir Azərbaycana qarşı qərəzli, təxribatçı fikirlər səsləndirir. Hakim partiyadan olan deputat Vitali Milonov həm Azərbaycan əleyhinə sərsəm fikirlər səsləndirir, həm də Qarabağa qanunsuz səfərlər edir. Məgər bütün bunlar Kremlin icazəsi olmadan baş verir? Əsla yox. Rusiya kimi avtoritar ölkədə belə hallar təsadüfən baş vermir. Bütün bunlar Rusiya dövlətinin imperiya ambisiyalarından xəbər verir. Dövlət Dumasında olan deputatların hansı fraksiyanı təmsil etməsindən asılı olmayaraq, bunların əksəriyyətində imperiya ambisiyaları var. Bir vaxtlar SSRİ tərkibində olan dövlətlərin müstəqil olmasını, müstəqil siyasət yeritməsini həzm edə bilmirlər. Mövcud reallıqlarla barışmaq istəmirlər. Oleq Matveytsev də belə deputatlardan biridir. Ona görə də hesab edirəm ki, Azərbaycan belə təxribatçı açıqlamaları cavabsız qoymamalıdır. Onların da cavabını biz sahədə verməliyik. Cavab verilməyəndə həmin deputatlar daha da azğınlaşırlar. Ən nəhayət, kimin nə deməsindən asılı olmayaraq biz öz işimizdə olmalıyıq”.
Vidadi ORDAHALLI
