Ermənistan Rusiyaya qanadlı raketlərin istehsalı üçün istifadə olunan çiplər və elektron cihazlar ixrac edib. Bu barədə “The New York Times” qəzetində dərc olunan məqalədə qeyd olunur.
Məqalədə deyildiyinə görə, ABŞ və Avropa İttifaqının yüksək vəzifəli vergi və ticarət rəsmiləri Ermənistan vasitəsilə Rusiyaya çiplərin və digər elektron komponentlərin satışında artım olduğunu bildiriblər. Bunlar Rusiyanın Ukraynaya qarşı istifadə etdiyi qanadlı raketlər də daxil olmaqla, silah istehsalı üçün kritik hesab edilən səkkiz xüsusi həssas kateqoriyalı çip və digər elektron cihazlarıdır. ABŞ Sənaye və Təhlükəsizlik Bürosunun möhürü ilə işarələnmiş bir sənəddə deyilir ki, 2022-ci ildə Ermənistan 2021-ci ilə nisbətən ABŞ-dan 515 faiz, Avropa İttifaqından isə 212 faiz çox çip və prosessor idxal edib. Daha sonra isə onların 97 faizini digər ölkələrə satıb. Sənəddə deyilir ki, eyni məhsullar Rusiyaya da ixrac edilib. Bütün bu faktlar Ermənistanın Rusiyanın sanksiyalardan yayınmasında əsas mərkəzlərdən biri olduğunu sübut edir. O da məlumdur ki, Ermənistanın sanksiya altında olan ölkələrə “dəstək” sahəsində böyük təcrübəsi var – uzun illərdir İran sanksiyaladan yayınaraq xaricdən malları məhz Ermənistan vasitəsilə alır.
Ümumilikdə, sözügedən çipləri Qərbdən alıb Rusiyaya verməsi ancaq ona görə mümkün olur ki, Ermənistan indiyə qədər sanksiyalar altında olan İrana hər cür kömək edib və buna görə təzyiqə, cəzaya məruz qalmayıb.
Maraqlıdır, bu dəfə sözügedən çiplərə görə Ermənistan Rusiyaya tətbiq olunan sanksiyalardan yan keçdiyinə görə niyə cəzalandırılmır və necə cəzalandırılacaq?
“The New York Times” qəzetində dərc olunan məqalə bunun ictimailəşməsinə səbəb oldu”
Məsələyə münasibət bildirən AMİP sədri Arzuxan Əlizadənin fikrincə, bir sıra məsələyə görə Ermənistanın sanksiyalardan yan keçməsinə göz yumulub: “Bunun başlıca səbəbi hər zaman olduğu kimi, Ermənistana münasibətdə sərgilənən ikili standartlardır. Bu səbəbdən illərdir Ermənistanın hər şıltaqlığına göz yumurlar. Hesab edirlər ki, Ermənistan balaca zəif ölkədir. Digər tərəfdən Qərbdəki ernəni lobbisinin mövqeyini nəzərə alırlar. Məhz bu səbəblərdən uzun illər Ermənistanın İrana müxtəlif qadağan olunmuş məhsullar ötürməsini görməzdən gəliblər. Digər tərəfdən 5 ildir Ermənistanda Qərbə yaxın olan qüvvələr hakimiyyətdədir. Çiplər məsələsində Ermənistanın kəskin cəzalandırılacağını düşünmürəş. Ona görə ki, əslində Ermənistanın bunları Rusiyaya ötürməsini bilirdilər. Sadəcə, “The New York Times” qəzetində dərc olunan məqalə bunun ictimailəşməsinə səbəb oldu. Ancaq hər halda Birləşmiş Ştatlar tərəfindən Ermənistana yönəlik müəyyən addımların atılacağı güman olunur. Çünki bu günlərdə Ermənistan şirkətlərinə yönəlik sanksiyalar Vaşinqtonun hərəkətə keçməsindən xəvər verir”.
Vidadi ORDAHALLI
