Məlum olduğu kimi, Prezident İlham Əliyev Azərbaycan Dövlət Televiziyasına geniş müsahibə verib. Müsahibədə Qarabağla bağlı bir sıra məqamlara toxunub.
Bu arada erməni mediası Prezident İlham Əliyevin Qarabağla bağlı toxunduğu iki məqamı xüsusi olaraq tirajlayaraq yayıb. Birincisi, Prezident qeyd edib ki, Qarabağ ermənilərinin iki yolu var: “Biz dəfələrlə bəyan etmişdik ki, daxili işlərimizi heç bir ölkə ilə müzakirə etməyəcəyik. Qarabağ bizim daxili işimizdir. Qarabağda yaşayan ermənilər ya Azərbaycan vətəndaşlığını qəbul etməlidirlər, ya da ki, özləri üçün başqa yaşayış yeri tapmalıdırlar”.
İkincisi, ölkə başçısı vurğulayıb ki, Ermənistan rəsmən Qarabağın Azərbaycana məxsus olmasını bəyan etməlidir: “Praqa və Soçi görüşlərində Ermənistan Azərbaycanın ərazi bütövlüyünü, suverenliyini rəsmən qəbul edib. Yəni qəbul edib ki, Azərbaycan ilə Ermənistan arasında sərhədlər 1991-ci ilin Alma-Ata Bəyannaməsi əsasında həll olunmalıdır. O da nəyi göstərir? O da göstərir ki, müttəfiq respublikalar arasında olan sərhədlər dövlət sərhədləri sayılır. Beləliklə, bax, bu rəsmi addımı atmaqla Ermənistan rəsmən Qarabağı Azərbaycanın ayrılmaz hissəsi kimi tanıyıb. Vaxtilə “Qarabağ Ermənistandır və nöqtə” deyən Ermənistan bu gün “Qarabağ Azərbaycandır və nida” sözlərimizi təkrar etməlidir. Çünki əgər “A” deyibsə “B” də deməlidir. Alma-Ata Bəyannaməsini əsas götürüb bunun üzərində sülh müqaviləsinə hazır olduğunu göstərən Ermənistan artıq rəsmən bəyan etməlidir ki, Qarabağ Azərbaycandır”.
Maraqlıdır, erməni mediasının Prezident İlham Əliyevin səsləndirdiyi bu iki fikrə xüsusi maraq göstərməsinin səbəbi nədən ibarətdir?
“Erməni tərəfi yaxşı bilir ki, Qarabağ məsələsi Əliyevin müəyyən etdiyi çərçivələr daxilində tənzimlənəcək”
Məsələyə münasibət bildirən Yeni Yol Partiyasının sədri Ramil Hüseynov erməni mediasının məlum fikirlərə xüsusi maraq göstərməsini bir sıra faktorlarla əlaqələndirdi: “Əvvəla, erməni mediası yaxşı bilir ki, Prezident İlham Əliyev ciddi dövlət başçısı olduğu üçün səsləndirdiyi istənilən sözün arxasındadır. Paşinyan kimi bu gün bir söz, sabah tamamilə başqa bir söz demir. Nə deyirsə, onun arxasındadır və bunu həyata keçirir. Yəni erməni tərəfi yaxşı bilir ki, İlham Əliyev öz sözünün ağasıdır. Qarabağ məsələsi onun müəyyən etdiyi çərçivələr daxilində tənzimlənəcək. Çünki bunu bir sıra faktorlar şərtləndirir. Başlıca faktor odur ki, Azərbaycan müharibədə qalib tərəfdir. 30 il mövcud olan status-kvonu 44 günlük müharibədə darmadağın edib. Digər faktor odur ki, dünya Azərbaycanın ərazi bütövlüyünü birmənalı dəstəkləyir. Müharibədən sonra bu amil daha da güclənib. Üstəlik, ötən iki il ərzində Azərbaycanın geosiyasi əhəmiyyəti daha da artıb. Söhbət ondan gedir ki, həm enerji təchizatı baxımından, həm də nəqliyyat-tranzit əlaqələri baxımından ölkəmizin rolu daha da artır. Bu da imkan verir ki, bir sıra dövlətlər Azərbaycanla hesablaşsınlar. Başqa bir tərəfdən erməni tərəfi görür ki, Ermənistan Azərbaycanın ərazi bütövlüyünü tanımasa nə ölkəmizlə, nə də Türkiyə ilə normal əlaqələr qura biləcək. Bu zaman Ermənistanın ciddi və dayanıqlı sosial-iqtisadi inkişafı mümkün olmayacaq. Ona görə də İlham Əliyevin irəli sürdüyü prinsiplərə və ondan irəli gələn məqamlara belə həssaslıqla yanaşırlar. Ən nəhayət, hiss olunur ki, Paşinyan erməni ictimai rəyini məlum prinsiplər əsasında sülhə hazırlamaq istəyir”.
Vidadi ORDAHALLI
