Son vaxtlar müşahidələr göstərir ki, İranın Azərbaycanda daha bir məkrli planı işə düşüb. Belə ki, Tehrana bağlı qüvvələr xeyriyyəçilik adı ilə şəhid ailələri və qaziləri öz təsirləri altına salmağa çalışırlar. Həmin qruplar müxtəlif yollarla bu işlərlə məşğuldurlar.
Onar fərqli metodlardan yararlanaraq sistemli şəkildə qazilər, şəhid ailələri ilə kontakt saxlayırlar. Onları vaxtaşırı ziyarət edir, şəhidlərin valideynləri ilə maksimum yaxınlığa çalışırlar. Əsasən qadınlardan ibarət bu dəstələr şəhid anaları, xanımları ilə yaxınlaşır, onların bu halından sui-istifadə edib, niyyətlərini həyata keçirirlər. Ailələrin simpatiyasını qazanmağa nail olurlar. Bundan sonra “dini ayinlər” adı ilə şəhid ailələri ilə maksimum yaxınlaşma baş verir.
Buna dair bir neçə konkret faktın da şahidi olmuşuq. Hətta bu cür məclislərdə həmin qadınlar tərəfindən radikal dini şuarların səsləndirildiyini də görmüşük.
İlahiyyatçı Tural İrfan “Bakı-Xəbər”ə açıqlamasında bildirdi ki, İran din pərdəsi altında siyasi şiəliklə Azərbaycanda vəziyyəti dəyişməyə, öz məkrli planlarını həyata keçirməyə cəhd edir: “Həmin o planların tərkibində terror aktlarından tutmuş müxtəlif formalar, yollar var. Bilirsiz ki, millət vəkili Fazil Mustafaya qarşı terror hadisəsindən sonra bizim hüquq-mühafizə orqanları tərəfindən İran agenturasına, radikal düşəncədə olan insanlara qarşı daha ciddi mübarizə başladıldı. Məlumdur ki, ondan sonra irançıların və İranın çox isti planları işə düşdü. O planların biri də qeyd olunan məsələdir ki, şəhid ailələrinin ziyarətindən istifadə edərək toplanışlar keçirir və həmin toplanışlarda da öz məkrli planlarını, təxribatçı söbətlərini edirlər, insanları təsir altına alırlar. Bu məsələ uzun müddətdir ki, ölkədə var. Əsasən də qadınlardan ibarət qruplar xüsusi fəallıq göstərir. Əksəriyyəti də həbs olunan radikalların həyat yoldaşları, yaxınlarıdır. Onlar müxtəlif ailələrdə, müxtəlif yas tədbirlərində həmişə iştirak etməyə can atırlar. Bu mütəmadi şəkildə davam edir və nəzərə çarpmadan bu işləri həyata keçirirlər. Fikir verirsizsə, ölkədə dini ayinlərin, əlamətdar günlərin sayının artırılması halları baş verir. Məsələn, tarix boyu qədr gecəsi bir gecə olub, bütün müsəlman aləmində də o cür qeyd olunub. Amma ölkəmizdə son bir neçə ildi qədr gecələrinin sayı artmağa başlayıb. Hətta İran tərəfi bunun adını da dəyişib əhya gecələri edib. Bu da sünni-şiə ziddiyyətinə görə belədir. İranın siyasəti belədir ki, kim, hansı məzhəb bir termin işlədirsə, biz də onun əksinə aid nəsə edək. Xatırlayırsızsa, orucluğun qeyd olunmasında da son illərə kimi bizim ölkə də İrana tabe olurdu. Bu son hadisələrin ardınca artıq bu vəziyyəti düzəltdilər”.
İlahiyyatçının sözlərinə görə, İran öz ideologiyasını bütün dünya ölkələrinə insanların şiəlik əqidəsindən sui-istifadə edərək, şiə adı altında təlqin edir: “ Bu qeyd etdiyim məsələlərin də kökü həmin bayramların sayının çoxaldılmasından, matəm günlərinin sayının artırılmasından başlayıb ki, onların toplanış məsələləri uzun çəksin. Bəli, xeyriyyəçilik adı altında, yardım adı altında onlar uzun müddətdir burda fəaliyyət göstərirlər. Bu, sədəcə indi üzə çıxa bilər. Hətta məscid axundları da bu işlərlə məşğuldurlar. Adlarını çəkmək istəmədiyim bəzilərinin başlarında çox qorxulu elektoratları var. Bu cür axundlar da İran təsirində olaraq, elə aksiyalar keçirməklə insanları özlərinə çəlb etməyə çalışırlar. Bu təbliğatların da nəticəsində belə məsələlər yaranır. Şəhid ailələrini ziyarət etmək, onlara yardım etmək gözəl işdir, bəyənilən məsələdir. Ancaq məsələ burasındadır ki, irançılar o ziyarətləri, o yardımlarını İranın siyasi, məkrli planları üçün həyata keçirirlər. O baxımdan bu vəziyyət də təhlil olunmalıdır. Xatirlayırıq ki, İkinci Qarabağ müharibəsi bitəndən sonra Şəhidlər Xiyabanında o cür toplum necə siyasi şüarlar səsləndirirdi. Provokasiya etmək istədilər, amma onun da qarşısı alındı. Hətta yüksək rütbəli hərbiçimiz də ona münasibət bildirməli oldu. Bu kimi məsələlərin qarşısı qətiyyətlə alınmalıdır. Son araşdırmalara görə deyə bilərəm ki, bizim dövlətin hüquq-mühafizə orqanlarının gördüyü iş çox yüksək səviyyədədi, təqdirəlayiqdir. Ancaq açığını deyim ki, dini idarələrin İran məsələsi ilə bağlı gördüyü iş çox da qənaətbəxş deyil. Bir fakt dünən qarşıma çıxdı. Şəhərin mərkəzində oturan bir axund İranın dörd müctəhidindən sual yazıb fətva aldığını xütbədə, cümə namazında camaata elan edirdi. Hətta o müctəhidlərdən biri də oranın ali dini lideri idi. Mən onu dini idarələrdən maraqlandım. Burada Dini Komitə, Qafqaz Müsəlmanları İdarəsinin Qazılar Şurası var. Bu insana hansısa bir məsələ qaranlıq qalıbsa, dini idarələrdən soruşmalıdır. Onlar bəs nə işə baxır? Amma o, birbaşa İran müctəhidlərinə sual ünvanlayır. Bu misalı ona görə çəkdim ki, belə axundlar həmin müctəhidlərdən kiminsə əleyhinə, hansısa qətl törətmək üçün də istifadə edə bilərlər. Nə qədər ki, bu köklü məsələlər həllini tapmayıb, xırda məsələlər də həllini tapmayacaq. Hətta mənə izah da verdilər ki, İran müctəhidlərindən fətva almalarına icazə verilir”.
Məhəmmədəli QƏRİBLİ
