Ermənistanda əsir saxlanılan Azərbaycan hərbçisi Hüseyn Axundova qarşı qondarma cinayət işi açılıb. Ermənistan Baş Prokurorluğu onu “Zəngəzur mis-molibden kombinatının gözətçisini qətlə yetirməkdə” təqsirləndirir.
Erməni mediası qondarma məlumatlar yaymaqla, ondan “cinayətkar” obrazı yaratmağa çalışır. Ermənistan Milli Təhlükəsizlik Xidmətinin İstintaq İdarəsi tərəfindən aparılan araşdırmalara görə, guya H.Axundov aprelin 12-də zavodun gözətçisini öldürüb. Daha sonra o, gözətçinin telefonunu, siqaretini və alışqanını götürüb, maşını işə salmaq istəyib, lakin buna nail ola bilməyib. Bundan sonra o, cinayət yerindən qaçıb. Guya bundan sonra telefon vasitəsi ilə videomüraciət formasında qazandığı uğurdan bəhs edib və onu sosial şəbəkə hesabına göndərib.
Görünən odur ki, erməni mediası absurd fantaziyalarını real hadisə kimi təqdim etməyə çalışır. Halbuki, Ermənistan ərazisində Azərbaycan nömrəsi işləmir. Üstəlik, Ermənistan Baş Prokurorluğu əvvəlcə bəyan edib ki, saxlanılan azərbaycanlı əsgərin zavodun işçisini qətlə yetirməsi ilə bağlı fakt yoxdur. Ancaq hiss olunur ki, prokurorluq təzyiq altında olduğu üçün mövqeyini dəyişir. Məsələn, Ermənistanın hakim “Vətəndaş sazişi” partiyasından olan deputatı Narek Kahramanyan zavodun işçisinin azərbaycanlı hərbçilərdən biri tərəfindən öldürüldüyünü iddia edir. Müxbir deputata prokurorluğun bununla bağlı bəyanatını xatırladıb. Orada deyilir ki, azərbaycanlıların qətldə iştirakını inkar etməsi ilə versiyanın lehinə heç bir sübut yoxdur. Lakin erməni deputat dediyindən qalmayıb: “Xeyr, sübut olacaq. Gəlin, hüquq-mühafizə orqanlarının əməkdaşları tərəfindən cinayətin açılmasını gözləyək”.
Parlamentin Təhlükəsizlik və Müdafiə məsələləri üzrə daimi komissiyasının sədri Andranik Köçəryan isə deyib ki, bununla bağlı kifayət qədər fakt yoxdu, amma istintaqın gedişini gözləməyi məsləhət görüb: “Rəsmi açıqlamanı səbrlə gözləməyi məsləhət görürəm. Bu işdə öyrənilməli olan çoxsaylı epizodlar var. Biz məhbuslarımızla bağlı problemlərin həlli üçün gələcəkdə faydalı ola biləcək bir fenomenlə qarşılaşırıq”.
Görünən odur ki, deputatlar da ziddiyətli danışır. Bəziləri məsələyə obyektiv yanaşır, bəziləri isə nəyin bahasına olursa-olsun məsələni əsgərin üzərinə atmağa çalışır. Hüquq-mühafizə orqanlarına təzyiq edirlər ki, cinayət işi açsınlar. Bütün bu təzyiqlərin nəticəsində ona nail olublar ki, azərbaycanlı əsgərə cinayət işi açsınlar. Açıq hiss olunur ki, uydurma dəlillər əsasında azərbaycanlı əsgərə qurama cinayət işi hazırlanıb.
Məlumat üçün qeyd edək ki, 2014-cü ilin iyulunda Kəlbəcərdə Şahbaz Quliyev və Dilqəm Əsgərov ermənilər tərəfindən girov götürüləndə onlara qarşı da oxşar ittiham irəli sürülmüşdü. Guya onlar mülki adam öldürüblər.
“Azərbaycan bütün beynəlxalq təşkilatlara, o cümlədən, Beynəlxalq Cinayət Məhkəməsinə müraciət etməlidir”
Məsələyə münasibət bildirən Aydınlar Partiyasının sədri, hüquqşünas Qulamhüseyn Əlibəyli də hesab edir ki, Azərbaycan əsgəri ilə bağlı Ermənistan tərəfi əməllicə məhkəmə şousu təşkil edib: “Açıq-aşkar bunun bütün elementləri özünü göstərməkdədir. Həm siyasi müstəvidə, həm də digər məsələlərdə. Bütün bunlar da təsadüf deyil. Ermənistanın bütün bunlarda bir neçə məqsədi var. Başlıca məqsəd Azərbaycanın imicini ləkələməkdir. Guya ki, Azərbaycan əsgəri Ermənistan ərazisinə keçib onların mülki vətəndaşını öldürüb. Ümumiyyətlə, ermənilər çalışırlar ki, Azərbaycanla bağlı bütün məsələlərdə bir şou yaratsınlar. Bu minvalla dünyada mənfi imic formalaşdırsınlar ki, guya Azərbaycan Ermənistana təcavüz edir və əsgərlərin ora gedib çıxması da bunun nəticəsidir. Yəni istəyirlər ki, dünya miqyasında Azərbaycanı vəhşi bir tərəf kimi təqdim etsinlər. Bu baxımdan əsgərlərimizin yolu azaraq Ermənistan ərazisinə keçmələri onlar üçün göydəndüşmə bir bəhanə yaradıb. Bəlli məsələdir ki, əsgərlərimiz onların əlində olduğu üçün onların üzərində istənilən tamaşa xarakterli məhkəmə qura bilərlər. Ağla gəlməyən ittihamlar irəli sürə bilərlər. Ancaq bütün bunlar Azərbaycanın dünyada formalaşan imicinə mənfi təsir göstərməyəcək. Çünki artıq dünya da erməni saxtakarlıqlarının fərqindədir. Əsgərimizə qarşı törədilən vəhşiliyi bütün dünya gördü. Əsgərimizə qarşı törədilənlər artıq beynəlxalq cinayətdir və bununla bağlı əslində araşdırma başlamalıdır. Ona görə də Azərbaycan bütün beynəlxalq təşkilatlara, o cümlədən, Beynəlxalq Cinayət Məhkəməsinə müraciət etməlidir. O məqsədlə ki, əsgərimizə qarşı törədilən o vəhşi cinayəti araşdırsınlar. Ermənistanın qondarma məhkəmə şousunda məqsədi həm də odur ki, əsgərlərimizi Azərbaycanda həbsdə olan erməni diversantlarla dəyişsin. Düzdür, həmin diversantların bir çoxu Ermənistana təhvil verilib. Ancaq onların bəziləri bizdə həbsdədir. Ona görə də Ermənistanın məqsədi odur ki, onlardan alver predmeti kimi istifadə etsin. Yəni belə bir planları da var”.
Vidadi ORDAHALLI
