Məlum olduğu kimi, ölkə Prezidenti İlham Əliyevin regionlara növbəti səfəri çərçivəsində Azərbaycan Televiziyasına müsahibəsi ölkə ictimaiyyətində növbəti qayıdış sevinci və güvən hissi yaratdı. Prezidentin bu çıxışı Laçın camaatı üçün xüsusi bir müjdə, öz evinə, torpağına qayıdış anonsu oldu.
Prezident İ.Əliyev qeyd etdi ki, biz keçmiş köçkünləri bu ilin sonuna qədər Laçın şəhərinə qaytaracağıq. Bax, bu gün tam əminliklə deyə bilərəm ki, biz yay aylarında artıq buna nail olacağıq: “Yəni biz bu işi vaxtından tez görürük. Birinci mərhələdə Laçın şəhərində 400-dən bir qədər çox evin inşasını nəzərdə tuturduqsa, son məlumata, son planlarımıza görə, ancaq fərdi evlərin sayı 570 olacaq. Eyni zamanda, 140-dan çox mənzil hazır olacaqdır. Yəni beləliklə, 700-dən çox ailəni biz bu ilin yay aylarında Laçın şəhərində yerləşdirəcəyik”.
“Laçına geri qayıdış, düşmənlə üz-üzə olan torpaqlarda məskunlaşmanın həyata keçirilməsi, insanların bu ərazilərdə yaşaması bu ərazilərin Azərbaycan torpağı olduğunu nümayiş etdirir”
Laçın şəhərinə geri qayıdışla bağlı o bölgəni təmsil edən millət vəkili Mahir Abbaszadə “Bakı-Xəbər”ə açıqlamasına qeyd etdi ki, ötən ilin avqust ayında Laçın şəhər mərkəzi Zabux və Susdan Rusiya sülhməramlı qüvvələri çıxarıldı. Xankəndidən İrəvana gedən yolun mühafizəsi təşkil edildikdən sonra Laçın rayonunun şəhər mərkəzi qeyri-qanuni məskunlaşmış ermənilərdən təmizləndi. Beləliklə, qarşıdakı vaxtlarda şəhər və kəndlərin bərpa prosesi sürətlə həyata keçirilməyə başladı: “Cənab Prezident Laçının şəhər mərkəzinə səfər edərkən Azərbaycanın bayrağını qaldırdı və laçınlıların tezliklə öz ata-baba yurdlarına qayıdacağı ilə mesajlar verdi. Hazırda Laçın rayonunda bərpa quruculuq işləri yüksək səviyyədə həyata keçirilir. İlkin mərhələdə 700 ailənin köçürülməsi gözlənilir. Eyni zamanda, Laçın rayonun Zabux və Sus kəndinə təxminən 400-ə yaxın ailənin köçürülməsi də nəzərdə tutulur”.
Millət vəkilinin sözlərinə görə, hazırda Böyük Qayıdış həyata keçirilir. Insanların 30 il müddətində Vətən, torpaq həsrətinə artıq son qoyulub. Laçınlılar doğma yurdlarına geri qayıdacaq və daimi yaşayışı təmin ediləcək.
Həmsöhbətimiz onu da əlavə etdi ki, işğaldan azad olunan rayonlar içərisində Laçın rayonu xüsusi əhəmiyyət kəsb edir. Belə ki, Azərbaycan Ermənistan arasında ən qısa məsafə məhz Laçın rayonundadır: “Bu illər ərzində Ermənistan tərəfinin razılaşmadığı məsələlərdən biri də Laçın rayonunun status məsələsidir. Ancaq cənab İlham Əliyevin həm hərbi, həm də diplomatik rəhbərliyi nəticəsində biz ermənilərin bu məkrli planını ləğv edə bilmişik. Bu nöqteyi nəzərdən Laçına geri qayıdış, düşmənlə üz-üzə olan torpaqlardan məskunlaşmanın həyata keçirilməsi, insanların bu ərazilərdə yaşaması bu ərazilərin Azərbaycan torpağı olduğunu nümayiş etdirir. Həmçinin, bunun çox mühum siyasi əhəmiyyəti var. Siyasi əhəmiyyət isə o deməkdir ki, biz 30 illik işğala son qoyduq və azad edilən ərazilərin bərpa quruculuq işləri Azərbaycanın daxili imkanları hesabına həyata keçirilir. Insanların geri qayıtması və orada məskunlaşması çox mühum tarixi hadisədir”.
Günel CƏLİLOVA
