Bütöv Azərbaycan Ocaqlarının (BAO) təşəbbüsü və təşkilatçılığı ilə “Bütöv Azərbaycan Koordinasiya Mərkəzi” (BAKM) yaradılıb. Aprel ayının 22-də yeni mərkəzin geniş ictimaiyyətə təqdimatı olacaq. BAO-nun bu təşəbbüsünə 6 təşkilat qoşulub, BAKM-da hələ ki, ümumilikdə 7 təşkilat təmsil olunur.
Bu barədə “Bakı-Xəbər”ə BAO sədrinin müavini, fəlsəfə doktoru Faiq Ələkbərli məlumat verib. O qeyd etdi ki, yeni təsis olunan Mərkəz öz ətrafında daha çox təşkilatı birləşdirmək niyyətindədir. “BAO-nun təşəbbüsü ilə BAKM-ın yaradılmasına qərar verilib. Bu təşkilatda Azərbaycan Respublikasından yalnız BAO təmsil olunacaq, qalan təşkilatlar Azərbaycanın Güneyindəndir. Güney Azərbaycanı, o cümlədən, Xorasanı, Qaşqayı, Türkmən Səhranı və digər türk ellərini təmsil edən təşkilatlar burda iştirak edəcəklər. Güney Azərbaycan Demokrat Partiyası (sözçüsü Mahmud Bilgin), Azərbaycan Milli Dirəniş Təşkilatı (sözçüsü Məcid Cavadi Araz), Güney Azərbaycan Milli Qurtuluş Hərəkatı (başkanı Eldar Qaradağlı), Azərbaycan Öyrənci Hərəkatı (sözçüsü Əmir Mərdani), Qaşqay Azadlıq Yolu Partiyası (sözçüsü Ruhullah Muradi) və Türkmən Səhra Birliyi Şurasının üzvü (sözçüsü Hacı Kərim Beygcani) BAKM-da yer alacaqdır.
BAKM-ın yaradılmasında məqsəd bütöv Azərbaycan dövləti qurmaq olduğu üçün mərkəzin qapıları digər təşkilatların üzünə də açıqdır. Eyni zamanda Koordinasiya Mərkəzinin aydınlar, strateji araşdırmalar mərkəzi qolu və digər müvafiq strukturlar da olacaqdır”.
F.Ələkbərli qeyd etdi ki, BAKM-ın qarşıdakı dövrdə göstərəcəyi aktiv fəaliyyətlər nəticəsində bizlər vahid Azərbaycan dövləti ideyasına daha sürətlə, məqsədyönlü, planlı şəkildə yaxınlaşa, onu gerçəkləşdirə biləcəyik. “İlk mərhələdə məqsədimiz Azərbaycanımızın Güneyində və digər türk ellərində (Qaşqay, Xorasan, Türkmən Səhra) dövlətçiliyimizi bərpa etməkdir. Bunun da yolu hazırda İran adlanan ölkədən qəsb edilmiş torpaqlarımızı geri qaytarmaqdan keçir. Biz orada dövlətçilik ənənələrimizi bərpa etməliyik. Məqsədimiz budur. Daha sonrakı işimiz hazırda mövcud olan Azərbaycan Respublikası ilə məhz yeni yaranacaq dövlət arasında münasibətləri tənzimləyib vahid dövlətə doğru getmək olacaqdır. Bütöv Azərbaycan Koordinasya Mərkəzinin əsas hədəfi artıq vahid mövqedən, vahid şüurdan, vahid düşüncədən çıxış etməkdədir. Əlbəttə, fərqli düşüncələr və baxışlar ola bilər. Ancaq bütöv Azərbaycan naminə fərqli düşüncələrin və baxışların bir araya gəlməsi mümkündür. Biz BAO olaraq birləşdirici təşkilatın yaradılması istiqamətində addımlar atırıq, mücadilələr veririk. Hesab edirik ki, elan ediləcək yeni mərkəzdə biz vahid platformada çıxış edə biləcəyik. Yəni bu hər kəsi razı salacaq və burda heç bir digər siyasi ambisiya olmayacaq, belə bir təşkilatın yaranmasına çox yaxınıq”.
F.Ələkbərli dedi ki, bütün hallarda vahid Azərbaycan naminə birləşmək, məqsədə doğru getmək lazımdır, çünki illərdir bu amala çatmaq üçün yol qət edirik. O, vurğuladı ki, görülən işlərə mane olmaq istəyənlər də ola bilər, amma keçən dövrlərdə olduğu kimi, yenə də belə cəhdlər uğursuzluğa düçar olacaq. “Artıq biz elə bir mərhələdəyik ki, keçmişi deyil, bu günü və gələcəyi düşünmək, bu xətt üzrə hərəkət etmək məcburiyyətindəyik. Ona görə də ilk addım olaraq məhz 7 təşkilatın rəhbəri bir araya gələrək, belə bir Koordinasiya Mərkəzi yaradıb. Ancaq digər təşkilatlarla da tanışlıqlar davam edir və bəzi təşkilatlar da bizə yaxınlaşmağa çox yaxındırlar. Növbəti mərhələdə bu təşkilatların sayı ən azı 10-dan çox olacaqdır”-deyə F.Ələkbərli qeyd etdi.
Gülnarə RƏHİMOVA BDU-nun Jurnalistika Fakültəsinin IV kurs tələbəsi, praktikant
