Ermənistan hökuməti Azərbaycanla müxtəlif istiqamətlərdə aparılan danışıqların təfərrüatını açıqlayıb. Bu barədə Ermənistan hökumətinin hesabatında deyilir.
Hesabatda deyilir ki, İrəvan-Bakı danışıqlar prosesinin əsas istiqamətləri sülh və Ermənistan-Azərbaycan münasibətlərinin qurulması haqqında saziş, Qarabağ münaqişəsinin həlli, regionda nəqliyyat və iqtisadi kommunikasiyaların blokunun açılması, sərhədlərin müəyyən edilməsi və təhlükəsizlik, humanitar məsələlər olub: “Sülh müqaviləsi üzərində işin və əlaqələrin qurulması üç mərhələdə baş verib. Bu mərhələlərdə Ermənistan və Azərbaycan arasında müşahidələr və təkliflər mübadiləsi aparılıb. Ermənistan müşahidə və təkliflərini fevralın 14-də Azərbaycana çatdırıb. İrəvan üçün məqbul yanaşma ondan ibarətdir ki, Ermənistanla Azərbaycan arasında sazişin imzalanması Dağlıq Qarabağ münaqişəsinin həlli prosesindən Xankəndilə Bakı arasında beynəlxalq müzakirə mexanizminin formalaşacağı məntiqi ilə ayrıla bilər”.
Məgər Azərbaycan Ermənistanla “Dağlıq Qarabağ münaqişəsinin həlli” ilə bağlı danışıq aparır? Azərbaycan hesab edir ki, Qarabağ münaqişəsi həll olunub artıq. O zaman, bu yalan nəyə xidmət edir?
“Ermənistan hakimiyyəti Qarabağ məsələsini müzakirəyə çıxarmaqla manipulyasiya edir”
Sözügedən məsələ ilə bağlı fikirlərini “Bakı-Xəbər”lə bölüşən politoloq Məhəmməd Əsədullazadə hesab edir ki, Ermənistan tərəfi danışıqların məzmununu təhrif edir: “Ermənistan rəhbərliyi Azərbaycanla sülh müqaviləsinin bağlanması mətnində Qarabağ məsələsini qeyd etməyəcək. Ermənistan rəsmən 29.8 min kvadrat kilometr ərazinin təhlükəsizliyi və sərhədlərlər çərçivəsində sülh müqaviləsinin bağlanmasını qeyd edib. Göründüyü kimi, Ermənistan hökuməti rəsmən Azərbaycana ərazi iddialarından və Qarabağla bağlı məsələlərdən geri çəkilib. Bütün bunlarla yanaşı, hiyləgərcəsinə həmin sənəddə Qarabağ məsələsinin həllinin vacibliyini vurğulayırlar. Halbuki, münaqişə bitdiyi üçün Ermənistan bu məsələdən geri çəkilib. Ancaq vaxt keçdikcə, erməni tərəfi bununla spekulyasiya edir. Məsələ ondadır ki, Ermənistan hakimiyyəti Qarabağ məsələsini müzakirəyə çıxarmaqla manipulyasiya edir. Hər vasitə ilə Qarabağ ermənilərini danışıqlarda hansısa bir tərəf kimi görmək məqsədi güdür. Müxtəlif söz oyunları ilə öz məqsədlərini reallaşdırmaq istəyir. Ona görə də əsla onların bu oyunlarına getmək olmaz. Başqa bir tərəfdən, Ermənistanla Azərbaycan arasında sülh müqaviləsinin bağlanması yalnız Vaşinqtonun vasitəçiliyi ilə mümkün görünür. Lakin biz görürük ki, Ermənistanda siyasi hakimiyyət müxtəlif vasitələrlə vaxt qazanmağa çalışır. Elan etdikləri mövqe isə proseslərdə İrəvanı obyektiv mövqe tutan tərəf kimi göstərməkdir. Hesab edirlər ki, vaxtı nə qədər çox uzada bilsələr, bu bir o qədər onların xeyrinə işləyəcək. Guya bəlli bir müddətdən sonra geosiyasi vəziyyət Ermənistanın xeyrinə dəyişəcək. Ancaq haradan baxsaq bu real görünmür”.
Vidadi ORDAHALLI
