Ermənistan məhkəməsi əlverişsiz hava şəraiti səbəbindən Naxçıvan Muxtar Respublikasının Şahbuz rayonu istiqamətində itkin düşərək Ermənistan ərazisinə keçən iki azərbaycanlı əsgər barədə həbs qərarı verib.
Ermənistan Baş Prokurorluğu Azərbaycan hərbçilərinə qarşı bir neçə maddə ilə cinayət işi açıb.
Ermənistan Baş Prokurorluğunun məlumatına əsasən, Aqşin Bəbirov və Hüseyn Axundov barəsində Ermənistan Cinayət Məcəlləsinin bir sıra maddələri ilə cinayət işi başlanılıb. Onlar bir qrup şəxs tərəfindən qabaqcadan razılaşdırılaraq dövlət sərhədini qanunsuz keçməkdə, silah və sursat qaçaqmalçılığında və qanunsuz dövriyyəsində ittiham olunurlar.
Göründüyü kimi, Ermənistan əlverişsiz hava şəraiti səbəbindən silahsız şəkildə azıb onun ərazisinə keçən hərbçilərimizi geri təhvil vermək əvəzinə, onlarla bağlı cinayət işi qaldırdı. Ermənistanın bu addımını necə izah etmək olar?
Hərbi-siyasi ekspert Emin Həsənli “Bakı-Xəbər”ə açıqlamasında bildirdi ki, bu addım Ermənistanın bir daha nə qədər cinayətkar bir rejim tərəfindən idarə olunduğunu göstərir: “Vətən müharibəsində Azərbaycan yüzlərlə erməni əsirini geri qaytardı, iki minə yaxın cəsədin toplanmasına şərait yaratdı. Qarabağa, Xankəndiyə rus sülhməramlıların müşayiəti ilə erməni sakinlərin qayıtmalarına mane olmadı, əksinə, onlara şərait yaratdı. Hətta onlara alternativ yol da çəkildi. Ancaq ermənilər hər zaman bizim əsirlərə qarşı çox qəddar davranıblar. Bu davranışın səbəbi isə onların xəstə təxəyyülündən, Azərbaycana, türk millətinə qarşı nifrətindən irəli gəlir. İdman yarışı da dünyada sülh və həmrəylik yarışıdır. Heç bir ölkədə baş verməyəcək bir biabırçılığa şahid olduq. Bayrağımızı yandıranı bir neçə saat belə polis şöbəsində saxlamadılar. Onu buraxanda isə qəhrəman kimi buraxdılar. Ermənistan müstəqil dövlət deyil. Onu hər zaman diaspor və müəyyən dünya gücləri idarə edib. Bir zaman rus imperiyasının tapşırıqlarını yerinə yetirirdi, indi də Fransa, Amerika və İrana əlaltılıq edir. Ona görə də, bu vəziyyət bölgədə süni gərginləşdirməyə hesablanır. Ermənistanın da son təxribatları bir daha onu göstərir ki, ordusu yoxdu, əhalisi də bu orduda döyüşmək istəmir. Bu ancaq xəstə bir təxəyyülün nəticəsidir ki, belə riyakar addımlar atır və müxtəlif təxribatlar törədir. Həm idman yarışında olan təxribatı, həm cəbhə bölgəsində olan əsirlərin qaytarılmamasını nəzərə alaraq deyə bilərik ki, sülh istəyən ölkə bunların heç birini etməz. Əslində Ermənistan münaqişənin davam etməsini istəyir. Beynəlxalq birliyə göstərmək istəyir ki, sülh müqaviləsi imzalamağın hələ zamanı deyil. Gələcəkdə də hansısa addımlar atmaq üçün hələ xəyallar irəli sürürlər. Bunlar alınası deyil. Bu davranışların hamısına Azərbaycan ordusu cavab verəcək. Azərbaycan əsgəri mülki əhali ilə, əsirlə belə davranmır. Azərbaycan dövləti, cinayətkarlara belə, humanizm prinsiplərinə əsaslanaraq cəza verir”.
Qeyd edək ki, Azərbaycan Ordusunun əsgərləri - 2004-cü il təvəllüdlü Bəbirov Aqşin Qabil oğlu və 2003-cü il təvəllüdlü Axundov Hüseyn Əhliman oğlu aprelin 9-da Naxçıvan Muxtar Respublikasının Şahbuz rayonunun Ermənistanla sərhəd ərazisində əlverişsiz hava şəraitində məhdud görmə səbəbindən itkin düşüblər. Ermənistan Müdafiə Nazirliyi aprelin 13-də Azərbaycan əsgərlərinin Ermənistanda saxlandığını etiraf edib.
Sosial şəbəkələrdə və Ermənistan mediasında ermənilərin əsir götürdükləri Azərbaycan hərbçisini döymələri, ona ağır işgəncə vermələri ilə bağlı görüntülər yayılıb.
Əsir və itkin düşmüş, girov götürülmüş vətəndaşlarla əlaqədar Dövlət Komissiyası Azərbaycan Ordusunun itkin düşən iki əsgəri ilə bağlı beynəlxalq təşkilatlara müraciət edib.
Məhəmmədəli QƏRİBLİ
