İrəvanda keçirilən ağır atletika üzrə Avropa çempionatının açılış mərasimində Azərbaycanın bayrağının yandırılması fonunda bir məqam xüsusilə diqqəti cəlb edir.
Belə ki, Bakı 2015 Avropa Oyunları zamanı Prezident İlham Əliyev Ukraynanı təmsil edən erməni əsilli boksçuya şəxsən özü medal təqdim etdi. Prezident İlham Əliyev erməni boksçuya medal təqdim edərkən tamaşaçıların fit səslərini əl hərəkəti ilə dayandırmış, tamaşaçılar da buna qarşılıq olaraq erməni boksçunu, əslində isə ölkə başçısını alqışlayıb. Bu fakt bir daha Ermənistan və Azərbaycan arasında real fərqi gözlər önünə sərir. Bax budur, Azərbaycanın qeyri-müharibə və qeyri-döyüş müstəvisində ermənilərlə münasibətlərinin nümunəsi. Bu da ermənilərin bayrağımıza münasibəti.
Maraqlıdır, aradakı bu fərqi dünya görmürmü?
“Bənzər hadisə bizdə baş versəydi, bütün dünya üstümüzə gələrdi”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlının fikrincə, aradakı bütün bu fərqi dünya görür: “Görməyinə görür və özü də necə lazımdı. Sadəcə, dünya Ermənistanın bu barbarlığına əfsuslar olsun ki, göz yumur. Digər tərəfdən, Azərbaycanda çoxpartiyalı sistemin olmasına baxmayaraq, Prezident İlham Əliyevə xalq arasında böyük hörmət var. Yəni bu hörmətin təzahürü idi ki, bir əl işarəsi ilə hər şey yoluna qoyuldu. Prezident İlham Əliyevin böyüklüyü, humanistliyi idi ki, erməni əsilli idmançını şəxsən təbrik etdi. Ermənistanda isə bunların heç biri yoxdu. Nə şəxsiyyət amili var, nə də digər faktorlar. Niyə? Ona görə ki, Ermənistanda anarxiya hökm sürür. Anarxiya olan yerdə də istənilən hadisə ola bilər. Hətta dövlət səviyyəsində beynəlxalq səviyyəli idman yarışının keçirilməsinə, onun təhlükəsizliyinə zəmanət verilsə də, bunu təşkil edə bilmədilər. Bayrağımızı yandırana vaxtında mane olmadılar. Onu formal şəkildə işdən çıxarsalar da, ona qarşı cinayət işi açmadılar. Bütün bunlar onu göstərir ki, Ermənistan kimi dövlət belə yarışların keçirilməsinə layiq deyil. Çünki bu dövlətdə dini, irqi dözümlülük yox səviyyəsindədir. Beynəlxalq təşkilatlara biz hər zaman hörmətlə yanaşmışıq. Ancaq təəssüf ki, reallıqda biz bunun qarşılığını görmürük. Bunlar nəyi eşitmək istəyirlərsə, onu eşidirlər. İstəmədiklərini isə eşitmək və görmək istəmirlər. Ermənistanda yaşananlar bir daha bunu əyani şəkildə ortaya qoydu. Bənzər hadisə bizdə baş versəydi, yəni Ermənistan bayrağı yandırılsaydı, bütün dünya üstümüzə gələrdi. Beynəlxalq qurumlar, media bar-bar bağırardı. Ermənistanda olduğu üçün bunu görmək istəmirlər. Ona görə ki, ədalətsiz bir dünyada yaşayırıq. Dünya Azərbaycanın humanist addımlarını görsə də, əfsuslar olsun ki, bunu layiqincə qiymətləndirmir. Təcavüzkar Ermənistana öz yerini göstərmir. Əgər zamanında belə ədalətsizliklər olmasaydı, o zaman bütün bunlar baş verməzdi”.
Vidadi ORDAHALLI
