Ermənistan Respublika Partiyasının sədr müavini Armen Aşotyan Aİ-nin Ermənistandakı missiyasının fəaliyyəti ilə bağlı çıxış edib.
O bildirib ki, bu yaxınlarda Avropanın Blankspot.se xəbər agentliyi Ermənistan-Azərbaycan sərhədində və Qarabağda baş verənlərlə bağlı həm Avropa Monitorinq Missiyasının rəhbəri Markus Ritterin, həm də Aİ-nin Cənubi Qafqaz üzrə nümayəndəsi Toivo Klaarın Aİ missiyasının fəaliyyəti ilə bağlı şərhlərini təqdim edib: “Klaar bildirir ki, anklavlarla bağlı məsələ gündəmdədir və müzakirə mövzusudur. Xatırladım ki, Ermənistanın qurumları azərbaycanlılarla belə bir mövzunu müzakirə etdiklərini mütəmadi olaraq təkzib edirlər. Bu məlumatları müqayisə edərək bir daha deyə bilərik ki, Aİ-nin monitorinq missiyasının fəaliyyəti ilə bağlı suallar cavablardan daha çoxdur.
Onların Ermənistanın təhlükəsizliyini necə gücləndirdiyi heç vaxt məlum olmayıb”.
Məqalədə o da qeyd olunur ki, missiya Ermənistanın təhlükəsizliyini təmin etmək mexanizmindən daha çox Aİ-nin regionda möhkəmləndirilməsi vasitəsidir.
Çox maraqlıdır, Azərbaycanın 8 anklav kəndi ilə bağlı Avropanın vasitəçiliyi ilə müzakirənin aparıldığı bildirilir. Ermənistan isə bunu hələ də təsdiqləmir. Eyni zamanda məlum olur ki, Ermənistan siyasiləri Avropa missiyasının əsl mahiyyətini anlamağa başlayıblar ki, onlar Ermənistanın təhlükəsizliyini təmin etmək marağından daha çox, özlərinin regionda möhkəmlənməsini təmin etməyi düşünürlər. Bu iki vacib arqumenti necə dəyərləndirmək olar?
Siyasi şərhçi Tofiq Abbasov “Bakı-Xəbər”ə bildirdi ki, Ermənistanın özünün mövcudluğu belə xarici qüvvələrin iştirakı ilə baş tutub: “Daha dərinə getsək məlum olur ki, ermənilərin Qafqazdakı mövcudluğu Birinci Nikolayın səyi ilə baş verib. Artıq dilənmək, başqa millətlərə sığınıb onlardan imdad diləmək genetik olaraq ermənilərin yaddaşına hopub. Belə bir vərdiş onların diplomatiyasında da yer alıb. Onlar özlərini müstəqil təsəvvür edə bilmirlər. Onların gözləntisi budur ki, hansısa xarici qüvvə mütləq mənada onlara dəstək ifadə etməlidir. Hətta belə qənaətdədirlər ki, əgər müharibə olarsa, kimsə onların əvəzinə vuruşmalıdır. Onların öz müqəddəratlarına yiyə durmaq kimi niyyətləri də yoxdur. Avropa İttifaqının missiyasını da onlar dəvət edib. Bizim Prezident elə Praqda dedi ki, bizə belə bir missiya lazım deyil. Bu, eyni zamanda o anlama gəlirdi ki, biz Ermənistana qarşı müharibə aparmaq istəmirik. 8 anklav kəndimizlə bağlı müzakirənin aparılması ilə bağlı nəsə deyə bilmərəm. Amma Ermənistanın zərrə qədər məsuliyyəti olsa, nədənsə başlamağın lazımlığını anlamalıdır. Onda bu proses yerindən tərpənmiş olar. Ən balaca bir məsələ ilə bağlı biz konsensus tapsaq, proses çox geniş bir formatda reallaşa bilər. Görünən budur ki, Ermənistan bu istiqamətdə heç bir fəallıq göstərmir. Nikol Paşinyan göstərir ki, onun özü belə qərar verməklə bağlı ixtiyar sahibi deyil. Gec də olsa Ermənistan reallığı dərk edəcək. Müşahidəçilər həqiqətən də Ermənistanın deyil, öz problemlərini həll etməyə gəliblər. Missiyanın tərkibi də hərbçi və jandarmlardan formalaşıb. Onların içərisində həm ABŞ-ın, həm də Avropanın casusları var. Onlar İran, Türkiyə və nəhayət Türkiyə məsələsinə görə regionda möhkəmlənmək istəyirlər. Biz ölkə olaraq, kənar qüvvələrin hamısının fəaliyyətini süzgəcdən keçiririk. İstəyimiz budur ki, milli maraqlarımız reallaşsın. Bu proseslərin hamısını nəzarətdə saxlayırıq Ermənistan gərək bir şeyi anlasın. Onlar öz müvəfəqiyyətləri üçün açar tapmaq istəyirlərsə, o nə ABŞ -da, nə də Avropadadır. Bölgənin söz sahibi olan Türkiyə və Azərbaycanla normal əməkdaşlıq prosesinə razılıq versinlər. Bu olmasa, Ermənistan özünə nicat tapa bilməyəcək. Əgər bir ölkənin əhalisi durmadan azalırsa, demək ki, həmin çoğrafiyada həyat yoxdur. Ermənistan hazırda bu vəziyyətdədir”.
Məhəmmədəli QƏRİBLİ
