“Bütün sivil dünya idmanın, mədəniyyətin və dinin siyasətdən kənar tutulmasını istəyir. Özünü dünya sivilzasiyasının bir parçası hesab edən bütün xalqlar bu düstura əməl etməyə çalışırlar. Mədəniyyət, idman tədbirləri xalqları, dövlətləri yaxınlaşdırmağa xidmət etməlidir. İrəvanda keçirilən ağır atletika üzrə Avropa çempionatının açılış mərasimində Azərbaycan bayrağının yandırılması göstərir ki, Ermənistan sivil dövlət deyil. Ermənistan ərazisində aparılan anti-Azərbaycan, anti-türk siyasəti erməni vətəndaşlarını total şəkildə zəhərləyib. Ermənilərin qəlbində Azərbaycan xalqına qarşı elə bir nifrət mövcuddur ki, onlar hər addımda bu nifrəti nümayiş etdirməyə çalışırlar”. Bunu baki-xeber.com-a şərhində politoloq Mehman İsmayılov Azərbaycanın ağırlıqqaldırma millisinin İrəvanda keçirilən Avropa çempionatından imtina etməsinə şərh verərkən bildirib.
M.İsmayılov bir müddət əvvəl bu ölkə ərazisində keçirilən Türkiyə və Ermənistan futbol üzrə milli komandalarının görüşündə matçdan əvvəl ermənilərin təxribatlarını yada saldı və qeyd etdi ki, Nuh peyğəmbərin şəklindən tutmuş bütün dünyanın faşist, nasist kimi tanıdığı Njdenin portretlərindən tutmuş Azərbaycan Xalq Cumhuriyyətinin və Osmanlının siyasi simalarını qətlə yetirən NEMEZİS terror təşkilatının atributlarına qədər stadionda nümayiş etdirilib. O xatırlatdı ki, “Daşnkstyün”nun təşkil etdiyi NEMEZİS terror qruplşması Fətəli xan Xoyskini, Behbud bəy Cavanşiri, Xəlil bəy Xasməmmədovu, Tələt Paşanı qətlə yetirdi. “Türkiyə və Ermənistan milli komandaları arasında keçirilən futbol matçında səsləndirilən terror şüarları da, Azərbaycan bayrağının yandırılması da bir daha göstərdi ki, ermənilər terrordan anti-türk, anti-Azərbaycan kampaniyaları üçün istifadə etməkdədirlər. Azərbaycan bayrağının İrəvanda yandırılmasının şahidlərindən biri də Ermənistanın baş naziri Nikol Paşinyan idi ki, o bu vandalizmi sakitliklə seyr edirdi. Azərbaycan bayrağının bir məşhur erməni tərəfindən yandırılması və sonra da onun həbs olunmaması, polis şöbəsinə aparılıb sərbəst buraxılması, bu cinayətkarın da deputatlar və erməni cəmiyyəti tərəfindən “qəhrəman” kimi qarşılanması erməni cəmiyyətinin nə qədər aşındığını göstərən bariz bir nümunədir. Yazıqlar olsun ki, Ermənistan cəmiyyəti bu nifrətin içində bu dərəcədə boğulmaqdandır. Azərbaycanın Gənclər və İdman Nazirliyinin, Milli Olimpiya Komitəsinin verdiyi qərar olduqca doğru qərardır. Bizim idmançıların yarışda iştirakdan imtina etməsi, o şəraitdə yarışda iştirak etmələrinin mümkün olmamasının çox doğru təsəvvür edilməsi göstərir ki, Azərbaycanın idman rəhbərliyi düzgün addım atıb. Ksenofobiya, nifrət şəraitində təşkil olunan yarışda iştirak etmək olmazdı, bu idmançılarımız üçün çox təhlükəli olardı. Ermənistan sübut etdi ki, kiçik bir səhnədə Azərbaycan və dünyanın digər ölkələrinin idmançılarının təhlükəsizliyini təmin edə bilmək potensialında deyil. Üstəlik də, Azərbaycan bayrağını yandırıb nifrəti yayan və onu körükləyən cinayətkarı “qəhrəman” kimi qarşılamaları onu göstərir ki, Ermənistanın birinci şəxsindən tutmuş sadə nümayəndəsinə qədər bu nifrətin, bu türkəfobiyanın, Azərbaycanfobiyanın içərisində boğazlarına qədər bataqlığa batıblar. Azərbaycan idmançılarının İrəvanda qalıb çempionata qatılmaları onların həyatı üçün böyük təhlükə olardı. Bütün dünyaya çatdırılmalıdır ki, Ermənistan beynəlxalq idman tədbirlərini keçirtmək iqtidarında, idmançıların təhlüləsizliyini təmin etmək, onlara normal yarış şəraiti yaratmaq gücündə deyil. Bizim idmançıların geri çağırılması düzgün addımdır, çünki o şəraitdə iştirak etmək olmaz...
Qısa bir xatırlatma etmək istəyirəm: 2015-ci ildə Bakıda keçirilən İlk Avropa Oyunlarında Ermənistan idmançılarının iştirakını, Azərbaycan Prezidentinin şəxsən erməni idmançını mükafatlandırmasını bütün dünya gördü. Azərbaycan göstərdi ki, bütün beynəlxalq tədbirləri yüksək səviyyədə təşkil etməyə qadirdir, təhlükəsizliyi lazımı şəkildə həyata keçirə bilir, heç bir milli ayrıseçkiliyə yol vermir. Bu faktlar sivil Azərbaycan dövləti ilə nifrətin, ksenofobiyanın və türkəfobiynın içində boğulan Ermənistan arasında fərqi çox aydın göstərir”-deyə M.İsmyılov vurğuladı.
Qeyd edək ki, yarışdan imtinaya səbəb kimi, Ermənistanın təhlükəsizliyi təmin etməməsi göstərilib və Azərbaycan idmançılarının vətənə qayıtması barədə qərar qəbul edilib.
İradə SARIYEVA
