Separatçılar yenə də başlarını başlara qoşmaqdan çəkinmirlər, əksinə bir az da irəli gedərək özlərinə aid olmayan məsələlərə dair “şərh” verməyə cəhd göstərirlər.
Belə ki, TÜRKSOY-a üzv ölkələrin UNESCO üzrə Milli Komissiyalarının 9-cu iclasının iştirakçılarının “Türk dünyasının mədəniyyət paytaxtı” Şuşaya səfər etməsi separatçıları əməlli-başlı yandırıb-töküb.
Qarabağdakı separtçıların “xarici işlər nazirliyi” Beynəlxalq Türk Mədəniyyəti Təşkilatına üzv ölkələrin UNESCO üzrə Milli Komissiyalarının nümayəndə heyətinin aprelin 8-də Şuşada olmasını “pisləyib”. “Nazirlik” bundan başqa bir sıra iddialar da səsləndirib ki, bunların tamamilə həqiqətəuyğun olmadığı məlumdur. Əlbəttə, bu separatçı tör-töküntüsünün boş xülyalarından və sərsəmləmələrindən başqa bir şey deyil. Şuşa tarixi Azərbaycan şəhəridir və Azərbaycan dövlətinin ayrılmaz parçasıdır, türk dünyasının mədəniyyət paytaxtıdır. Bu baxımdan da, separatçıların iddiası anlaşılan deyil.
“Düşünürlər ki, yalanları ilə yenə ictimai rəyi çaşdıra bilərlər, amma separatçılar boşuna özlərini yorurlar”
Mövzuya şərh verən siyasi şərhçi Azər Həsrət bildirdi ki, ermənilərin belə yalan-palanları yenə də dünya rəyini çaşdırmağa hesablanıb. “Bu bizim üçün təəccüblü deyil, heç yeni də deyil. Bunu deməyə də ehtyac yoxdur. Amma niyə belə edirlər? Bu bəlli məsələdir. Ermənilər yalan informasiya ilə dünyanın diqqətini yayındırmağa öyrəşiblər, İstəyirlər ki, öz uydurduğu yalanlara dünyanı inandırsınlar və o inandırdıqlarını da sonra səfərbər edib üstümüzə gətirsinlər. Əlbəttə, Şuşa ilə bağlı hər hansı bir mübahisə və müzakirə açılması mümkün deyil, çünki Şuşa doğurudan da bir Azərbaycan, bir türk şəhəridir. Bu şəhərin əsasını kimin qoyduğu, orada kimlərin yaşadığı, oranın ümumiyyətlə kimə məxsus olduğu bəllidir. Bunu ermənilərin özləri də yaxşı bilirlər. 30 ilə yaxın oranı işğalda saxladılar deyə Şuşa dönüb erməni şəhəri olmadı ki. Sadəcə olaraq, bunlar hay-küy salmağa öyrəşiblər. İndi də TÜRKSOY-a üzv ölkələrin UNESCO üzrə Milli Komissiyalarının 9-cu iclasının nümayəndələrinin Şuşa səfərindən narahat olublar və düşünürlər ki, yalanları ilə yenə ictimai rəyi çaşdıra bilərlər, amma separatçılar boşuna özlərini yorurlar və bizi də məşğul edirlər. Yaxşı olardı, ermənilər bütün bu əsassız iddialarından əl çəkib normal insanca yaşamağın yollarının müzakirəsinə başlasınlar. Yəni yaxşı olardı ki, Qarabağdakı ermənilər artıq Azərbaycan Respublikasının vətəndaşı olmaqdan, yaxud da ki, Azərbaycan vətəndaşlığını istəmədiklər halda Azərbaycan torpaqlarını tərk etməkdən başqa seçimlərinin qalmadığının fərqinə varsınlar. Yəni bu iki seçimdən başqa onların üçüncü bir seçimi yoxdur. Şuşa kimindir? Qarabağ kimindir? Bunlar artıq keçmişdə qalmış mənasız müzakirələrdir. Əlbəttə, Şuşa Azərbaycanındır, Qarabağ Azərbaycanındır. Bütün dünya da bunu belə qəbul edir, belə tanıyır. Şuşaya təkcə TÜRKSOY gəlməyib ki, Şuşaya dünyanın hər tərəfindən, Avropa, Asiya, Afrika ölkələrindən insanlar gəlir. Hamı gəlib orada qurulan arxitekturaya baxırlar, abidələrə baxırlar və görürlər ki, bura bir türk, Azərbaycan şəhəridir, erməni şəhərinə heç br görsənişi ilə bənzəmir. Ona görə də buna o qədər bənd olmaq lazım deyil”.
A.Həsrət deyir ki, bununla yanaşı işimizi ehtiyatlı tutmalıyıq. Onun bildirdiyinə görə, ermənilər hanısa bir yalan informasiyanı uydururlar və yüz il sonra ona “istinad” edərək iddia edirlər ki, “görürsüz, yüz il əvvəl də belə idi, biz belə demişdik və dünya da bunu qəbul etmişdi”. A.Həsrətin fikrincə, ona görə də biz də alternativ informasiyamızı yetərincə geniş yaymalıyıq ki, yüz il sonra araşdırma aparanların qarşısına həm də bizim haqlı mövqeyimiz çıxsın.
İradə SARIYEVA
