"Laçın yolunda baş tutan ekofəalların aksiyasının birbaşa olmasa da, bir sıra dolayı müsbət nəticələrindən danışmaq mümkündür. Ancaq əlbəttə, ekofəalların aksiyasının davam etdirilməsi heç şübhə edilməməlidir ki, özünün məntiqi sonluğu və əsl hədəfinə yetişəcək. Birbaşa olmayan nəticələr dedikdə burada nəzərdə tutulur ki, əvvəla dünya ictimaiyyəti və rəsmi dairələrə Ermənistanın bu yolla vəziyyəti gərginləşdirməyə xidmət edən şübhəli yüklərin daşındığı sübut olundu. Çünki ekofəallar bu yolu nəzarətə götürdükdən sonra Ermənistan Xankəndinə şübhəli yükləri və silahlı şəxsləri daşımaq üçün ciddi şəkildə alternativ yollara baş vurdu. Hətta Xankəndi Turşsu istiqamətində torpaq yollardan bu məqsədlə istifadə etdikləri aydınlaşdı. Bu yollarda Azərbaycan Silahlı Qüvvələrinin tam əsaslı olaraq Ermənistanın gizli yük daşımasının qarşısını almaq cəhdləri göstərdi ki, bu da ermənilər tərəfindən təxribata çevrildi və nəticədə hər iki tərəfdən itkilər oldu. Yəni, dünya ictimaiyyətinin və rəsmi dairələrin nəzərinə şübhəsiz şəkildə çatdırıldı ki, Ermənistan bu yoldan Xankəndinə gizli yüklərin və silahlı şəxslərin daşınmasında maraqlıdır. Buna görə də Azərbaycan ekofəallarının keçirdiyi bu aksiya ciddi əsaslara malikdir".
Bu sözləri SİA-ya açıqlamasında "Bakı Xəbər" qəzetinin baş redaktoru, siyasi şərhçi Aydın Quliyev deyib.
Onun sözlərinə görə, ekofəalların aksiyası başladıqdan sonra burada bütün avtomobillərin və gediş-gəlişin nəzarətə alınması ona gətirib çıxardı ki, Xankəndində və onun ətrafında Azərbaycana aid olan qızıl və dəmir yataqlarının qanunsuz istismar prosesi müəyyən qədər dayandırıldı: "İndi bəlli deyil ki, həmin ərazilərdə istismar işləri davam edir, ya yox. Amma faktdır ki, çıxarılmış təbii ehtiyatların Laçın yolu vasitəsilə İrəvana və başqa yerlərə daşınması prosesi faktiki olaraq dayandırılıb.
Xankəndində gəldiyi gündən pozucu və təxribatçı rol oyanayan, burada insanları Azərbaycanla inteqrasiyadan mümkün vasitələrlə çəkindirməyə çalışan və ziyanlı rol oynayan Vardanyanın sözün həqiqi mənasında tutduğu postdan qovulmasından ibarət oldu ki, bu da ekofəalların orada keçirdiyi aksiyanın təsirli nəticələrindən biri kimi dəyərləndirilə bilər".
Aydın Quliyev sözlərinə belə davam edib: "Birbaşa olmayan başqa və həm də çox əhəmiyyətli nəticələrdən biri də ondan ibarətdir ki, bu gün həm bölgədəki təhlükəsizlik üçün məsuliyyəti üzərinə götürmüş Rusiya, həm də Azərbaycan Ermənistan normallaşmasında vasitəçilik iddiasında olan digər ölkələr, o cümlədən Avropa Birliyi təmsilçiləri, ABŞ-ın nümayəndələri burada nə baş verdiyini yaxşı anlayırlar. Onlar bir növ Laçın yolu üzərində məsələnin həll edilməsini çox ciddi bir problem olduğunun nəhayət fərqinə varıblar. Faktdır ki, bu gün həm Rusiyada, həm də Qərb ölkələrində Laçın yolu ilə bağlı bir həll yolunun tapılması üçün ciddi iş gedir və baxırlar ki, Ermənistanla müqayisədə Azərbaycan daha konstruktiv və təşkilatlı bir mövqe tutur. Çünki Ermənistanın nail olmaq istədiyi hədəf ondan ibarətdir ki, Laçın yolunda yüklər hər hansı bir maneəsiz və nəzarət olmadan daşınsın. Ancaq beynəlxalq məhkəmənin qətnaməsində aydın şəkildə ifadə olundu ki, Laçın yolunda yüklərin maneəsiz daşınması heç də onun nəzarətsiz daşınmasından ibarət deyil. Azərbaycan bunu beynəlxalq ictimai rəyə oturda bildi və onların üzərində nəzarətin qoyulması Azərbaycanın suveren haqqı, hüququdur.
Artıq dünyada başa düşülür ki, Azərbaycanın Laçın yolundakı məsələyə belə ciddi və prinsipial yanaşması səbəbsiz deyil və nəhayət bu problemin bir həlli tapılmalıdır. Təbii ki,Laçın yolu ilə bağlı yaranmış problemin həlli heç də ermənilərin dediyi kimi orada yüklərin və şəxsi heyyətin maneəsiz hərəkətindən ibarət deyil. Dünya başa düşür ki, Laçın yolunda nəzarət mexanizmi qurulmalıdır. Bu ekofəalların apardığı mübarizənin nəticələrindən biridir və çox əhəmiyyətlidir".
Ayşən Vəli
