Nəhayət Birləşmiş Ştatlar bunu etdi. ABŞ Ermənistan şirkətlərinə sanksiya tətbiq edib. ABŞ Ticarət Departamenti tərəfindən qoyulan məhdudiyyətlər Rusiya hərbi-sənaye kompleksini dəstəkləmək üçün ixrac nəzarətindən yan keçməklə ABŞ istehsalı məhsulların alınması cəhdləri ilə əsaslandırılıb.
Bildirilib ki, Ermənistan da daxil olmaqla 10 ölkədən 28 firmanın ixracına məhdudiyyətlər qoyulub. Buna səbəb kimi Rusiya ilə hərbi-sənaye əlaqələrinin yaradılması göstərilir.
Bununla yanaşı, ABŞ Maliyyə Nazirliyi Rusiya Federasiyasına qarşı tətbiq edilən sanksiyalarla bağlı Ermənistan tərəfinə xəbərdarlıq edib. Belə ki, ABŞ Maliyyə Nazirliyinin yaydığı bəyanata əsasən, Amerikanın maliyyə nazirinin birinci müavini Adevale Adeyemo Ermənistanın baş nazirinin müavini Mqer Qriqoryan ilə görüşüb. Onlar Ermənistandakı son iqtisadi hadisələri müzakirə ediblər. Adeyemo həmçinin ABŞ-ın Rusiyaya qarşı sanksiyaları və ixrac nəzarətindən yayınmasının qarşısını almaq üçün Birləşmiş Ştatların qlobal səylərinə diqqət çəkib.
“Ümid edirəm ki, heç olmasa bundan sonra ABŞ Ermənistanın yaramaz əməllərinə qarşı davamlı mövqe sərgiləyəcək”
Məsələyə münasibət bildirən “İki sahil” qəzetinin baş redaktoru Vüqar Rəhimzadə hesab edir ki, Birləşmiş Ştatlar bununla Ermənistana öz həddini bildirir: “Onsuz da Birləşmiş Ştatlar böyük dövlət olaraq Ermənistanın sanksiyalardan yayınmasının fərqində idi. Bilirdilər ki, mövcud hakimiyyət bundan yayınaraq müəyyən siyasi dividendlər qazanmağa çalışır. Müxtəlif səbəblərdən Vaşinqton bunu görməzdən gəlirdi. Ancaq görəndə ki, Ermənistan getdikcə daha böyük miqyasda sanksiyaların pozulmasında iştirak edir, bu zaman konkret müəyyən addımların atılmasına başladılar. O baxımdan hesab edirəm ki, Vaşinqtonun məlum demarşı Paşinyana xəbərdarlıq xarekteri daşıyır. Ancaq ABŞ-ın xəbərdarlığına rəğmən Ermənistanın Rusiya ilə sözügedən əlaqələrdən yan keçəcəyini də düşünmürəm. Çünki Ermənistan iqtisadi baxımdan Rusiyadan böyük ölçüdə asılıdır. Başqa bir tərəfdən, Ukrayna müharibəsinə görə Rusiya iş adamları biznesini Ermənistana daşıyıb. Bütün bunlardan Ermənistan ötən 1 il ərzində 1 milyard dollardan çox gəlir əldə edib və s. Ümid edirəm ki, heç olmasa bundan sonra ABŞ Ermənistanın yaramaz əməllərinə qarşı davamlı mövqe sərgiləyəcək. Çünki Ermənistan davamlı olaraq sanksiyalardan yayınır və bununla bağlı çoxsaylı faktlar var. Düzdür, ABŞ Ermənistana çox təzyiq etməkdən ehtiyat edir. Hesab edirlər ki, Ermənistan ərazisində Rusiya hərbi bazası olduğundan, təzyiqlər artsa, ölkədə çevriliş olacaq və Ermənistan tamamilə Rusiyanın qucağına düşəcək. Belə olan halda birdən-birə İrəvanın Rusiyanın təsirindən tamamilə çıxması qeyri-mümkündür. Ona görə də bir qədər fərqli formada təzyiq göstərirlər”.
Vidadi ORDAHALLI
