Ermənistan Baş naziri Nikol Paşinyan parlamentdə növbəti anormal bəyanatla çıxış edib. Ötəngünkü təxribatı dolayısı ilə ölkəsindəki “beşinci kolonun” törətdiyinə işarə edən Paşinyan bildirib ki, təhlükəsizlik xidməti bu məsələ ilə ciddi məşğul olmalıdır.
Baş nazir qeyd edib ki, Ermənistan silahlı qüvvələrinin tərkibində xarici ölkələrin agentlərinin olması istisna edilmir:
“Məsələn, yüksək rütbəli zabit orduda təşviş yaradır və tabeliyində olanlara döyüş mövqelərini tərk etməyi tapşırır. Bu cinayətlərin motivlərini aşkar etmədən vəziyyəti izah etmək olmaz. Deməli, bu zabitlərin komandirləri ilə yanaşı, onların yuxarıdan əmr aldıqları daha bir instansiya var”.
Paşinyanın öz ordusunda “5-ci kalon” izləri axtarmaq cəhdləri nə ilə uzah oluna bilər?
Hərbi-siyasi ekspert Emin Həsənli “Bakı-Xəbər”ə bildirdi ki, bu, Ermənistanın köhnə oyunlarıdır: “Zamanında beynəlxalq güclər məcbur edirdi ki, Ermənistan sülh müqaviləsini imzalasın. Ermənistan parlamentində Köçəryanın, Sarkisyanın tərəfdarları qətliam törətdilər. Bununla da məsələ uzandı. Ondan sonra daxildə edilən narazılıqlar ortaya çıxdı. 2016 - cı ildən sonra Ohanyan istefa verdi və bu proses yenə ləngidi. Dəfələrlə bütün bunlar davam edib. Paşinyan da öhdəlik götürdü ki, sülh sazişi imzalanacaq, ərazilər qaytarılacaq, BMT Təhlükəsizlik Şurasının qərarlarına əməl olunacaq. Ancaq etmədi, 10 noyabr bəyənatının prinsiplərini pozdu. İki maddə xüsusilə pozulub. Birincisi Qarabağdan separatçıların çıxmağıdır. 10 minə qədər separatçı hələ də Qarabağdadır və bu, Paşinyanın əmri ilə baş verib. Paşinyan istəsə onları çıxara bilər. Çıxıb açıq bəyan edə bilər ki, onlar ordan çıxmalıdır, amma mən çıxara bilmirəm. Bunu demir, əksinə, onlara - Qarabağa müxtəlif yollarla yeni silahlar göndərir. 2021 - ci ilin sonuna kimi Avropa Birliyinin və Rusiyanın vasitəçiliyi ilə sülh müqaviləsi imzalayacaqdı, onu pozdu. Amerikanın vasitəçiliyi ilə danışıqları dəfələrlə pozub. Bir dəfə dedi ki, daxildə guya seçkidən əvvəl Ermənistanda generallar onun istefasını tələb edir. Bunlar razılaşmış komediyalardır. Bilirsiz bu nəyə bənzəyir? Qarabağda, Şuşada bizim postumuza ilk dəfə qumbara atanda, rus sülhməramlıları dedi ki, əgər o psixi xəstədirsə, öz postuna nə üçün atmır? Daha sonra atəşi pozdular və dedilər ki, sərxoşdur. Sonrakı müddətdə isə bunu gizlədə bilmədilər. İndi də Paşinyan beynəlxalq ictimaiyyətə və Ermənistan auditoriyasına cavab verməlidir”.
Ekspertin sözlərinə görə, Paşinyan eyni zamanda Azərbaycan Prezidentinə cavab verməlidir: “Amma hazırda bəhanələrlə uzadır. Beynəlxalq Birlik ikili standartlar da yerinə yetirsə, görünən budur ki, onlar da istəyir sülh imzalansın. Başa düşürlər ki, Ermənistanın mövcudluğu sual altına düşə bilər. Ermənistanın daxilində olan bir qrup əsgər valideynləri də müharibə istəmirlər. Onlar Ermənistanın baş nazirindən, müdafiə nazirindən tələb etdi ki, bizim uşaqlarımız müharibəyə getməsin. Və artıq böyük itkilər var, həmin valideynlərə cavab vermək lazımdır. Ermənistan beynəlxalq aləmdə də Amerikaya, Qərbə göstərmək istəyir ki, Rusiyanın Ermənistanda təsir dairəsi güclüdür və məqsədyönlü siyasət yeritməyə çalışır. Beləliklə, bu cür oyunlar qurur və bu da çox təhlükəlidir. Necə ki, 2020 - ci ildə böyük cəza aldı, budəfəki cəza isə Ermənistanın mövcudluğunu sual altında qoyacaq. Ermənistanın baş nazirinin son bəyanatı da uğursuz bir cəhddir, heç bir məntiqi əsası yoxdur. İkincisi, fərariliyin üstünü örtmək istəyir. Bilirsiz ki, 2020 - ci il müharibəsində, özlərinin etiraf etdiyinə görə, Ermənistan ordusunda 10 min fərari var idi. Sonra da 1000 nəfər 2022 - ci ildə Laçın - Kəlbəcər istiqamətində döyüşlərdə artdı. İndi də fərarilik artıb. Ermənistan ordusunun psixiloji cəhətdən zəif olduğunu, hazırsız olduğunu, əsgərlərin qorxduğunu və bu fərariliyi gizlətmək üçün bu cür cəfəng fikirlər irəli sürür. Bu fikirlərin də heç bir əsası yoxdur. Ermənistan ordusu qorxaqdır, döyüşmək istəmir, fərarilik edir. Onlar yaxşı başa düşür ki, Azərbaycan ordusu onlardan qat-qat güclüdür. Mənasız məğlub olmaq istəmir, qaçmaq istəyir. Bu qaçışı da, fərariliyi də öz istədiyi kimi əsaslandırır. Ermənistan Azərbaycanın şərtlərini normal yolla qəbul etməsə, hərbi yolla qəbul edəcək. Başqa yolu yoxdur”.
Məhəmmədəli QƏRİBLİ
