Ermənistanın Baş naziri Nikol Paşinyan parlamentdə “Hökumət saatı” zamanı çıxışında ziddiyətli fikirlər səsləndirib. Bir tərəfdən bəyan edib ki, Ermənistanın Qarabağı Azərbaycanın bir hissəsi kimi tanımasını 2018-ci ildə deməməsi səhv idi.
O biri tərəfdən qeyd edib ki, bu, Ermənistan üçün tələ idi: “Ermənistan Qarabağı Azərbaycanın bir hissəsi kimi tanıyıb. Əgər Madrid prinsiplərindən əvvəl Qarabağın öz müqəddəratını təyinetmə yeri SSRİ idisə, Madrid prinsiplərindən sonra Ermənistan tərəfinin “parlaq” diplomatiyası nəticəsində Azərbaycan Qarabağın öz müqəddəratını təyin etdiyi məkana çevrildi. Bizim səhvimiz bu oldu ki, bunu hələ 2018-ci ilin mayında deməli idik, lakin fikirləşdik ki, gələcəkdə birtəhər bu tələdən çıxa bilərik. Tələ beynəlxalq səviyyədə razılaşdırıldığı üçün biz bunu edə bilmədik. Madrid prinsiplərindən əvvəl Ermənistan tərəfinin mövqeyi belə idi ki, Qarabağ heç bir zaman müstəqil Azərbaycanın tərkibində olmayıb və SSRİ-nin dağılması kontekstində öz müqəddəratını təyin etmək hüququndan istifadə edir. SSRİ-nin digər subyektləri, Alma-Ata Bəyannaməsində qeyd olunanlara əsasən, öz müqəddəratını təyinetmə hüququndan istifadə edib müstəqillik əldə etdilər, o cümlədən də Qarabağ. Və nəticədə Qarabağ SSRİ-dən ayrıldı”.
“5 il əvvəl Madrid prinsipləri ilə bağlı məqamları ona görə etiraf etmədi ki, eyforiyaya qapılmışdı”
Məsələyə münasibət bildirən politoloq Tural İsmayılovun fikrincə, Paşinyan dəfələrlə Madrid prinsiplərindən bəhs edib: “Əslində bununla o, yaxşı başa düşür ki, Qarabağın Azərbaycandan kənarda heç bir taleyi mümkün ola bilməz. Onsuz da Azərbaycan 44 günlük müharibədə qazandığı qələbə ilə Qarabağın taleyini həll edib. Xankəndi və digər yaşayış məntəqələri üzərində Azərbaycanın yurisdiksiyası tezliklə bərpa olunacaq. Görünən odur ki, Nikol bütün bunların fərqindədir. Ona görə də daxili auditoriyada, erməni ictimayətində, xüsusən də millətçi kəsim arasında bu məsələ ilə bağlı manipulyasiyaların olacağını yaxşı başa düşür. İndiki Rusiya mərkəzli müxalifət Paşinyana qarşı məhz Qarabağ kartından istifadə edərək bir informasiya kollapsı yaradıb. Bütün bunların fərqində olan Paşinyan diqqəti öz üzərindən yayındırmaq üçün Köçəryan-Sarkisyan cütlüyünə qarşı informasiya savaşı aparır. Həmçinin, xalqın narazılıqlarını onların üzərinə kökləmək üçün bu tip açıqlamalar verir. Eyni zamanda hesab edirəm ki, bu, Paşinyanın Praqa görüşündə və Brüsseldə aldığı qərarların növbəti davamıdır. Çünki Paşinyan məhz Praqada imza atdığı sənəddə də Azərbaycanın ərazi bütövlüyünü tanıyırdı. Ermənistanın artıq bundan başqa da yolu qalmayıb. Ona görə ki, Azərbaycanın ərazi bütövlüyünü tanımamaq Ermənistan üçün böyük iqtisadi-siyasi xaoslar vəd edir. Bununla belə, bu, Ermənistanın öz xoşu ilə bağlı olan məsələ deyil. Çünki Azərbaycan 2020-ci ildə hərb yolu ilə öz ərazi bütövlüyünü bərpa edib. Tezliklə Xankəndidə Azərbaycan qanunları işlək vəziyyətində olacaq. Artıq rus sülhməramlılarının Qarabağı tərk etməsinə çox az vaxt qalıb. Paşinyan da bütün bunların fərqində olduğu üçün artıq indidən ictimai rəyi bu məsələyə fokuslamağa və ona qarşı olan narazılıqları yatırmağa çalışır. Paşinyan 5 il əvvəl Madrid prinsipləri ilə bağlı məqamları ona görə etiraf etmədi ki, eyforiyaya qapılmışdı. Hesab edirdi ki, Birinci Qarabağ müharibəsində Ermənistan hərbi baxımdan qalib tərəf olduğu üçün onun bu addımı əleyhinə işləyəcək. Halbuki, hüquqi baxımdan vəziyyət Azərbaycanın xeyrinə idi. Bütün dünya dövlətləri və beynnəlxalq təşkilatlar Qarabağı Azərbaycanın tərkib hissəsi kimi tanıyırdı”.
Vidadi ORDAHALLI
