Mayın 12-də Şuşada başlanmış 5-ci Xarı Bülbül beynəlxalq folklor festivalının təşkilat məsələləri və iştirakçılarla bağlı bəzi təftişçi fikirlərə baxmayaraq özümün də iştirakçısı olduğum tədbirin məzmununa və ötürdüyü mesajlara daha çox önəm verməyin lazım olduğu qənaətindəyəm.
Xoşa gəlməyən bəzi hazırlıqlar oldusa da belə, növbəti illərdə onları aradan qaldırmaq, daha da təkmilləşdirmək mümkündür. Yuxarı başı lazım gələrsə təşkilatçılar heyətini daha təcrübəli şəxslərlə genişləndirmək olar. Ancaq istənilən canlı layihəni sonsuzluğa qədər təkmilləşdirmək mümkün olduğu üçün tənqid və təftiş cəhdlərinin də bütün hallarda olacağına inanıram. Yəni nə edilsə də, necə edilsə də ,bütün hallarda heç vaxt və heç nədən məmnun qalmayan zümrə təmsilçiləri var ki, əslində onların da ümumi mənafelər müstəvisində faydalı rol oynadıqları qənaətindəyəm. Yenə də tənqidi baxışlara ötəri bir qayıdışla Xarı Bülbül festivalının dərinliklərdəki dəyər göstəricilərinə diqqət çəkmək istəyirəm. Tədbirdə tənqid və təftişə əsas vermiş məqamlar da, onu edən şəxslərin baxışları da bugünlükdür, sabah olmaya bilər. Lakin Xarı Bülbül tədbirinin elə dəyər göstəriciləri oldu ki, onlar sabah da, sonralar da olacaq, bu gün olduğu kimi sabahlar da öz təsirini və rolunu göstərəcək.
Əvvəla, bu beynəlxalq festival bir qiymətli ənənənin ölmədiyini, daha da möhkəmləndiyini ifadə etdi. 1992-ci ildə Şuşa işğal olunanda bəlkə hamı bu qənaətdə idi ki, "gedən qayıtmaz, Xarı Bülbül bayramı bir daha olmayacaq" və sair. Ancaq mayın 12-də Cıdır düzündə o leysanın, qırğın-qiyamətin altında keçirdiyimiz açılış mərasimindən sonra yəqin kimsə "Cıdır düzündə Xarı Bülbül festivalı daha keçirilməyəcək" kimi qənaətə heç vaxt gəlməz. Çünki mayın 12-də ənənəni bir qədər də bərkitdik.
İkinci, 5-ci festivala beynəlxalq format elementlərinin daxil edilməsi onun dəyər göstəricilərini xeyli artırdı. Dünyanın müxtəlif ölkələrinin sənət adamlarının festivalda çıxışlarını nəzərdə tuturam. Əcnəbi sənət qrupları yəqin ki, Şuşanın 28 illik işğaldan sonra hərblə öz əzəli sahiblərinə geri alınması faktının nə demək olduğuna laqeyd qalmayacaqlar. Bu çox önəmli mətləbdir. Xaricdən gətirilmiş sənətçilərin Tunisdən, Pakistandan, Malidən, Gürcüstandan, Türkiyədən və ya hansı ölkədən olmalarından asılı olmayaraq faktın özü önəmlidir. Şuşanın 28 il işğalda qaldığını, Xarı Bülbülün bir Azərbaycan mənəvi brendi olduğunu bilən əcnəbilərin çevrəsini genişləndiririk. Buna böyük ehtiyac olduğunu kimsə inkar edə bilməz.
Üçüncü, əcnəbi sənət qruplarının Şuşada öz performansları ilə irticaçı ermənilərə verdikləri mesajların ayrı bir tutumu var - "Biz Şuşanın əsl sahiblərinin çağırışları ilə gəldik".
Dördüncü, ənənəvi Xarı Bülbül festivalları Şuşanın bir daha heç vaxt müdafiəsiz buraxılmayacağını, yad əllərə keçməyəcəyini hər kəsə anladır, dünya erməniçiliyinin hətta Abşeron yarımadasını belə "Böyük Ermənistanın" içində görən qoxmuş zirzəmi xülyalarının son tellərini də kəsir...
Məmnun qalmadığım tək bir təəssüratımı da bölüşəcəm. Festivalın açılışında hörmətli Prezidentin çıxış edəcəyini nədənsə çox gözləyirdim...
Həmişə var ol, Xarı Bülbül!
Yaşasın Xarı Bülbül festivalları ənənəsi!
Bu ənənə Şuşanın təkcə tarixi yox, təkcə özünəxaslıq yox, həm də əbədilik rəmzidir...
Aydın QULİYEV
