İran Azərbaycan tərəfinə rəsmi hərbi kanallar vasitəsilə Naxçıvana daha çox hərbi təchizat funksiyasını yerinə yetirən təyyarələrin uçuşuna qadağa qoyulduğunu çatdırıb. Bu haqda hərbi mənbələrdən bildirilir.
Mənbə İranın Azərbaycana qarşı növbəti xəyanətinin Ermənistanın diqtəsi ilə həyata keçirildiyini iddia edib. İran nəqliyyat-tranzit məsələlərində Azərbaycan ərazisindən daha çox istifadə edir. Bu, əsasən, Şimal-Cənub nəqliyyat dəhlizi çərçivəsində həyata keçirilən daşımalarda özünü göstərir. Bir sıra təhlilçilər hesab edir ki, İranın Azərbaycana növbəti dəfə zərbə vurmaq cəhdi Naxçıvandakı hərbi hissələrin təchizatına bir o qədər də təsir göstərməyəcək. Çünki Azərbaycan bu marşrutdan çox az istifadə edir və daha çox digər marşrutlar üzrə daşımalara üstünlük verir. İranın bu addımı Naxçıvanın müdafisini zəiflədə bilərmi?
Arzu Nağıyev: “Bu addımının Naxçıvanın təhlükəsizliyinə heç bir təsiri olmayacaq”
Milli Məclisin deputatı Arzu Nağıyev “Bakı-Xəbər”ə açıqlamasında bildirdi ki, İran nə qədər bu istiqamətdə addımlar atsa da, bu, qonşuluq siyasətinə zidd gediş kimi qəbul edilməlidir: “Azərbaycan İran üçün ən mühüm qonşu və portnyorlardan biridir. Vaxtıilə Ermənistan vandalizm edəndə, ərazilərimizi işğal altında saxlayanda İran belə addımlar atmırdı. Təəssüflər olsun ki, İran belə addımlar atır, hətta hərbi istiqamətdə müdaxilələrə çalışır. Naxçıvana hava məkanı ilə bağlı qoyduğu qadağa da bu amillərdən biridir. Naxçıvan Əlahiddə Ümumqoşun Ordusu çox güclü potensiala malikdir. Mütəxəsisslər də bilir ki, həmin ordunun özü-özünü qorumağa tam gücü yetər. Hətta kənardan dəstək olmasa belə, həmin Ordu aylarla özünü təmin edə bilər. Orda kifayət qədər texnikamız, əsgər və zabitlərimiz var. İranın bu addımının bizə ciddi təsiri olmayacaq. Həmin Ordu yarananda təminat üçün yalnız bir marşrut nəzərdə tutulmayıb. Alternativ vasitələr kifayət qədərdi. Bu addımın Naxçıvanın təhlükəsizliyinə heç bir təsiri olmayacaq. Narahat olmağa dəyməz”.
Şair Ramaldanov: “Alternativ istiqamətlər kifayət qədərdir”
Ehtiyatda olan polkovnik, hərbi ekspert Şair Ramaldanov da hesab edir ki, İranın son dövrlərdəki hərəkətləri Azərbaycanın İkinci Qarabağ müharibəsindəki qələbəsinə münasibətini göstərir. Onun sözlərinə görə, rəsmi Tehranın Naxçıvana hərbi təchizat funksiyasını yerinə yetirən Azərbaycan təyyarələrinin uçuşuna qadağa qoyması heç bir effekt verməyəcək və İran istəyinə nail olmayacaq:
"Qələbəmizə dostlar sevinir, düşmənlər isə kədərlənir. İranın son hərəkəti də bunun təzahürüdür. Biz Naxçıvan hava yolundan intensiv istifadə etmirik. Alternativ istiqamətlər isə kifayət qədərdir. Bu mənada, Naxçıvandakı qüvvələrin hərbi tədarükü əvvəlkitək davam edəcək və cənub qonşumuzun qadağası bizə təsir etməyəcək”.
Təbiidir ki, İranın atdığı bu addımlar bizə təzyiq xarakterlidir. Azərbaycanın da əlində İrana təzyiqlər etmək üçün kifayət qədər təsir rıçaqları var. Hazırda az qala bütün dünya tərəfindən embarqoya məruz qalan, sanksiyalar altında olan İranın öz üzünə əlavə qapıları da bağlamaq niyyəti heç də doğru siyasət kimi qəbul edilə bilməz. Bu cür addımları ilə İran özü ətrafındakı halqanı daha da daraldır.
Məhəmmədəli QƏRİBLİ
