“Şəhərlər bərpa olunarkən hesab edirəm, hər bir şəhərdə dağıdılmış yerlər qalmalıdır ki, bunu heç kim heç vaxt unutmasın. Şəhərsalma işləri aparılarkən müəyyənləşdirib, sonra mənə məruzə edin, misal üçün, Ağdam şəhərinin, Füzuli şəhərinin, digər şəhərlərin hansı hissəsi, hansı kvartalı dağıdılmış vəziyyətdə qalsın, Ermənistan işğalının açıq səma altında muzeyi kimi. Hesab edirəm ki, azad olunmuş bütün şəhərlərdə işğal muzeyləri də yaradılmalıdır”.
Bunu Prezident İlham Əliyev yanvarın 6-da 2020-ci ilin yekunlarına həsr olunmuş videoformatda keçirilən müşavirədə deyib. Dövlət başçısı qeyd edib ki, memorial komplekslərlə, bizim zəfərimizi əks etdirən abidələrlə bərabər, işğal muzeyləri də yaradılmalıdır: “İndidən bu muzeylərin konsepsiyasını işləyin. Bu muzeylərdə Ermənistanın işğalçılıq siyasətinin ümumi mənzərəsi əks olunmalıdır. Eyni zamanda, hər bir şəhərin, hər bir rayonun öz təqdimatı orada göstərilməlidir ki, həm Azərbaycan vətəndaşları bunu heç vaxt unutmasınlar, həm də xaricdən gələn qonaqlar görsünlər biz hansı vəhşilərə qarşı müharibə aparmışıq, öz torpağımızı və Cənubi Qafqazı hansı bəladan xilas etmişik”.
Ekspertlərin fikrincə, erməni təcavüzü nəticəsində dağıdılmış ərazilərin işğal muzeyinə çevrilməsi erməni vəhşiliyinin dünyaya çatdırılmasında bir vasitə olacaq.
“Bütün bunların edilməsində məqsəd ermənilərin dinc əhaliyə qarşı törətdikləri vəhşilikləri gələcəkdə rayona gələcək xarici və yerli turistlərə göstərməkdir”
“Vəfa” Sosial-İctimai Birliyinin sədri Fatimə Hacıbəyli qeyd etdi ki, erməni təcavüzü nəticəsində dağıdılmış, viran qoyulmuş yerlər xüsusi muzeyə çevrilməlidir. Həmçinin, Qarabağ savaşında iştirak edən şəhidlərimizin adlarının əbədiləşdirilməsi üçün Ağdamda, Bərdədə və ya Bakıda abidə qoyula bilər: “Bakıda ümumi böyük soyqırım muzeyinə və abidəsinə ehtiyac var. Son 2 əsrdə kənar ölkələrin fitnəsi ilə Azərbaycanda soyqırım törədənlər, eləcə də erməni daşnaklarının və onlara yaxın insanların əlləri ilə 1905-1906-ci illərdə, 1918-ci il və 1988-ci ildən sonrakı dövrdə qətlə yetirilən insanların xatirəsinə böyük soyqırım muzeyi yaratmaq lazımdır ki, gələn qonaqlar daha çox oraya aparılsın. Müharibə varsa, şəhid də olur. Amma günahsız, dini, etnik mənsubiyyətinə görə qətlə yetirilən və soyqırıma məruz qalan şəhidlərimiz üçün özəl muzey açılmalıdır. Bu, Azərbaycanın faciəvi tarixini göstərməklə yanaşı, həm də gələcəyimizi nizamlayar”.
Həmsöhbətimiz onu da əlavə etdi ki, azad olunmuş bütün şəhərlərdə işğal muzeyi yaradılmalıdır: “Məlumdur ki, azad olunan rayonların hər birinin özünəməxsus xüsusiyyəti, tarixi abidələri var. Məsələn, Ağdamın məşhur çay evini ermənilər darmadağın ediblər. Dağıdılmış çay evini dünyaya göstərmək lazımdır. Həmçinin, Xocalı şəhərində Xocalı faciəsini əks etdirən bir muzey mütləq yaradılmalıdır. Bütün bunların edilməsində məqsəd ermənilərin dinc əhaliyə qarşı törətdikləri vəhşilikləri gələcəkdə rayona gələcək xarici və yerli turistlərə göstərməkdir”.
Günel CƏLİLOVA
