“Fransadan bir heyət getmişdi, parlament üzvləri. Əfsuslar olsun ki, sülhməramlı qüvvələr onlara bu icazəni vermişdilər. Halbuki, biz bu sülhməramlı qüvvələr qarşısında məsələ qoymuşduq ki, bizim icazəmiz olmadan heç bir xarici vətəndaş Dağlıq Qarabağa gedə bilməz. Nəticədə Fransa səfiri bizim Xarici İşlər Nazirliyinə çağırıldı, nota verildi. Biz səssiz qalmayacağıq.
İndi mənə məlumat verildi ki, Ermənistanın xarici işlər naziri Xankəndiyə gedib. Sənin orada nə işin var? Müharibə onların yadından çıxmasın. Unutmasınlar ki, dəmir yumruq yerindədir. Bu səfərlərə son qoyulmalıdır. Biz xəbərdarlıq edirik, əgər belə təxribat xarakterli addımlar atılacaqsa, Ermənistan daha da peşman olacaq. İndi münasibətlərin normallaşdırılması istiqamətində addımlar atılır. Rusiya öz vasitəçilik imkanlarını tərəflərə təqdim edib. Bu yaxınlarda Ermənistana və Azərbaycana səfər etmiş Rusiya hökumət nümayəndələrindən ibarət heyət əsasən bu mövzular haqqında söhbətlər aparmışdır.
Yaxşı, əgər münasibətlər normallaşacaqsa, o zaman belə təxribat xarakterli səfərlərə nə ehtiyac var? Nəyi göstərmək istəyirlər? Yenəmi bizi qıcıqlandırmaq istəyirlər? Unutmasınlar ki, onlara çox baha başa gəldi bu tipli addımlar. Ona görə bütün səfərlərə son qoyulmalıdır. Heç bir xarici vətəndaş bizim icazəmiz olmadan o əraziyə gedə bilməz. Heç bir beynəlxalq təşkilat, - ancaq Qırmızı Xaç istisna olmaqla, - oraya gedə bilməz. Bu, bizim ərazimizdir. Bütün dünya bu ərazini Azərbaycanın ayrılmaz hissəsi kimi tanıyır. Ermənistanın xarici işlər naziri, sən kimsən ki, oraya gedirsən? Xəbərdarlıq edirik. Əgər buna oxşar addım təkrarlanarsa, bizim cavabımız çox sərt olacaq. Elə birinci dəfə biz Xarici İşlər Nazirliyi vasitəsilə onlara xəbərdarlıq etdik. Ondan sonra xəbərdarlıq başqa cür veriləcək. Onların ayağı oradan kəsilməlidir. Otursun öz ölkəsində”. Bunu Prezident İlham Əliyev 2020-ci ilin yekunlarına həsr olunmuş videoformatda müşavirədə çıxışı zamanı deyib.
“...bəyanatın şərtlərini pozmaq cəhdləri bu ölkəyə baha başa gələ bilər”
“Resurs” Analitik İnformasiya Mərkəzinin rəhbəri, tanınmış politoloq Rasim Quliyev bildirdi ki, ölkə başçısının bu xəbərdarlığından həm Qarabağa Azərbaycanın icazəsi olmadan səfər edən xarici nümayəndələr, həm də onların qanunsuz səfərlərinə şərait yaradan, icazə verən sülhməramlılar nəticə çıxarmalıdırlar: “Bu fakta ölkəmizin birinci şəxsi tərəfindən sərt reaksiya verilməsi Rusiya sülhməramlılarının fəaliyyətinə verilən ən üstün qiymət idi. Bunu, sadəcə, bir sərt tənqid kimi yox, cənab Prezidentin sülhməramlıların bu günə qədərki fəaliyyətinə verdiyi qiymət olaraq dəyərləndirmək lazımdır. Hesab edirəm ki, cənab Prezident tənqidi, sərt fikirləri ilə bu məsələdə Azərbaycan dövlətinin birmənalı mövqeyini göstərdi və ölkəmizin 10 noyabr bəyannaməsindəki mövqeyini bir daha ifadə etdi. Bu özü çox ciddi bir siqnaldır, burada Prezident tərəfindən çox ciddi ifadə olunan münasibətdir. Bu, təkcə Rusiya sülhməramlılarının deyil, 10 noyabr bəyanatında imzaları olan Rusiyanın və Ermənistanın mövqeyinə Azərbaycanın verdiyi qiymət idi. Prezident çox ciddi xəbərdarlıq etdi. Bu, Azərbaycan tərəfinin öz imzası ilə bu bəyanatı təsdiq edənlərə bir notasıdır, bir münasibətdir. Cənab Prezident, həmçinin, Ermənistan tərəfə də çox ciddi xəbərdarlıq etdi ki, bəyanatın şərtlərini pozmaq cəhdləri bu ölkəyə baha başa gələ bilər. Fikrimcə, Prezidentin bu xəbərdarlığı həm Rusiya sülhməramlılarına, həm də indiyə qədər üçtərəfli bəyanatın şərtlərini pozmağa cəhd edən, ona əməl etməyən Ermənistana verilən mənfi qiymət idi. Eyni zamanda, Rusiyada Azərbaycan Prezidenti, Rusiya prezidenti və Ermənistanın baş nazirinin yaxın günlərdə görüşünün olacağı barədə proqnozlar verilir. Bax, həmin görüşqabağı Azərbaycanın münasibətini ifadə edən bir reaksiyadır. Yəni bu gün bu münasibət həmin görüşün əsasını təşkil edir. Bu, artıq Azərbaycanın ortaya qoyub tələb edəcəyi mövqeyini göstərir. Bu, Azərbaycanın həmin görüşdə səsləndirəcəyi mövqeyin və tələblərin əsasını yaradır. Yəni bu həm o görüşdə iştirak edəcək tərəflərə verilən siqnaldır, həm də indiyə qədər Azərbaycan xalqının ictimai rəydə olan müəyyən narahatlığına artıq dövlətin rəsmi münasibəti ifadə olundu. Mənə elə gəlir ki, cənab Prezident tərəfindən səsləndirilən bu fikirlər bu məsələyə vaxtında göstərilən çox ciddi münasibətdir və müəyyən nüanslara verilmiş qiymətdir”.
İradə SARIYEVA
