“Sülhməramlı qüvvələr. Onların orada funksiyası var. Noyabrın 10-da bu funksiya təsbit edildi. Baxmayaraq ki, indi onlar orada humanitar işlərlə məşğuldurlar, halbuki, noyabrın 10-da imzalanmış bəyanatda bu funksiya təsbit edilməyib, biz buna, necə deyərlər, göz yumuruq. Nə üçün? Çünki başa düşürük ki, orada insanlar yaşayır, başa düşürük ki, indi qış gəlib, hava soyuqdur”. Bu fikirləri Prezident İlham Əliyev 2020-ci ilin yekunlarına həsr olunmuş videoformatda müşavirədə çıxışı zamanı deyib.
Dövlət başçısı bildirib: “Orada müəyyən işlər görülməlidir ki, bu qış orada yaşayan ermənilər üçün problem yaratmasın. Ona görə biz imkan verdik. İndi yüklərin böyük hissəsi oraya Azərbaycan ərazisindən gedir. Biz imkan verdik. Bərdəyə qədər dəmir yolu ilə gedir. Ondan sonra maşınlarla Dağlıq Qarabağa aparılır. Əlbəttə, biz imkan verməyə də bilərdik.
Ermənistan 30 il bizim suyumuzu kəsib, 100 min hektar torpağı susuz qoyub. Baxmayaraq ki, həm Sərsəng, həm də Suqovuşan su anbarları o vaxt ulu öndər Heydər Əliyevin təşəbbüsü ilə və onun fəaliyyəti nəticəsində inşa edilmişdir. Ermənistan bizim suyumuzu kəsmişdi. Amma mən yenə də deyirəm, biz heç vaxt onların səviyyəsinə düşməməliyik. Bu gün Dağlıq Qarabağda yaşayan insanlar bizim vətəndaşlarımızdır. Mən demişəm, onlar görəcəklər ki, Azərbaycan rəhbərliyi altında onlar yaxşı yaşayacaqlar. Ona görə biz bu imkanları verdik. Yoxsa, Laçın dəhlizi ilə oraya yük daşımaq çox çətin məsələdir. Biz digər addımlar atdıq ki, orada humanitar işlər getsin. Yenə də deyirəm, noyabrın 10-da imzalanmış sənəddə bu, yoxdur. Amma biz yenə də imkan veririk. Bu, bizim ürəyimizin nə qədər geniş olmasını göstərir. Hesab edirəm ki, noyabrın 10-da imzalanmış bəyanat gələcək fəaliyyət üçün əsas olmalıdır. Bu bəyanatdan başqa, hər hansı bir digər sənəd imzalanmayıb”.
“Hesab edirəm ki, bu, Rusiya sülhməramlıları və onların rəhbərliyi üçün çox ciddi mesajdır”
Millət vəkili, politoloq Elman Nəsirov “Bakı-Xəbər”ə bildirdi ki, ölkə başçısı Rusiya sülhməramlılarını tənqid etməklə onlara öz vəzifəsini xatırladıb və tərəflər bundan ciddi nəticə çıxarmalıdırlar: “Cənab Prezident 2020-ci ilin yekunları ilə bağlı keçirdiyi müşavirədə bir sıra olduqca vacib məsələlərə diqqəti cəlb etdi. Bu məsələlərin sırasında xüsusilə də sülhməramlıların fəaliyyəti ilə bağlı məqam diqqəti çəkdi. Cənab Prezident vurğuladı ki, keçən ilin noyabr ayının 10-da imzalanan üçtərəfli bəyanatın məntiqinə uyğun olaraq və həmin bəyanatda əksini tapmış müvafiq bəndə uyğun olaraq, Rusiya sülhməramlıları öz missiyasını həyata keçirirlər, 10 noyabr sənədinə görə isə bu missiyada humanitar məsələlər öz əksini tapmayıb. Yəni, əslində, Rusiya sülhməramlıları humanitar missiya ilə məşğul olmamalıdırlar. Ancaq cənab Prezident vurğuladı ki, biz yenə də humanizm prinsiplərindən çıxış edərək, görürük ki, qış fəsli gəlib, orada insanlara müəyyən dəstək, köməklik lazımdır, biz bunları nəzərə alıb məlum sənəddə əksini tapmayan fəaliyyətinə belə göz yumduq, yalnız humanizm prinsiplərindən çıxış edərək. Halbuki, ermənilər bunu etməzdilər”.
E.Nəsirovun sözlərinə görə, hətta keçən əsrin 90-cı illərində ermənilər torpaqlarımızı işğal edərkən aman vermədilər ki, bizim oradakı dinc insanlar rahatlıqla çıxsınlar, onların başına min cür işgəncə, dəhşət gətirdilər, soyqırımlar həyata keçirdilər. “Amma biz ermənilərin Kəlbəcərdən çıxması ilə bağlı 10 gün onlara möhlət verdik, onda da bütün meşələri qırdılar, yandırdılar, evlərə od vurdular, elektrik dirəklərini yandırdılar. Yəni burada ekoloji terror siyasəti həyata keçirdilər. Budur onların xisləti. Bu nöqteyi-nəzərdən cənab Prezident sülhməramlıların fəaliyyəti ilə bağlı öz tənqidi fikirlərini bildirdi. Hesab edirəm ki, bu, Rusiya sülhməramlıları və onların rəhbərliyi üçün çox ciddi mesajdır. Bilsinlər ki, Azərbaycan tərəfi hər şeyi çox yaxşı görür və izləyir. 10 noyabr sənədində humanitar məsələlər öz əksini tapmayıb və Azərbaycan bunu indiyə qədər qabartmayıbsa, bu o demək deyil ki, biz bunu görmürük, bunları nəzərdən keçirmirik, bizim deməyə sözümüz yoxdur. Sözümüz hər zaman var və biz həmişə iradımızı bildiririk. Cənab Prezident bu məsələləri ona görə qaldırdı ki, qarşı tərəflər nəticə çıxarsınlar. Eyni zamanda, bu kontekstdə ölkə Prezidenti, Ali Baş Komandan Ermənistan tərəfə çox ciddi, çox kəskin ismarıclarını da ünvanladı. Xüsusilə də Ermənistanın yeni xarici işlər nazirinin qanunsuz hərəkətinə, yəni Xankəndiyə qanunsuz səfəri ilə bağlı məsələyə diqqəti cəlb etdi. Prezident bildirdi ki, biz bir dəfə xəbərdarlıq edirik, ikinci dəfə belə bir hadisə baş versə, bunun ağır məsuliyyəti onların üzərinə düşəcək və onlar bunun cəzasını çox pis çəkəcəklər. Cənab Prezident bir daha vurğuladı ki, qarşı tərəfdən Azərbaycana bir güllə belə atılsa, onlar adlarını yadlarından çıxarmalı olacaqlar. Yəni ölkə Prezidenti özünün prinsipial, qətiyyətli və beynəlxalq hüquqa söykənən mövqeyini ifadə etdi, bu barədə qarşı tərəf fikirləşsin və nəticə çıxarsın” - deyə E.Nəsirov vurğuladı.
İradə SARIYEVA
