Prezident yeni ildə xalqa müraciətində belə bir diqqətçəkən məqama toxunarkən dedi ki, aprel döyüşlərindən sonra Ermənistanın o vaxtkı rəhbərliyi işğal edilmiş torpaqlardan çıxacağına söz verib, amma sonra buna əməl etməyib.
Bununla bağlı ölkə başçısı bir sıra məqamlara aydınlıq gətirib: “Aprel döyüşləri Ermənistana dərs olmadı. Bir neçə gün davam edən aprel döyüşləri kiçik də olsa, bizim qələbəmizlə nəticələndi. Ermənistan məcbur oldu, yerinə oturduldu, torpaqlarımızın bir hissəsini işğalçılardan azad etdik, göstərdik ki, bizi heç kim və heç nə yolumuzdan döndərə bilməz, çəkindirə bilməz. Amma dərs olmadı onlara. Aprel döyüşlərindən sonra Ermənistanın o vaxtkı rəhbərliyi, demək olar, söz vermişdi ki, işğal edilmiş torpaqlardan çıxacaq. Bu, həqiqətdir. Amma sonra orada ya özləri təşkil etmişdilər, ya doğrudan da belə hadisə baş verdi, polis bölməsi zəbt edildi, terrorçu qrup orada terror aktı törətdi və ondan sonra Ermənistan rəhbərliyi dedi ki, görürsünüz, burada vəziyyət gərgindir, biz bunu edə bilmirik. Bizi aldatdılar”.
Çox maraqlıdır, o vaxt prezident Serj Sarkisyan razılaşmanı pozmaq üçün özü bunu təşkil edib, yoxsa radikalların basqınından sonra proses pozulub və o, verdiyi sözə əməl edə bilməyib?
“Onlar düşunürdülər ki, status-kvo nə qədər uzadılarsa, bu, müharibə ehtimalını azaldacaq”
Məsələyə münasibət bildirən AMİP-in sədr müavini Afsəddin Nəbiyevin sözlərinə görə, Ermənistan tərəfi torpaqları qaytarmaq istəmədiyi üçün o vaxt belə oyun qurublar: “Göründüyü kimi, Ermənistanın hakimiyyətdə olan rəhbərləri, nə olursa-olsun, bu prosesi uzatmaq məqsədini həyata keçirirdilər. Onlar düşunürdülər ki, status-kvo nə qədər uzadılarsa, bu, müharibə ehtimalını azaldacaq. Bu siyasəti Köçəryan-Sarkisyan çox fəal şəkildə davam etdirirdilər. Onlar danışıqlarda bir ümid işığı cücərdikdə belə, özləri elə bir təxribatlar edirdilər ki, münaqişənin həlli kölgədə qalırdı. Məsələnin mahiyyəti ondan ibarət idi ki, erməni tərəfi məqsədyönlü şəkildə bunu edib. Düşünürdülər ki, danışıqlar nə qədər çox uzanarsa, Azərbaycan cəmiyyəti Qarabağ və ətraf əraziləri tədricən unudacaq. Nəticədə gənc nəslin bu bölgə haqqında dəqiq təsəvvürləri olmayacaq. Xüsusilə Köçəryan və Sarkisyan bu siyasətin aparılmasında daha çox fəaliyyət göstərdilər. Əlbəttə, 2016-cı ilin aprel döyüşlərindən sonra Sarkisyan hiyləyə əl ataraq sülh prosesini qəsdən təxribatla əvəzlədi. Hazırda Ermənistanın eks-prezidentləri müsahibələrində xüsusilə vurğulayırlar ki, Paşinyan siyasətdə naşılıq etdi. Guya o daha ehtiyatlı olardısa və prosesi uzatmağı bacarsaydı, Azərbaycan tərəfi Qələbə əldə edə bilməzdi. Əslində isə bu belə deyil. Paşinyan əvvəlkilərdən fərqli olaraq istəyirdi ki, hansısa yolla Ermənistan Qarabağ yükündən azad olsun. Bəlkə də bu səbəbdən o, ritorikanı qızışdırdı ki, hərbi əməliyyatların başlaması tezləşsin”.
Sədr müavini onu da qeyd etdi ki, Köçəryan-Sarkisyan cütlüyü Qarabağ danışıqlarında heç vaxt səmimi olmayıb.
Vidadi ORDAHALLI
