Ermənistan 44 günlük müharibədə məğlub olmasından nəticə çıxarmaq, separatçılıq, faşizm, işğalçılıq siyasətini dayandırmaq əvəzinə, öz təxribatlarını davam etdirir. İşğal dövründə Kəlbəcər rayonun Vəng kəndində yerləşən qədim alban-xristian monastırı olan Xudavəngdən bu ölkə heç cür əl çəkmək istəmir.
Xudavəngin “erməni kilsəsi” olduğu iddiası ilə illərdir saxtalaşdırma cinayətləri həyata keçirən Ermənistan hökuməti, bildiyimiz kimi, hətta ermənilərlə heç bir əlaqəsi olmayan Xudavəng monastırının bütün sərvətini də oğurlayaraq İrəvana aparıb, həmin sərvətin satış-sərgisini təşkil edib. Bu cinayətlərdən gözü doymayan düşmən ölkə indi də xristianların müqəddəs bayramı olan Milad faktorundan sui-istifadə etmək istəyib. Belə ki, Ermənistanda yaşayan ermənilər Milad bayramını qeyd etmək üçün qanunsuz olaraq Xudavəngə getməyə cəhd göstəriblər. Lakin sərhədçilərimiz erməniləri Kəlbəcər rayonunun Vəng kəndində yerləşən Xudavəng monastırına buraxmayıblar. Bu barədə Xudavəngi ziyarət etmək istəyən Ermənistan sakini Yevgeniya Yengibaryan öz “Facebook” hesabında yazıb. Bu da həmin status: “Milad günü xoşagəlməz hadisə ilə başladı. Rəfiqəmlə Xudavəngə gedə bilmədik. Ora səfərlərin hər bazar olmasına baxmayaraq, məhz bu gün orada olmaq istədik. Bizim 40 nəfər olmağımıza baxmayaraq, həmçinin, ziyarət etmək istəyənlərin sayında məhdudiyyətin olmaması bildirilsə də, bizim tərəf (Ermənistan tərəfi) yalnız 30 ziyarətçini türklərlə (Azərbaycan tərəfi ilə) razılaşdırıb. Nəticədə üçüncü avtobusdan hamını düşürdüblər. Hə, Xudavəngi ziyarət etmək düşmənlə razılaşdırmadan asılıdır. Salam, yeni reallıq. Səninlə necə barışıb və dəli olmamaq – məsələ budur”.
Bu da növbəti erməni həyasızlığı. Xudavəngin onlara nə aidiyyəti var ki, bu məbəddən əl çəkmək istəmirlər?
Məlumdur ki, Qafqaz Albaniyasının varisi Azərbaycandır və Xudavəng monastırı da Azərbaycanın maddi-mədəni irsidir. Xudavəng monastırı Alban-udi icmasının ziyarət yeridir.
Ekspertlər deyirlər ki, Ermənistan hökuməti Xudavənglə bağlı təxribatına sadə vətəndaşlarını alət etmək istəyir, bu səbəbdən də onların Xudavəngə getməsinə şərait yaradır.
“Bizə aid mədəni irsə iddialı olan ermənilər istəyiblər ki, ziyarət adı ilə gəlib...”
Alban-udi icmasının sədri Robert Mobili “Bakı-Xəbər”ə bildirdi ki, ermənilər Milad bayramını yanvarın 6-da keçirirlər. “Bizim nümayəndələrimiz Xudavəngə yola düşəcəklər, yanvarın 8-də orada olacaqlar. Təxminən 30 nəfərə yaxın nümayəndəmiz Xudavəngə ziyarətə gedəcək, udilərlə yanaşı, başqa bir neçə nəfər də bizim nümayəndələrlə gedəcəklər”.
R.Mobili qeyd etdi ki, ermənilərin Xudavəngdən əl çəkməməsinin səbəblərindən biri onların hərtərəfli uduzmasının nəticəsidir ki, onlar bu yola əl atırlar: “Ermənilər Miladı ayın 6-sı qeyd edirlər. Onların bu hərəkəti çox ciddi məsələdir. Ermənistan müharibəni uduzub, Azərbaycanın işğalda olan əraziləri artıq azad edilib. Qarabağın çox ərazisi ermənilərdən boşaldıldı, o cümlədən də Kəlbəcər. Kəlbəcərdə olan qədim alban irsi - Gəncəsər, Xudavəng və başqalarıdır. Ermənilərin Xudavəngə getməyə cəhd etməsində söhbət ziyarətdən getmir, burada onların çox çirkin məqsədləri olub. Onların əsas məqsədi odur ki, Qarabağ ərazisindəki məbədləri erməni apostol (qriqoryan) kilsəsinin ərazisində saxlasınlar. Onlara bir tərəfdən də Rusiya sülhməramlıları dəstək verirlər. Bu ərazidə Rusiya sülhməramlıları var, ermənilər də istəyirlər ki, bundan yararlanıb dividend qazansınlar. Müharibədə uduzublar, istəyirlər ki, Qarabağ ərazisindəki məbədləri erməni kilsəsinin ərazisi kimi saxlasınlar. Budur əsas. Ona görə də biz özümüz üçüncü dəfədir Xudavəngə ziyarətə gedirik. Xudavəng və digər monastırlar alban irsi ilə bağlı mədəni irsdir. Xudavəng monastır kompleksinin də, digərlərinin də ermənilərlə heç bir bağlılığı yoxdur. Bizə aid mədəni irsə iddialı olan ermənilər istəyiblər ki, ziyarət adı ilə gəlib dünyaya “bu bizim irsimizdir və bu ərazi də erməni kilsəsinin qanunu ərazisidir” kimi göstərsinlər. Bizim nümayəndələr Xudavəngə gedirlər. Mən özüm orada birinci dəfə dekabrın 4-də olmuşam. Sonra xəstələndim, Türkiyədə xəstəxanada yatdım, vəziyyətim yaxşı olsa, bu günlərdə vətənə gələcəyəm. Dekabrın 30-da yeni il qabağı bizim icmamızın nümayəndələri Xudavəngə getdilər. Üçüncü dəfə də böyük bir nümayəndə heyətimiz Xudavəngə yola düşəcək. Nümayəndə heyətinə də icmanın sədr müavini Rafiq Danakari rəhbərlik edəcək. Onu da deyim ki, artıq bizim tərəfimizdən iş gedir. Alban mədəni irsinə Azərbaycanın sahib olduğu şübhəsizdir. Biz alban kilsəsinin qanuni ərazisinin ermənilərdən alınıb alban kilsəsinin tabeliyinə verilməsi istiqamətində işlər aparırıq. İkincisi də sülhməramlılardan əvvəl sərhəddə bizim hərbçilər dayanır, birinci icazəni hərbçilərimiz verməlidirlər. Onlardan sonra sülhməramlılar dayanırlar. Ermənilər orada bir-iki rahib saxlayırlar. Nəyin hesabına? Çünki sülhməramlılar onları müdafiə edirlər”.
İradə SARIYEVA
