Bizim şanlı Qələbəmiz bizim güclü iradəmizi, xalqımızın güclü əzmini bütün dünyaya nümayiş etdirdi. Bunu Prezident İlham Əliyev 2020-ci ilin yekunlarına həsr olunmuş videoformatda müşavirədə çıxışı zamanı deyib.
“Bizim şanlı Qələbəmiz bizim güclü iradəmizi, xalqımızın güclü əzmini bütün dünyaya nümayiş etdirdi”, - deyən Prezident İlham Əliyev vurğulayıb ki, bizim sözümüzlə əməlimiz arasında heç bir fərq yoxdur və Azərbaycan siyasi, iqtisadi, hərbi gücü sayəsində qarşıda duran əsas vəzifəni şərəflə yerinə yetirib.
2020-ci ildə ölkəmizdə parlament seçkilərinin keçirildiyini, siyasi partiyalarla dialoqun gücləndiyini, kadr islahatlarının davam etdirildiyini deyən Prezident İlham Əliyev pandemiyanın fəsadlarının aradan qaldırılması istiqamətində görülən işlərdən danışıb.
Bütövlükdə, Prezidentin sadaladığl faktorlar Azərbaycanın ötən il Qələbə qazanmasında müstəsna rol oynadı. Məhz siyasi, iqtisadi, hərbi gücün vəhdəti sayəsində Azərbaycan Qələbə qazandı. O baxımdan bütün bunları ekspertlər necə dəyərləndirirlər?
“Qarabağ müharibəsi dövründə informasiya savaşında əldə olunan uğurlar da buna öz müsbət təsirini göstərdi”
Məsələyə münasibət bildirən politoloq Elşən Manafovun sözlərinə görə, Vətən müharibəsində Qələbə qazanmağımızın bir sıra səbəbləri var idi: “Bunun başlıca səbəbi Prezident İlham Əliyevin ötən illər ərzində həyata keçirdiyi uğurlu iqtisadi, siyasi, sosial və hərbi siyasət idi. Eyni zamanda, Qələbəni təmin edən amillərdən biri də Azərbaycan iqtidarının beynəlxalq aləmdə apardığı uğurlu siyasətlə bağlı idi. Xüsusən Qarabağ müharibəsi dövründə informasiya savaşında əldə olunan uğurlar da buna öz müsbət təsirini göstərdi. İqtisadi faktorlar onunla bağlı idi ki, son 5 ildə aparılan islahatlar nəticəsində qeyri-neft sektorunun inkişafı sürətləndi. Qeyri-neft sektorundan gələn gəlirlərin həcmi artdı. Artıq ölkənin dövlət büdcəsinin formalaşmasında qeyri-neft sektorunun rolu durmadan artır. Düzdür, hələlik neft-qaz sektoru büdcənin formalaşmasında əhəmiyyətli rol oynayır, amma qeyri-neft sektorunun inkişafı davam edir. Bununla belə, İqtisadiyyat, Maliyyə nazirliklərinin, Gömrük Komitəsinin xətti ilə həyata keçirilən müvafiq siyasət Azərbaycanda iqtisadi-maliyyə sahəsində əldə edilən uğurların kökündə durur. Büdcə imkanlarının artması orduya daha çox vəsaitin ayrılmasına şərait yaratdı. Bu mənada Azərbaycan Ordusunun hərbi məsrəfləri 3,2-3,3 milyard dollara çatırdı ki, bu da bütövlükdə Ermənistanın dövlət büdcəsindən çox idi. Ordunun müasir silah və sursatla təmin edilməsi də qarşıya qoyulan vəzifələrin həllində vacib rol oynadı. Nəticədə biz ərazilərimizi işğaldan azad etdik. Bütün bunlarla yanaşı, Azərbaycanda hakimiyyətlə xalqın həmrəy olması da önəmli faktorlardan biridir”.
Politoloq onu da qeyd etdi ki, sadalanan amillərin vəhdəti bizim Qələbəmizi şərtləndirdi.
Vidadi ORDAHALLI
