Məlum olduğu kimi, yanvarın 5-də Ermənistanın xarici işlər naziri Ara Ayvazyan qanunsuz olaraq Dağlıq Qarabağa səfər edib. O, Xankəndidə cinayətkar rejimin nümayəndələri ilə görüşüb. Ayvazyan Azərbaycanın ərazi bütövlüyü və suverenliyinə təhdid törədən bəyanatla çıxış edib.
Azərbaycan Respublikası Xarici İşlər Nazirliyi Mətbuat Xidməti İdarəsinin rəisi Leyla Abdullayeva Ermənistan Xarici işlər nazirinin Qarabağa səfərinə münasibət bildirərkən deyib ki, Ermənistan Xarici işlər naziri Ara Ayvazyanın Azərbaycanın Qarabağ bölgəsinə qanunsuz səfəri və burada qondarma qurumun nümayəndələri ilə görüşlər keçirməsi və “sənədlər” imzalaması 10 noyabr tarixli üçtərəfli bəyanata ziddir və hərbi əməliyyatların dayandırılmasından sonra bölgədə sülh, təhlükəsizlik və əməkdaşlığın yaradılması çərçivəsinə tamamilə uyğun gəlmir.
Qeyd edək ki, Prezident İlham Əliyev də bu cür səfərlərə kəskin etirazını bildirib: “Münasibətlər normallaşacaqsa, o zaman belə təxribat xarakterli “səfərlərə” nə ehtiyac var? Nəyi göstərmək istəyirlər? Yenəmi bizi qıcıqlandırmaq istəyirlər? Unutmasınlar ki, onlara çox baha başa gəldi bu tipli addımlar. Ona görə bütün səfərlərə son qoyulmalıdır. Heç bir xarici vətəndaş bizim icazəmiz olmadan o əraziyə gedə bilməz. Heç bir beynəlxalq təşkilat, - ancaq Qırmızı Xaç istisna olmaqla, - oraya gedə bilməz. Bu bizim ərazimizdir. Bütün dünya bu ərazini Azərbaycanın ayrılmaz hissəsi kimi tanıyır. Ermənistanın xarici işlər naziri, sən kimsən ki, oraya gedirsən? Xəbərdarlıq edirik. Əgər buna oxşar addım təkrarlanarsa, bizim cavabımız çox sərt olacaq. Elə birinci dəfə biz Xarici İşlər Nazirliyi vasitəsilə onlara xəbərdarlıq etdik. Ondan sonra xəbərdarlıq başqa cür veriləcək. Onların ayağı oradan kəsilməlidir. Otursun öz ölkəsində”.
Ermənistan bu cür qanunsuz səfərlərin sülhə təhdid yaratdığını bilə-bilə belə addımları daha hansı məqsədlə atmış ola bilər?
“Ermənistan bu addımları ilə dünyaya hələ də qondarma qurumun mövcudluğunu göstərmək istəyir”
Politoloq Əhəd Məmmədli “Bakı-Xəbər”ə açıqlamasında bildirdi ki, heç bir rəsmi şəxsin Ermənistandan Dağlıq Qarabağa gəlməyə ixtiyarı yoxdur: “Çünki belə bir addımın atılması noyabrın 10-da imzalanmış üçtərəfli bəyanatın pozulmasıdır. Bu, Azərbaycan dövlətinin maraqlarına da ziddir. Azərbaycan Xarici İşlər Nazirliyinin bəyanatında da bu fikir öz əksini tapıb. Amma məsələ yalnız Ermənistanın xarici işlər naziri ilə yekunlaşmır. Onu Dağlıq Qarabağa göndərən və Laçın dəhlizindən keçməsinə imkan verən qüvvələr də məsuliyyət daşıyır. Əgər sülhməramlılar bölgədə sabitliyin olmasında maraqlıdırsa, o halda gərək belə qanunsuz səfərlərin baş verməsinə şərait yaratmasınlar. Artıq ermənilər bu cür hərəkətləri ilə bizi məcbur edirlər ki, Xankəndiyə raket zərbəsi endirək. Belə olacağı təqdirdə qaçıb yenə də zirzəmilərdə gizlənəcəklər. Bununla biz eyni zamanda Rusiyanı öz öhdəliklərini yerinə yetirməyə sövq etmiş olarıq. Qoy bilsinlər ki, belə addımlarla onlar əldə olunan sülh razılaşmasını yenidən atəşə, müharibəyə çevirmək yolunu seçmiş olurlar. Belə bir xəbərdarlığı Prezident də edib. Ermənistan bu addımları ilə dünyaya hələ də qondarma qurumun mövcudluğunu göstərmək istəyir. Bir daha hansısa Ermənistan rəsmisi sərhədi keçərsə, onun koordinatını müəyyənləşdirib həmin yerə raket zərbəsi endirməliyik. Bir tərəfdən sülh yalvarışları edib, digər tərəfdən öz məkrli əməllərini davam etdirən Ermənistan bilməlidir ki, bütün bu hərəkətlər ona ağır başa gələ bilər. Belə qənaətə gələ bilərik ki, Ermənistanda mərkəzləşmiş hakimiyyət yoxdur. Kim nə istəyirsə, onu da edir. Ya da ki, daxili auditoriyalarına göstərmək istəyirlər ki, Qarabağ tam əldən çıxmayıb”.
Ekspertin sözlərinə görə, ermənilərin bu təxribatçı addımlarına adekvat cavablar verilməlidir: “Görünür, yumruq başlarının üstündən uzaqlaşan kimi onlar da öz yolunu azır”.
Məhəmmədəli QƏRİBLİ
