Almaniyada hakim koalisiya Berlinin Qarabağda sülhün bərqərar olmasına diplomatik yolla kömək etməsini təklif edir. Bu barədə hakim koalisiyanın bəyanatında deyilir. Bəyanat noyabrın 26-da Almaniya parlamentində dəstəklənib. Sənəddə qeyd olunur ki, Almaniya Qarabağda sülh tənzimlənməsində və regionda sakinlər arasında dinc və bərabərhüquqlu münasibətlərin təmin olunmasında fəal iştirak etməlidir. Almaniyada Qarabağla bağlı yaranan fəallıq necə izah oluna bilər?
“Bu iki Avropa ölkəsi arasında olan tarixi rəqabət Almaniyanı belə addımlar atmağa vadar edə bilər”
Politoloq Rəşad Bayramov “Bakı-Xəbər”ə açıqlamasında bildirdi ki, Almaniyadan səslənən iddialara normal yanaşmalıyıq: “Problemin həlli ilə bağlı uzun sürən süründürməçilik dönəmində Almaniyanın həmsədr ölkə kimi Minsk Qrupunda təmsil olunması ilə bağlı təkliflər daha çox Azərbaycandan səslənib. Biz daha çox Türkiyə və Almaniyanın bu prosesdə iştirakını istəyirdik. Ancaq ermənilər və onların havadarları Türkiyənin bizimlə qardaş ölkə olduğunu əsas gətirərək, bunun mümkünsüzlüyünü qeyd edirdilər. Hazırda situasiya tam dəyişib. Azərbaycan öz probleminin böyük hissəsini həll edib. Artıq aktivliyinə görə Türkiyə də masadadır və bunu qəbul etməyə məcburdurlar. Rusiya isə prosesdə həmsədr ölkə kimi yox, daha çox regiona nüfuz etməyə qadir olan dövlət qismində təmsil olunur. Mövcud reallıq onu deməyə əsas verir ki, prosesin yalnız hərbi mərhələsi arxada qalıb. Qarşıda bizi diplomatik gərginlik gözləyir. Çünki müzakirə olunası, həll edilməli olan çoxlu məsələlər var. Bu baxımdan da, Minsk Qrupunun indiki tərkibinə Azərbaycanın inamı qalmayıb. Çünki Fransa açıq-aşkar ermənipərəst mövqe tutur. Bir ölkənin Senatı mövcud olmayan “DQR”in müstəqilliyini tanımağı tövsiyə edən qətnamə qəbul edirsə, onlardan hansı neyrallığı gözləmək olar? Avropa ölkələri Minsk Qrupu formatının qalmasında israrlıdırlar. Belədirsə, onda biz də Almaniyanın bu niyyətini nəzərə alıb, onun prosesdə aktiv iştirakına şərait yaratmalıyıq. Qarabağda sülhün təsisi üçün yaradılan Minsk Qrupunda Fransa, Amerika və Rusiya iştirak edir. Bu problemin həllində təsirli və aktiv olacaq ölkə beynəlxalq sahədə əhəmiyyətli mövqeyə sahib olmalıdır. İndi Amerika Rusiyaya qarşı üstünlüyü əldən verməmək, Rusiya Amerikanı bölgəyə buraxmamaq, Fransa isə Avropa Birliyini Rusiya və Amerikaya qarşı çıxara bilmək üçün planlar qurur. Buna görə də biz haqlı olaraq problemin həllində yeni tərəflərə ehtiyac duyuruq. Azərbaycan isə Almaniyanın təklifinə isti baxa bilər. Çünki Almaniya Fransadan daha aktiv bir siyasət yürüdəcək. Almaniyanın ATƏT-in Minsk Qrupunun həmsədrliyinə gətirilməsi müsbət hadisə olardı. Çünki bu ölkənin Dağlıq Qarabağ münaqişəsinə münasibəti beynəlxalq hüquq və Azərbaycanın maraqlarına uyğundur”.
Müsahibimizin sözlərinə görə, bunun üçün Almaniyanın özünün də Fransanın prosesdən kənarlaşması istiqamətində aktivliyi gərəkdir: “Düşünürəm ki, bu iki Avropa ölkəsi arasında olan tarixi rəqabət Almaniyanı belə addımlar atmağa vadar edə bilər”.
Məhəmmədəli QƏRİBLİ
