12/07/2020 07:20
728 x 90

Ermənistan pandemiya ilə mübarizədə niyə belə ağır duruma gəldi - Paşinyanın etirafı aşkar fəlakətdən xəbər verir...

img

Pandemiyanın bütün dünyaya vurduğu ziyan danılmazdır. Ancaq görünən budur ki, iqtisadiyyatı və siyasi idarəetməsi zəif olan ölkələr bu bəladan daha çox əziyyət çəkir. Belə ölkələrdən biri də bədnam qonşumuz olan Ermənistandır.

Aydındır ki, Azərbaycan və Ermənistanın sosial-iqtisadi inkişafı, regional və dünya siyasətində rolu və yeri arasında aydın görünən kəskin fərqlər mövcuddur. Pandemiya dövründə Azərbaycanda əhalinin sosial durumunun yaxşılaşdırılması üçün ciddi addımlar atıldı.  Biznesin dayanıqlığının təmin edilməsi ilə də bağlı bir sıra dəstək proqramları tətbiq edildi. Bu sahədə Ermənistanda olduqca acınacaqlı durum hökm sürür. Ermənistanda xəstəxana və həkimlərin çatışmamsını onların öz rəsmiləri etiraf edir. Hətta vəziyyət o qədər kritikdir ki, pandemiyanın nəzarətdən çıxmasını erməni baş nazirin özü etiraf edib. Paşinyan bildirib ki, yoluxma sayına görə Ermənistan dünyada liderdi.

Bu günlərdə bədnam qonşumuz işğalçı Ermənistan həm koronavirus pandemiyası ilə mübarizə aparmağa, həm də gərginliklərin artdığı daxili ictimai-siyasi vəziyyəti qaydasına qoymağa çalışır. Baş nazir Nikol Paşinyan pandemiya dövründə vətəndaşların sosial-iqtisadi problemlərini həll etməkdə ciddi çətinliklərlə qarşılaşıb və bununla bağlı, demək olar ki, heç bir uğurlu gediş edə bilməyib. Nəticədə ölkədə xəstəliyin yoluxma sayı ciddi sürətdə artıb, iqtisadiyyat iflic vəziyyətə düşüb. Hadisələrə paralel olaraq ölkədə narazılıq və qarşıdurma həddi, demək olar ki, pik səviyyəyə çatıb, Paşinyan isə sosial dayaqlarını itirməyə başlayıb.

Aydındır ki, pandemiya ilə mübarizə üçün həm insanların sağlamlığı, həm ölkənin iqtisadiyyatı, həm də əhalinin sosial vəziyyəti nəzərə alınaraq çox həssas və incə bir siyasət yürütmək lazımdır. Lakin koronovirusa qarşı dayanıqlı siyasət yürütmək heç də hər ölkəyə qismət olmur. Ermənistan hakimiyyəti də pandemiya ilə layiqli mübarizə aparmağı bacarmayan ölkələr sırasındadır. Belə ki, əhalisinin sayı 3 milyona belə çatmayan Ermənistanda yoluxma sayının kəskin artması və gündəlik yoluxma sayının artıq 700-ü üstələməsi ölkədə həyəcan təbilinin çalındığının işarəsidir. Ölkə rəhbərliyi isə virusla mübarizədə effektiv gediş edə bilmir, ancaq beynəlxalq təkilatlardan pul dilənməklə nəyəsə nail olmağa çalışır. Ölkədə vəziyyət o həddədir ki, hətta baş nazir əhalini təhdid etməyə başlayıb:“Bəlkə biz vətəndaşlarımızı öz sağlamlıqlarının qeydinə qalmağa məcbur etməliyik, vətəndaşımızla zor dilində danışmalıyıq?”. 

Çox sadə bir hesablama aparsaq məlum olar ki, bu gün Ermənistanda yaşayan hər 70 adamdan biri artıq koronavirusa yoluxub. Və bu artım sürətlə davam edir.

Ermənistandan fərqli olaraq, Azərbaycan bu virusla mübarizədə ilk gündən nizam-intizam nümayiş etdirir. Cənab Prezidentin rəhbərliyi ilə bu proses Azərbaycan modelinə uyğun şəkildə aparılır. Bura Operativ Qərargahın yaradılması və lazım olan bütün zəruri qərarların verilməsini aid edə bilərik. Kiçik istisnaları çıxmaq şərtilə deyə bilərik ki, Azərbaycan pandemiya ilə mübarizədə uğurlu nəticələrə imza atıb. Yoluxmada müşahidə olunan cuzi artım isə vətəndaşların şəxsi səhlənkarlığına bağlı olan məsələdir. Bu məsələdə ölkəmizdə olan bütün ixtisas sahibləri maksimum dərəcədə virusun qarşısının alınmasında əmək sərf ediblər. Bura polisləri, həkimləri, jurnalistləri aid edə bilərik. Cənab Prezidentin qeyd etdiyi balanslı mübarizə modelinin mahiyyəti də aydındır. Burada daha çox pandemiyanın vurduğu iqtisadi ziyanların hansı üsullarla kompensasiya olunacağı nəzərdə tutulur. Məsələn, iqtisadiyyatın bir aspektinə dəyən ziyanı digər sahələrin fəaliyyətini gücləndirməklə kompensasiya etmək. Bura özəl sektora dövlətin verdiyi dəstəyi də əlavə edə bilərik. Bir tərəfdən koronavirusun qarşısını almaqdan ötrü sərt qərarlar verilir, digər tərəfdən isə dövlət bütün sahələrə yardım edir. Məsələn, sərt karantin qaydalarının hara şamil olunmasında da bu balans gözlənilir. Xüsusilə də kənd təsərrüfatına zərərin az dəyməsi üçün addımlar atılır. Sahibkarlığı ziyandan qorumaq üçün bir milyarddan artıq vəsait ayrılıb. Azərbaycanın tətbiq etdiyi xüsusi model həm xəstəliyin qarşısını alacaq, həm də postpandemiya dönəmi üçün önəmli təsirə malik olacaq.

Prezident İlham Əliyevin BMT Baş Assambleyasının xüsusi sessiyasının keçirilməsi təşəbbüsünün 130 ölkə tərəfindən dəstəklənməsi isə Ermənistanın iç üzünü bu dəfə dünya dövlətləri qarşısında açdı. Bu ölkə dünyamızın üzləşdiyi belə bir çətin zamanda insan sağlamlığı məsələsinin beynəlxalq platformada müzakirəsinə dəstək vermir. Beləliklə də, təcavüzkar Ermənistan növbəti dəfə əsl dəyərlərinin nədən ibarət olduğunu nümayiş etdirərək özü-özünü ifşa etdi. Bu baxımdan da Azərbaycanı bu istiqamətdə Ermənistanla müqayisə etmək heç bir məntiqə sığmır.

Məhəmmədəli QƏRİBLİ

Son xəbərlər