Bu günlərdə Prezident İlham Əliyev “Şərq Tərəfdaşlığı” ölkələrinin videokonfrans formatında keçirilən Sammitində çıxışı zamanı Ermənistanın Qarabağ danışıqlarında sərgilədiyi destruktiv mövqeyi bir daha ifşa etdi.
Ölkə başçıs çox düzgün formada əsaslandırdı ki, Ermənistan danışıqların formatını və mahiyyətini dağıdır. Qeyd etdi ki, işğalçı tərəf beynəlxalq qərarları yerinə yetirmir: “BMT Təhlükəsizlik Şurasının 4 qətnaməsi Ermənistan qoşunlarının Azərbaycanın işğal edilmiş bütün ərazilərindən qeyd-şərtsiz və tam çıxarılmasını tələb edir. Ermənistan bu qətnamələrə, habelə ATƏT, Qoşulmama Hərəkatı, NATO, Avropa Parlamenti və digər beynəlxalq təşkilatlarda qəbul edilmiş müvafiq sənədlərə əməl etmək əvəzinə, işğal olunmuş ərazilərdə qeyri-qanuni məskunlaşma siyasəti həyata keçirir. Danışıqların mahiyyət və formatını məhv etməyə çalışan Ermənistanın Baş nazirinin dediyinin əksi olaraq, Dağlıq Qarabağ Ermənistan deyil, Dağlıq Qarabağ Azərbaycandır və bütün dünya bunu belə tanıyır. Azərbaycanın ərazi bütövlüyü bərpa olunmalıdır”.
O da məlumdur ki, Paşinyan Ermənistanın Baş naziri olandan sonra Dağlıq Qarabağ münaqişəsinin tənzimlənməsi ilə bağlı danışıqların formatını və mahiyyətini məhv etməklə bağlı pozucu addımlar atır. Bu isə danışıqlara xələl gətirir. O baxımdan bu cür aydın olan vəziyyətdə həmsədrlər nə etməlidirlər?
“ATƏT-in bu məsələdə susqunluğu və erməni tərəfinin mövqelərinə öz iradını bildirməməsi onu göstərir ki...”
Məsələyə münasibət bildirən politoloq Elşən Manafovun sözlərinə görə, belə vəziyyətdə həmsədrlər Paşinyan hakimiyyətinə təzyiq göstərməlidirlər: “Ermənistanın hazırkı hakimiyyətinin danışıqların formatını məhv etmək cəhdləri göz qabağındadır. Artıq neçə vaxtdır bu müşahidə edilir. Bu, ilk növbədə, ondan ibarətdir ki, Paşinyan separatçı qurumun danışıqlarda tərəf olaraq iştirak etməsini istəyir. Bəyan edir ki, “Artsax xalqı” da danışıqlara qoşulmalıdır. Bu isə, faktiki olaraq, illərdir mövcud olan danışıqlar formatının pozulması deməkdir. Azərbaycan haqlı olaraq bəyan edir ki, “Artsax xalqı”ndan söhbət gedə bilməz. Çünki ermənilər aborigen xalq deyil. Dəfələrlə Prezident İlham Əliyev bir sıra beynəlxalq tədbirlərdə tarixi faktlara istinad edərək bunu sübut edib. Digər tərəfdən, Paşinyanın münaqişənin həlli ilə bağlı konkret mövqeyi yoxdur. O, ötən illər ərzində problemin həlli ilə bağlı tamamilə daban-dabana zidd bəyanatlar verir. Bu da onu göstərir ki, Ermənistanın hazırkı rəhbərliyinin münaqişənin həlli ilə bağlı konkret mövqeyi yoxdur. Ona görə də həmsədrlər belə vəziyyətdə Ermənistana mütləq təzyiq göstərməlidirlər. ATƏT-in Minsk Qrupu qurumun ona verdiyi mandat çərçivəsində fəaliyyət göstərməlidir. Ancaq biz bunu görmürük. ATƏT-in bu məsələdə susqunluğu və erməni tərəfinin mövqelərinə öz iradını bildirməməsi onu göstərir ki, sözügedən qurum illərdir sərgilədiyi ənənəvi mövqeyə “sadiqdir”. Yenə də ikili standartlar və dişsiz mövqe özünü göstərməkdədir. ATƏT-in bu mövqeyinin Azərbaycan xalqında haqlı narazılıq yaratdığını dəfələrlə ölkə Prezidenti həmsədrlərin diqqətinə çatdırıb. Ona görə də ATƏT-in Minsk Qrupu bu iradlardan nəticə çıxarmalıdır”.
Bütün bunlar onu göstərir ki, həmsədrlər danışıqlar formatını məhv etməyə çalışan Ermənistana təzyiq göstərməyənə qədər, işğalçı tərəf danışıqları pozmaqda davam edəcək. Bu da münaqişənin həllini yubadacaq və müharibənin yenidən alovlanmasına zəmin yaradacaq.
Vidadi ORDAHALLI
