Ermənistanın Baş naziri Nikol Paşinyan ölkədə koronavirus daşıyıcılarının sayının 100 mini keçə biləcəyini açıqlayıb. O deyib ki, bütün səylərimizə baxmayaraq, Ermənistan çox acınacaqlı vəziyyətə düşüb.
Onun sözlərinə görə, koronavirusa yoluxmuş 200-ə yaxın insan xəstəxanada müalicə almaq üçün növbə gözləyir: “Biz kritik vəziyyətə gəldik və cəhənnəmdə addımlayırıq. Səhiyyə sistemi o qədər yüklənib ki, xəstəxanalar artıq xəstələri qəbul edə bilmirlər. Acı həqiqətdir ki, təcili tibbi yardımın gecikməsi səbəbindən insanlar koronavirusdan dünyasını dəyişir”.
Paşinyan "Facebook" səhifəsində koronavirusa yoluxma halları və xəstələnmə proqnozları ilə bağlı cədvəl paylaşıb: “Bu datoloji analiz göstərir ki, hazırda Ermənistanda 100 mindən çox daşıyıcı var. Bütün səylərimizə baxmayaraq, Ermənistan çox acınacaqlı vəziyyətə düşüb”.
Paşinyan onu da qeyd edib ki, komendantın iclasında lokdaunun (evdən bayıra çıxmamaq) elan olunması ehtimalı müzakirə edilib: “Ancaq belə bir qərar istənilən nəticəyə səbəb olmayacaq. Hər kəsin antiepidemioloji tədbirlərə ciddi şəkildə riayət etməsi və maskalar taxmasına qarşı keçirilən kampaniyanın əleyhinə çıxmaq lazımdır”.
Onu da qeyd edək ki, ən son məlumata görə, Ermənistanda koronavirusa yoluxanların sayı 13 325 nəfərə, xəstəlikdən ölənlərin sayı isə 211 nəfərə açtıb.
Göründüyü kimi, Ermənistanda pandemiya ilə bağlı çox acınacaqlı bir vəziyyət yaranıb. Artıq Paşinyan virusla bacara bilmədiklərini, bir növ, etiraf edir. Bütün hallarda, bu, Paşinyanın yeni oyunudur, yoxsa son iki ildə onun rəhbərliyilə həyata keçirilən uğursuz siyasətin acı fəsadları?
“Koronavirusun Ermənistanda yaxın günlərdə daha da yayılacağı qaçılmazdır”
Məsələyə münasibət bildirən keçmiş diplomat, politoloq Fikrət Sadıqovun sözlərinə görə, pandemiya ilə bağlı vəziyyət Ermənistanda həqiqətən kritikdir və bunun kökündə Paşinyanın uğursuz idarəçilik siyasəti dayanır: “Hesab edirəm ki, bu baxımdan Paşinyanın “cəhənnəmdə addımlayırıq” ifadəsi səmimi bir etirafdır. Çünki onlar artıq cəhənnəmdə olduqlarını etiraf edirlərsə, deməli, onların vəziyyəti olduqca gərgindir. Burada söhbət təkcə insanların virusa yoluxmasından getmir. Dünyanın bir sıra ölkələrində koronavirusa yoluxanlar çoxdur. Söhbət əsas ondan gedir ki, koronavirusla bağlı məsələdə çevik addımlar atmaq lazımdır. Virusla mübarizəni təşkil etmək lazımdır. Tibbi preparatlar, personal, müasir avadanlıqlarla təchiz olunmuş xüsusi xəstəxanalar olmalıdır. Reallıq ondan ibarətdir ki, sözügedən məsələdə Paşinyanın komandası acizdir. Faktiki olaraq, Ermənistan siyasi rəhbərliyi problemin öhdəsindən gələ bilmir. Əvvəl ölkənin Səhiyyə naziri problemin öhdəsindən gələ bilmədiklərini bəyan etdi, indi də Paşinyan bunu etiraf etmək məcburiyyətində qalıb. Paşinyan dedi ki, belə getsə, xəstəxanalarda heç yer tapılmayacaq. Ermənistan Baş naziri bu kimi məsələlərlə bağlı konkret tədbirlər görmək əvəzinə, populist vədlərlə ictimaiyyətin başını aldatdı. Anlamaq istəmir ki, boşboğazlıq etməklə problem həll olunmur. Hesab edirəm ki, Ermənistanda pandemiya ilə bağlı vəziyyət həqiqətən kritikdir. Çox güman ki, koronavirusun ölkədə yaxın günlərdə daha da yayılacağı qaçılmazdır”.
Vidadi ORDAHALLI
