Ötən gün Bakının Yasamal rayonunda yaşayış məntəqəsində polisin başına zibil atanlar tutulub. Qeyd edək ki, iyunun 7-də sərt karantin rejimi zamanı Bakının Yasamal rayonu, Dadaş Bünyadzadə küçəsində yaşayan sakinin saxlanmasına etiraz olaraq bina sakinləri polisin üstünə zibil torbaları atıblar. Keçirilən əməliyyat zamanı həmin əraziyə polis əməkdaşları cəlb olunub. Onlar binaya daxil olaraq bir neçə nəfəri saxlayıblar.
Polislərin başına zibil torbalarının necə atılması ilə bağlı videolar sosial şəbəkələrdə geniş müzakirələrə səbəb olub. Əksər sosial şəbəkə istifadəçiləri sərt karantin günlərində əziyyət çəkən polislərə qarşı edilən bu addımı təxribat adlandırıb. Bu cür əməllərdə polisə qarşı xüsusi təxribatın olması versiyası nə dərəcədə əsaslı sayıla bilər?
Polisə Dəstək İctimai Birliyinin sədri Şəmsəddin Əliyev “Bakı-Xəbər”ə açıqlamasında bildirdi ki, baş verən məlum hadisəningörüntülərini çox təəssüf hissilə izləyib:“Burada bir çox detallara nəzər salmaq olar. Həmin adamların içində təxribat yaratmağa meylli insanların olmasını istisna etmirəm. Həmin videodan görünür ki, polis karantin rejimini pozan şəxsi avtomobilə mindirmək istəyir. Bu əməli ilə polis heç bir qanun pozuntusuna yol vermiş olmur. Ancaq kənardan binalarda yaşayan bir neçə şəxs digər vətəndaşları polisə itaətsizliyə, hətta onlara qarşı zor tətbiqinə çağırdılar. Həmin hadisədə təsadüfən təxribata uyan vətəndaşların da olmasını istisna etmirəm. İstənilən halda, ortada heç də xoş olmayan bir mənzərə var. Belə bir çətin zamanda vətəndaşların polisə yönəlik bu cür aqressiv hərəkəti polisin nüfuzunu aşağı salmağa hesablanıb. Bilə-bilə, əhalinin gözü qarşısında belə hadisəni təşkil etmək yalnız polisə ziyan vurmur. Bunun cəmiyyət üçün də ziyanı var. İctimai münasibətlərin gələcəkdə qorunub saxlanması, mühafizə olunması üçün əngəl yaradan amildir. Polis hazırda çox gərgin missiyanı həyata keçirir. Belə vəziyyətdə polisə vətəndaşlardan mənəvi dəstək olmalıdır. Təəssüf ki, həmin vətəndaşlar polisin funksiyasının nədən ibarət olduğunu unudur. Bir balaca cinayət əməli ilə rastlaşan kimi dərhal polisi çağırırlar. İndi nə oldu? Polis yenə öz işini yerinə yetirirdi. Bu amil vətəndaş-polis münasibətlərinə də xələl gətirir. İnsanlar başa düşmədən belə addımları atırlar, amma sonrakı vəziyyətdə bunun fəsadlarını hiss edəcəklər. Karatin rejimində belə hallara yol verənlərə qarşı sərt tədbirlər görülməlidir. Lazım gəlsə, həmin təşkilatçılara cinayət işi də açılmalıdır. Belə məsələdə zərrə qədər də güzəştə getmək olmaz. Bu gün mən polisin həmin ünvanda əməliyyat keçirdiyinə dair görüntüləri izlədim. Bəziləri polisi sərt davranışda ittiham edir. Heç bir sərt davranış yoxdur. Cinayət etmiş şəxslərin yeri müəyyənləşib və onlar müvafiq qaydada tutularaq məsuliyyətə cəlb ediliblər. Həmin kadrlarda biz bəzi şəxslərin çox normal şəkildə polisə tabe olub, özü addımlayaraq getdiyini gördük. Kimisə bir qədər başqa formada aparırlarsa, bu da onların günahıdır. Görünür, yenə polisin qanuni tələblərinə əməl etməyib, müqavimət göstərmək istəyiblər. Hesab edirəm ki, bu hadisə başqa vətəndaşlarımız üçün də bir maarifləndirmə xarakteri daşıyacaq”.
Məhəmmədəli QƏRİBLİ
