Rauf Zeyni: “Biz bu gün ölkənin hegemonluğuna görə orada baş verən haqsızlıqlara sussaq, insanlıq get-gedə təhlükəyə yuvarlanacaq”
ABŞ-ın Minneapolis şəhərində silahsız qaradərili George Floydun ölümü ilə əlaqədar keçirilən etirazlar vaxtı polislə nümayişçilər arasında toqquşmalar baş verib.
Vaşinqtonda, Ağ Evin yaxınlığında toplaşan yüzlərlə insan ədalətin bərpasına çağırıb. ABŞ şəhərlərindəki etirazlar Minneapolisin özündə bir neçə gün davam edən talan və yanğınlardan sonra başlayıb. George Floydun dediyi "Nəfəs ala bilmirəm!" sözləri ölkə boyunca keçirilən etirazların əsas şüarıdır. Bütün ölkə boyu polislə etirazçılar arasında toqquşmalar baş verir. Dallas şəhərində etirazçılara qarşı gözyaşardıcı qazdan istifadə olunub. 46 yaşlı George Floyd mayın 25-də həbs edilərkən ölüb. Hadisəni təsvir edən videoda Floydun boğazını dizi ilə yerə sıxan polis əməkdaşını görmək olar. Floyd dəfələrlə nəfəs ala bilmədiyini deyir.
Hadisə ilə əlaqədar işdən çıxarılan dörd polis işçisindən biri həbs edilib. Lakin həbs və araşdırma barədə xəbərlər etirazları dayandırmayıb. Küçələrə çıxan sakinlər həbsdə iştirak edən daha üç polisin məsuliyyətə cəlb olunmasını tələb edir.
Maraqlıdır ki, Azərbaycanda bir balaca hadisə baş verən kimi ABŞ Dövlət Departamenti səviyyəsində bəyanat yayılır. Hazırda ABŞ-da insan haqlarına bağlı olan iğtişaşlar var. Hökumət etirazçılarla sərt davranır, hətta onları öldürür də. Azərbaycandan bu hadisələrə dövlət və ya insan haqları müdafiəçiləri səviyyəsində hansısa formada reaksiya verilməlidirmi?
Milli Qeyri Hökumət Forumunun sədri Rauf Zeyni “Bakı-Xəbər”ə açıqlamasında bildirdi ki, biz rəsmi dövlət səviyyəsində heç bir dövlətin daxili işlərinə qarışmamaq kimi siyasət yürüdürük:“Bunun adekvatlığını başqa ölkələrdən də gözləyirik. Ancaq təəssüflər olsun ki, bəzən bunun əksinin şahidi oluruq. Bəli, ABŞ ölkəmizdə baş verən xırda hadisəyə belə dövlət səviyyəsində tənqidi reaksiya verir. Amma biz hazırda görürük ki, dünyanın əksər ölkələri və hüquq müdafiə təşkilatları buna susur. Dövlət səviyyəsində olmasa da, bizim ölkəmizdə olan nüfuzlu insan haqları təşkilatları məsələyə öz mövqeyini mütləq açıqlamalıdır. Çünki burada söhbət insan amilindən gedir. İnsanlara qarşı edilən zorakılıq bir ölkənin daxili işi ola bilməz. Bu, bəşəri problemdir. ABŞ-da baş verən hadisənin görüntüləri bütün dünyaya yayılıb. Ondan sonrakı hadisələrdə də polisin etirazçılarla sərt davranışının şahidi oluruq. Bizdə icazəsiz aksiyalara polisin qanuni müdaxiləsi olanda isə ABŞ-dan sərt təpki gəlirdi. Bunlar bir daha sübut edir ki, demokratiyanı özünə sipər edən bəzi ölkələr həmin qaydalara, prinsiplərə riayət etmirlər. Biz bu gün ölkənin hegemonluğuna görə orada baş verən haqsızlıqlara sussaq, insanlıq get-gedə təhlükəyə yuvarlanacaq. Obyektiv tənqid istənilən ölkənin ünvanına səslənməlidir”.
Məhəmmədəli QƏRİBLİ
