Ermənistan cəmiyyətində və siyasi dairələrdə baş nazir Nikol Paşinyanın fəaliyyətindən narazılıq artır. Hakimiyyətin və şəxsən baş nazir Nikol Paşinyanın Ermənistan daxilində reytinqi ilk növbədə koronavirusla bağlı problemlər fonunda düşür.
Ancaq bununla belə, xarici siyasətdəki uğursuzluqlar da buna öz təsirini göstərir. Paşinyanı daim pisləşən Ermənistan-Rusiya münasibətlərində günahlandırırlar ki, bu da özünü Putinin Ermənistanın təklif etdiyi qiymətə ona qaz satmaq istəməməsində və Rusiyanın xarici işlər naziri Lavrovun Qarabağ probleminin mərhələli şəkildə həllinin vacibliyinə diqqət yetirdiyi bəyanatında büruzə verib.
Bu arada erməni mediası yazır ki, Ermənistanda Paşinyanın yumşaq şəkildə kənarlaşdırılması planlaşdırılır. Belə ki, hakimiyyətin ali eşelonlarında onun “tranzit” məsələsi fəal müzakirə olunur. Ermənistan hökumətinin Rusiya ilə (təkcə Rusiya ilə yox) gərgin münasibətləri fonunda isə məsələ daha da aktuallaşıb. Ermənistandakı “Fakt” qəzetinin məlumatına görə, bir neçə variant müzakirə olunur və onlardan biri Ermənistan prezidenti Armen Sarkisyana aiddir. Qəzetin fikrincə, Paşinyan hakimiyyətdə olduğu iki il ərzində bütün körpüləri yandıra və bütün mümkün sərhədləri keçə bilib. Salamat qalmış yeganə “körpü” prezident Armen Sarkisyanla əlaqədir ki, hazırda bundan istifadə etməyə çalışırlar.
“Hesab edirəm, bu variant daha real görünür, nəinki hakimiyyətin Armen Sarkisyana ötürülməsi”
Sözügedən məsələ ilə bağlı fikirlərini “Bakı-Xəbər”lə bölüşən Siyasi İnnovasiya və Texnologiyalar Mərkəzinin rəhbəri Mübariz Əhmədoğlu erməni mediasında Paşinyanın hakimiyyətdən kənarlaşdırılması ilə bağlı yazılanlara bir neçə aspektdən yanaşdı:“Ölkə konstitusiyası hazırkı şəraitdə buna imkan vermir. Yəni konstitusiya ilə Ermənistan prezidentinin, o cümlədən baş nazirin səlahiyyəti dəqiq bəllidir. Bu o deməkdir ki, prezident baş nazirin səlahiyyətinə yiyələnə bilməz. Yalnız müstəsna hallarda bu baş verə bilər. Bunun mahiyyəti ondan ibarətdir ki, Ermənistanda müharibə baş verərsə, o zaman parlament ali baş komandan seçməlidir. İndiki baş nazir ordunun komandanı deyil. Ordunun komandanı müharibə vaxtı seçilməlidir. Bu zaman parlament sərbəstdir. Bu isə o deməkdir ki, parlament prezidenti ali baş komandan seçə bilər. Bu gün Ermənistan parlametində müxalifət zəifdir. Ölkədə isə müxalifətin mövqeyini əsasən iki adam ifadə edir. Bunlardan biri Ermənistanın keçmiş təhlükəsizlik xidmətinin rəisi Artur Vanetsyan və sabiq prezident Serj Sarkisyanın kürəkəni, Vatikanda səfir işləmiş Mikael Minasyandır. Əsasən bu iki şəxs Paşinyanı kəskin tənqid edir və ortaya faktlar qoyurlar. Minasyanın düsturuna görə, “Mənim addımım” fraksiyası Paşinyanı vəzifədən uzaqlaşdırmalıdır. Fraksiyanın içindən kimsə baş nazir vəzifəsinə gətirilməlidir. Hesab edirəm, bu variant daha real görünür, nəinki hakimiyyətin Armen Sarkisyana ötürülməsi”.
Vidadi ORDAHALLI
