11/07/2020 06:59
728 x 90

Özünün “müharibə bəyanatı” ilə ermənilərin işinə yaramış azərbaycanlı deputat? – İrəvandan Heydər Əliyevə dair daha bir təhrifçilik...

Fikrət Sadıqov: “Erməni deputatın səsləndirdiyi fikirlər uydurmadır”

img

“Mənim addımım” fraksiyasının deputatı Tatevik Hayrapetyan erməni mediasına müsahibəsində bir sıra həqiqətə uyğun olmayan fikirlər səsləndirib. O iddia edib ki, Azərbaycan Ermənistanla təhdid dilində danışa bilməz. Guya hərbi əməliyyatlar başlayacağı təqdirdə Azərbaycan digər ərazilərini də itirəcək. Beynəlxalq birlik buna diqqətlə yanaşmalıdır.

Bununla belə, T.Hayrapetyan tarixə ekskursiya edərək mərhum prezident Heydər Əliyevin adından yalan danışıb. Müsahibəsində bildirib ki, guya vaxtilə Heydər Əliyev “Artsax” rəhbərliyi ilə müqavilə bağlamağa hazır idi. Təbii ki, onun bu fikirləri yalandır. Heydər Əliyev heç vaxt separatçı rejimin danışıqlarda tərəf olmasını qəbul etməyib. T.Hayrapetyan müsahibəsində onu da qeyd edib ki, Prezident İlham Əliyevin son açıqlamalarından əvvəl azərbaycanlı deputatlardan biri müharibə barəsində danışıb. Bildirib ki, Azərbaycanda müharibədən danışanlar bunun region və Azərbaycan üçün hansı fəlakətli nəticələr yaradacağını unudur.

Maraqlıdır, bəs ekspertlər deyilənləri necə şərh edir? T. Hayrapetyanın yuxarıda toxunduğu iki məqam reallığı əks etdirirmi?

  • “Heydər Əliyev böyük siyasətçi idi və o heç vaxt bu fikirdə olmayıb”

Məsələyə münasibət bildirən keçmiş diplomat, politoloq Fikrət Sadıqovun sözlərinə görə, erməni deputatın səsləndirdiyi fikirlər cəfəngiyyatdır:“Mərhum prezident Heydər Əliyev o vaxt Dağlıq Qarabağdakı separatçılarla danışıq aparmaq, onlarla müqavilə imzalamaq istəyində olmayıb. O cümlədən, praktiki olaraq belə hal baş verməyib. Mərhum prezident hər zaman ermənilərin yadına Helsinki sazişini salırdı. Həmin sazişdə münaqişə tərəfləri olaraq Ermənistanla Azərbaycan göstərilib. Yəni danışıqlar bu iki tərəf arasında olmalıdır və bu belə də olub. Separatçı qurumun o vaxt danışıqlarda tərəf olmasından hansısa förmada söhbət getməyib. O üzdən, erməni deputatın səsləndirdiyi fikirlər uydurmadır. Heydər Əliyev böyük siyasətçi idi və o heç vaxt bu fikirdə olmayıb. Ona görə də belə fikirlər tamamilə cəfəngiyyat və tarixi saxtalaşdırmaq cəhdidir. Heydər Əliyevin belə bir istəyi olsaydı, o zaman bunu dünya bilərdi. Belə bir şey heç vaxt olmayıb. Azərbaycanlı deputatın müharibə ilə bağlı sözügedən fikirləri işlətməsini də eşitməmişəm. Görünən odur ki, ermənilər hər şeyi öz xeyirlərinə uyğun təhrif edirlər. Nəzərə almaq lazımdır ki, Azərbaycan işğal altında olan ərazilərin güc yolu ilə azad olunmasını heç zaman istisna etmir. Danışıqlar nəticə verməsə, Azərbaycan güc yolu ilə ərazi bütövlüyünü bərpa edəcək”.

Vidadi ORDAHALLI

Son xəbərlər