Ermənistanda “Vətən” adlı yeni siyasi partiya yaradılıb. Erməni KİV-nin verdiyi məlumata görə, “Vətən” partiyasına Ermənistan Milli Təhlükəsizlik Xidmətinin keçmiş direktoru Artur Vanetsyan rəhbərlik edəcək. Qərar fövqəladə vəziyyətdə, məhdud tərkibdə keçirilən partiya qurultayında qəbul edilib. Partiyanın idarə heyəti də seçilib, onun tərkibinə Vanetsyanın da daxil olduğu 9 nəfər daxil olub.
Vanetsyan hələ 2020-ci ilin fevral ayında siyasi partiya yaratmaq niyyətini açıqlamışdı. Öncə o, əvvəlki hökumətin bir neçə nümayəndəsi ilə birlikdə təhsil məsələləri, vətəndaşlara hüquqi məsləhətlər verməklə məşğul olan “Ayrenik” Fondunu təsis etdi, lakin tədricən fondun partiyaya çevrildiyi aydın oldu. Yeri gəlmişkən, o, müxalif mövqedə olmaq niyyətini artıq açıqlayıb. Bildirilir ki, Vanetsyanın partiyası sürətlə elektoratını artırıb, Paşinyan hökümətinin səhvlərindən yararlanmağa çalışacaq. Ehtmal olunur ki, Paşinyana müxalif olan bütün siyasi qüvvələr yeni partiyaya dəstək verəcək.
Ermənistan Milli Təhlükəsizlik Xidmətinin eks-direktoru Artur Vanetsyan Rusiyaya yaxınlığı ilə seçilən şəxs kimi xarakterizə edilir. O, istefa verib çıxan zaman da qeyd etmişdik ki, 2000-ci illərdə Moskvada FTX-nın ali məktəbində təhsil alıb. Rusiyaya çox bağlı olan bu gənc siyasətçinin siyasi arenaya ciddi iddia ilə qədəm qoyması Paşinyan üçün hansı problemlər yarada bilər?
Politoloq Əhəd Məmmədli “Bakı-Xəbər”ə açıqlamasında bildirdi ki, Rusiyanın Paşinyandan çox narazı olduğu görünür: “Onun hakimiyyətə gəlməsi, sonra zor gücünə baş nazir seçilməsi və ondan sonrakı bütün hadisələrə Rusiyanın narazılığı olub. Xüsusilə də Paşinyanın rəqibi olan eks-prezident Köçəryanın həbsi ilə bağlı məsələdə Rusiya açıq narazılığını ifadə edib. Putinin Köçəryana bir neçə dəfə məktub yazması da bunun sübutu sayıla bilər. Lavrovun münaqişənin həlli ilə bağlı təklif etdiyi mərhələli həll məsələsinə Ermənistanın hakim siyasi elitası açıq etiraz etdi. Hətta bunun fonunda Rusiyaya yönəlik hədələrin şahidi olduq. Bir çox narazılıqlara baxmayaraq, Paşinyanın hakimiyyəti davam edir. Rusiya ilə Ermənistan arasındakı dövlətlərarası münasibətlər müttəfiqlik səviyyəsində inkişadadır. Paşinyan çalışır ki, Rusiyaya doğru reveranslar etsin. Daxili rəydə Paşinyanın reytinqi sürətlə aşağı enir. Çünki o, iqtisadi rifahın yüksəldilməsi ilə bağlı verdiyi vədləri yerinə yetirə bilmədi. Baş nazir həm də Qərbə inteqrasiya ilə bağlı uğursuzluğa düçar oldu. Pandemiya ilə də bağlı orada vəziyyət pisdir. Rusiyanın onun yerinə alternativ hazırlaması inandırıcı və gözləniləndir. Rusiyanın özündə də hakimiyyət uzun illərdir kəşfiyyatçıların əlindədir. Belə kadrlarla onlara işləmək daha asandır. Vanetsyanın üzərində belə plan qurula bilər. Nəzərə alsaq ki, keçmiş təhlükəsizlik naziri həm də Rusiyaya yaxın adamdır, yeni partiyaya ciddi dəstəyin olacağını gözləmək olar. Bu həm də Paşinyanın reytinqinin düşən vaxtına təsadüf edirsə, düşünülmüş planın tərkib hissəsi ola bilər. Bunun Azərbaycana heç bir xeyri yoxdur. Sırf Rusiyanın adamının Ermənistanda hakimiyyətə gəlməsi Qarabağ probleminin həllini daha da dalana dirəyə bilər. Biz, kimin orada hakimiyyətə gəlməsindən asılı olmayaraq, çalışmalıyıq ki. tez bir zamanda Qarabağ problemini öz xeyrimizə həll edək”.
Məhəmmədəli QƏRİBLİ
